تحقيق محسن السكري وهشام طلعت مصطفي الجزء الثاني

س: وما الأدلة علي ارتكاب المدعو هشام طلعت لوقائع التي أسندتها إليه؟
ج:
أولاً الاتصالات التليفونية، فكان بيتصل بي بشكل شبه يومي علي تليفوني
المحمول 0122134888 من تليفونه الشخصي 0122104710 تقريباً وزادت الاتصالات
بينا خلال الفترة اللي كنت فيها في دبي من 23/7 إلي 28/7/2008 بجانب إنه
كان بيتصل بي من موبايل تاني في باريس بس مش فاكر الرقم بالضبط وأنا كنت
فاكر إن أنا مرة سجلت له مكالمة علي الموبايل بتاعي وكان بيتكلم فيها علي
ضرورة قتل سوزان، والكلام ده كان أقل من سنة وأنا محتاج أشوف التليفون
بتاعي عشان أقدر أطلع التسجيل ده وهو ماركة HTC لونه أسود وشاشة كبيرة وده
موجود مع الشرطة،
والدليل التاني إن كل تأشيرات دخول لندن اللي كان
مطلعها لي علي عباس وده موظف عند هشام طلعت في الشركة بتاعته بتاعت
المقاولات، وعلي ده كمان هو اللي مطلع تأشيرة دبي واتعملت عن طريق طلب
اتقدم من فرع شركة هشام اللي في دبي لمصلحة الهجرة والجنسية اللي في
الإمارات، وأنا استلمت التأشيرة دي من سفارة الإمارات في مصر وكل تأشيرات
لندن طالعة من سفارة إنجلترا في مصر بناء علي طلبات من شركة طلعت مصطفي
جروب،
والدليل التالت بند الفلوس أنا رحت أخدتها منه في الشاليه
بتاعه رقم 120 فندق فورسيزون بشرم الشيخ وبداخل شنطة حمرا جلد بتاعته هو،
وأودعت من المبلغ ده في حسابي مبلغ 300 ألف دولار في حسابي اللي في بنك
HSCB فرع شرم الشيخ وده كان في يوم 3/8/2008 ولإني أخدتها منه كان يوم 1/8
وكان يوم جمعة، وممكن التأكد من إن هشام كان موجود فيه يوم الجمعة عن طريق
الفندق أو عن طريق مطار شرم الشيخ لأنه بيروح بطائرته الخاصة والمبلغ ده
كان شكله مجموع من مكاتب صرافة وكان كله فئة المائة دولار،
وأنا أخدت
الفلوس دي من عنده من الشالية وما اعتقدتش إن حد شافها وباقي المبلغ موجود
في شقتي اللي في الشيخ زايد، وأنا ممكن أقدم الفلوس دي للنيابة كإثبات إن
الفلوس دي أنا واخدها من هشام طلعت، والدليل الرابع إن فيه شهود علي
الوقائع دي، منهم مدير مكتبه عبدالخالق خوجة، وسكرتيره حازم توفيق، وعلي
عباس، ودول طبعاً تبع هشام ومش هيشهدوا عليه، وأنا عندي شهود منهم رحيم طه
وده شريكي في شركة VIB ودي شركة السياحة بتاعتي وده عارف كل المواضيع دي،
واسمه بالكامل رحيم طه سيد، وساكن بحي النور بشرم الشيخ، وفيه كمان واحد
مصري يحمل الجنسية الإنجليزية موجود في لندن واسمه أحمد الانجباوي، وده
صاحب معرض سيارات في شارع كينجز رود في شركة اسمها يونيك فيكلز، وأخويا
أشرف السكري وده اللي أنا فاكرهم دلوقتي.
س: أنت متهم بقتل المجني عليها سوزان عبدالستار تميم عمداً.
ج: محصلش.
س: كما أنك متهم بإحراز جوهر الكوكايين المخدر في غير الأحوال المصرح بها قانوناً.
ج: أيوه أنا كان معاي مخدرات، بس دي كانت طريقة للانتقام من سوزان وأفضل من القتل اللي هشام قال عليها.
س: هل لديك أقوال أخري؟
ج: لا.
تمت أقواله وتوقع منه محسن السكري.
المواجهة الثانية
وفي
مواجهة أخرى أمام النيابة ، قال السكري إن المتهم الثاني هشام طلعت مصطفي
قرر التخلص من سوزان في لندن عقب قيامها بتحرير محاضر له في العاصمة
البريطانية، وأنه طلب منه أن يتخلص منها بإلقائها من شرفة نافذة شقتها
بطريقة مشابهة لمصرع الفنانة سعاد حسني، والدكتور أشرف مروان، اللذين لقيا
مصرعيهما بالطريقة نفسها، بالإضافة لقيامها بخيانته مع رجل آخر رغم عقد
الزواج العرفي بينهما، وقال السكري في تحقيقات النيابة العامة إنه قام
بتسجيل مكالماته مع هشام طلعت مصطفي حول تكليف الأخير له بقتل سوزان تميم
حتي لا "يشيل" القضية بمفرده إذا ما تم الكشف عن الجريمة
اسمي/ محسن منير حمدي السكري
سابق سؤاله
س. متي قمت تحديدًا بتسليم شقيقك أشرف السكري مبلغ المائة وعشرة آلاف دولار؟
ج.
أنا استلمت مبلغ الـ 2 مليون دولار من هشام طلعت زي ما قلت قبل كده يوم
الجمعة بفندق الفورسيزون في شاليه رقم 120 والكلام ده كان يوم الجمعة
الساعة 9 بالليل وسلمتهم لأشرف أخويا، منهم مبلغ مائة وعشرة آلاف دولار
يوم السبت أو يوم الأحد في شرم الشيخ في الشقة بتاعتي.
س. ما قولك فيما
قرره شقيقك في التحقيقات من أنه قد تسلم منك المبلغ المذكور قبل صلاة
الجمعة الموافق 1/8/2008 بداخل غرفته بالفندق الذي كان يقيم فيه؟
ج. أنا فعلاً إديت أشرف أخويا الفلوس يوم السبت في الأوضة بتاعته في فندق دلتا اللي كان نازل فيه وأنا ماكنتش متذكر التواريخ بالضبط.
س. وكيف سلمته المبلغ المذكور؟
ج. حيث كان عندي شنطة هاندباج لونها أزرق، حطيت فيها المائة وعشرة آلاف دولار، واديتهمله بالشنطة.
س. ما قولك فيما قرره المذكور من أنه لم يشاهد محتويات تلك الحقيبة التي كانت بحوزتك مما مفاده أنك لم تترك هذه الحقيبة عنده؟
ج. لا أنا إديته الفلوس في الشنطة.
س.
استشهدت فيما سبق بالمدعو/ رحيم طه سيد علي أن لديه ثمة معلومات عن
الخلافات التي كانت دائرة بين هشام طلعت وبين المجني عليها وأنه كان يعلم
سلفًا بالخلافات التي كانت بينهما؟
ج. أيوه الكلام ده مظبوط.
س. ما قولك وقد أنكر الأخير وجود أي معلومات لديه حول هذه الوقائع؟
ج. هو رحيم عارف ومش عايز يخوش مع هشام طلعت في مشاكل.
س. وما قولك وقد أنكر شقيقك المدعو "أشرف" وجود أي معلومات لديه أيضًا عن الخلافات التي دارت بين هشام طلعت والمجني عليها؟
ج. أنا قلت لأشرف أخويا بس هو مش عاوز يدخل في مشاكل علشان شغله.
س. ما صلتك بالمدعو "عزت شحاتة مجلي"؟
ج. ده الخدام بتاعي.
س.
ما قولك فيما قرره المذكور من قيام شقيقك المدعو "أشرف" بالحضور لمسكنك
بشرم الشيخ وجمع بعض ملابسك وإرسالها للتنظيف وكذا جمع جميع متعلقاتك بذلك
المسكن؟
ج. الكلام ده حصل لأن أنا عارض الشقة للبيع بقالي سنة، ورحيم
شريكي عنده مشتري، فنقل الأغراض كان بسبب بيع الشقة وغسيل الملابس كان
بقصد نقلها نضيفة.
س. ما قولك فيما قرره المذكور أيضا من أن شقيقك كان يرتدي آنذاك قفازا من البلاستيك؟
ج. هوه أكيد علشان إيديه متتمهذبش لأن أشرف أخويا موسوس.
س. قررت فيما سبق بأنك قد قمت بشراء حذاء رياضي ماركة نايك أثناء وجودك بدبي؟
ج. أيوه أنا جبت كوتشي نايك "جزمة تانية"، شبشب والحاجات دي أنا كنت حاططها عندي في الشقة في شرم الشيخ.
س. ما قولك من أنه بتفتيش مسكنك بشرم الشيخ لم يعثر علي الحذاء الرياضي ماركة نايك الذي أشرت إليه؟
ج. لا الجزمة دي موجودة في الجزامة اللي في شرم الشيخ اللي في أوضة النوم هيه والجزمة التانية.
س. ما صلتك بالمدعو بيومي محمود عبدالعزيز؟
ج. ما عرفهوش.
س.
ما قولك فيما قرره سالف الذكر والذي يعمل كفرد أمن بمنتجع سقارة كانتري
كلوب من أنك كنت تقيم بالشاليه رقم 15 بالمنتجع اعتبارًا من تاريخ
3/8/2008 خلافًا لما قررته سلفًا في التحقيقات؟
ج. أنا دخلت المنتجع ده يوم 5/8/2008 وقعدت مع أحمد المسلمي علي حمام السباحة وقعدت معاه وإنما مقعدتش في الشاليه ده.
س. وما كيفية ذهابك لذلك المنتجع؟
ج. بعربية واخدها من شركة أوبشن ليموزين وكنت مأجرها يوم 4/8/2008.
س.
ما قولك فيما قرره المدعو بيومي محمود عبدالعزيز من أنه قد تم تفتيش
الغرفة التي كنت تقيم فيها وعثر بين متعلقاتك علي سلاح ناري وذخيرة اللذين
سبق وأن تم مواجهتك بهما؟
ج. محصلش والسلاح ده اتلاقي في درج التسريحة أو الكومودينو بس مش في شنطتي.
س. ما قولك فيما قرره المذكور أيضًا من أقرارك لضابط الواقعة القائم بالتفتيش إحرازك السلاح والذخيرة المضبوطتين؟
ج. الكلام ده محصلش.
س. وما قولك وقد شهد المقدم سمير سعد بقيامه بتفتيش غرفتك والعثور بين متعلقاتك علي السلاح والذخيرة المضبوطتين؟
ج. محصلش والأوضة دي مش بتاعتي والسلاح ده ماكانش في أوضتي وكان في أي حتة.
س. وما قولك وقد قررت للضابط الواقعة المذكور باحرازك المضبوطات؟
ج. محصلش والضابط ماسألنيش أيضًا.
س.
ما قولك فيما قرره المدعو أحمد عبدالبصير أحمد علي، موظف الاستقبال
بالمنتجع المذكور من قيامك بشغل الغرفة رقم 15 اعتبارًا من تاريخ 3/8/2008؟
ج. محصلش وأنا كنت داخل في ضيافة أحمد المسلمي.
س. ما قولك من أنه بتفتيش مسكنك بشرم الشيخ تم العثور علي مجموعة من التيشيرتات السوداء وشورت أبيض طويل؟
ملحوظة
حيث قمنا بعرض الملابس المذكورة علي الماثل فأقر بملكيته لها
س. ما قولك وقد أنكر هشام طلعت مصطفي لدي سماع أقواله بالتحقيقات بتكليفك بقتل المجني عليها أو دفع أي مبالغ نقدية إليك؟
ج.
الكلام ده مش مضبوط وهشام اللي طلب مني قتلها قبل كده بس لما كانت البنت
دي في لندن، وطلب مني أخطفها وأجبها مصر وبعدين السيناريو اتقلب وطلب مني
أقتلها وأنا قلت الكلام ده قبل كده بسبب خلافات مشتركة بينهم في باريس، هو
بيحاول يجمدلها أرصدة، وهي عاملة له محاضر في انجلترا بالتهديد بالقتل وهو
كان عاوز يخلص من هذه المشكلة ودفع لي مبالغ نقدية وأنا في لندن، إنما
فيما يتعلق بموضوع دبي اتصل بي تليفونيا وقاللي تعالي إلي القاهرة قبل
السفر لدبي بعشرة أيام ورحت له بيته اللي في واحد شارع الصالح أيوب
بالزمالك، ويومها قاللي المجني عليها في دبي ووراني عقد الشقة بتاعتها وهي
مقيمة في دبي وعاوز أخلص منها زي سعاد حسني،
وقاللي إن البت عاملة لي
محاضر كتيرة في لندن ولازم نخلص منها وفي اليوم ده كان الكلام كله علشان
عايزني أقتلها بالطريقة دي سواء تتخبط بالعربية أو تترمي من البلكونة زي
سعاد حسني وحاولت أناقشه في الموضوع فمسمعش كلامي وعرضت عليه فكرة وضع
المخدرات لها فقاللي هتجيب محامي يعرف يطلعها منها وأنا نزلت من عنده
يومها وهو في دماغه فكرة القتل، أنا رافض القتل تمامًا،
وأنا فكرت أن
أؤذي البنت بموضوع المخدرات بس مانفذتش الموضوع ده، كمان لأني معرفتش أدخل
المخدرات لدبي ورحت لدبي يوم 23/7، أو يوم 24/7 رحت عندها الصبح الساعة 9
أو عشرة سلمت برواز جلد للمجني عليها والظرف والجواب بتاع شركة بوند وأخدت
بعضي ونزلت وبعدين عملت مغادرة من فندق هيلتون لفندق الواحة وكان معايا
واحدة صاحبتي اسمها ألكسندرا أوكرانية الجنسية ونمت معاها أكتر من مرة
ودفعت لها حوالي ثلاثة آلاف دولار ورجعت يوم 28/7/2008 ووصلت القاهرة يوم
28/7 الساعة 5م وقعدت ترانزيت بالمطار وركبت طائرة شرم الشيخ 300 الساعة 9
وكل ده ماكنتش لسه قابلت هشام
وفي اليوم اللي بعده اتصل بي علي
التليفون وقاللي تعالي لي علي القاهرة وفعلاً أخدت الطائرة وقابلته في
بيته يوم 29/7/2008 الساعة الواحدة ص، وقاللي لي عملت إيه؟ فقلت له أنا
مقتلتش المجني عليها بس حطيت لها مخدرات في البرواز وإنت باتصالاتك بلغ
عليها، هو قاللي أنا مش عايز سيرتي تيجي في أي موضوع وأنا هقابلك في شرم
الشيخ يوم الجمعة وهاديك فلوس.
س. قررت بأقولك السابقة وبجلسة اليوم أنك قد تقابلت مع المدعو هشام طلعت قبل سفرك لدبي يوم 23/7/2008 بعشرة أيام؟
ج. أيوه أنا رحت له قبل ما أسافر دبي بعشرة أو خمسة عشر يومًا.
س. ما قولك فيما قرره سالف الذكر من أنه لم يكن متواجدًا بالبلاد في ذلك التاريخ وأنه قد سافر لسويسرا بتاريخ 5/7/2008؟
ج. أنا قابلته في أوائل شهر يوليو بس مش قادر أرصد تواريخ مفصلة.
س.
وما قولك وقد ثبت أيضًا من إفادة مصلحة الجوازات، الهجرة الجنسية من أن
سالف الذكر لم يكن موجودًا بداخل البلاد خلال الفترة من 5/7/2008 إلي
26/7/2008؟
ج. أنا قابلته في أول شهر يوليو بعد انتهاء زيارة الوليد بن طلال الأولي في أوائل الشهر وأنا مش متذكر التواريخ تفصيلاً.
س.
قررت فيما سبق أيضًا بأقوالك أنك قد توجهت إلي دبي بتاريخ 23/7/2008 وأنك
قد تقابلت مع المجني عليها في الحادية عشرة من صباح ذلك اليوم؟
ج. أنا
فعلاً سافرت دبي يوم 23/7/2008 ووصلت الساعة 4 صباحًا، وكنت عند المجني
عليها حوالي الساعة 9 أو الساعة العاشرة صباح يوم 23/7/2008.
س. ما
قولك من أنه قد سبق من إفادة الجوازات وإفادة السلطات القضائية بدبي من
وصولك إلي هناك في حوالي الساعة الثالثة صباح يوم 24/7/2008 خلافًا لما
قررته الآن؟
ج. هو كلامهم أصدق لأن البيانات عندهم وأنا اعتقدت في الوقت اللي قلته لأني كنت حاجز يوم 23/7/2008.
س.
قررت بأقولك السابقة بالتحقيقات أنك قد تقابلت مع المدعو هشام طلعت عقب
عودتك من دبي لمنزله الساعة الثانية عشرة من مساء يوم 28/7/2008؟
ج. أنا رحت لهشام طلعت في اليوم التالي لوصولي وبعد ما رحت شرم الشيخ وجيت.
س. ما تعليقك علي ما قررته سلفًا؟
ج. أنا كنت ناسي التواريخ بالضبط.
س. ما قولك وقد أنكر سالف الذكر إيداعه عن مبالغ في حسابك؟
ج. هو كداب وممكن الرجوع لحسابي بالبنك بمعرفة حركة الإيداعات والحساب.
س. وما قولك فيما قرره أيضًا من أنه لم يساعدك في استخراج تأشيرات السفر للندن ودبي فيما يتعلق بالوقائع محل التحقيقات؟
ج. ماحصلش وهشام طلعت مدي تعليمات لموظف مخصوص فيزا دبي + فيزا لندن اللي كان بيطلعها واحد اسمه حمزة.
س. وما قولك وقد استشهدت فيما سبق بكل من علي عباس وعبدالخالق خوجة من العاملين لدي هشام طلعت مصطفي؟
ج. أيوه أنا قلت الكلام ده.
س. ما قولك وقد أنكر سالفا الذكر لدي سؤالهما في التحقيقات وجود أي معلومات لديهما بشأن تلك الواقعة.
ج. هما أكيد بيجاملوه.
س. قررت فيما سبق وجود اتصالات متبادلة فيما بينك وبين المدعو هشام طلعت من خلال رقم تليفونه المحمول 0122104710؟
ج. أيوه وأنا مسجل تليفون هشام طلعت عندي بالموبايل بالحروف (H.T.M).
س. وما قولك وقد أنكر المذكور صلته بذلك الهاتف؟
ج.
الرقم بتاع هشام طلعت أنا مش حافظه تفصيلاً وكمان أنا مسجله برقم(H.T.M)
في التليفون بتاعي اللي هو (H.T.C) وأنا لا أحفظ أرقام، وممكن الرجوع
للتليفون وهطلب نمرة هشام طلعت الحقيقية وأنا مسجل عندي علي التليفون أكتر
من نمرة، له واحدة للموبايل الخاص بتاعه باسم (H.T.M)، والتانية
باسم(H.T.M) باريس "موبايل"، الثالثة(H.T.M) مسؤول تاني.
س. وما قولك وقد أنكر المدعو أحمد المسلمي قيامه ببيع أي مواد مخدرة لك وفقًا لما قررته بأقوالك؟
ج. فعلا الكلام ده مضبوط وأنا رجعت وقلت الحقيقة.
س. وما قولك وقد أنكر المذكور صلته بالسلاح الناري والذخيرة المضبوطتين؟
ج. الحاجة دي بتاعة أحمد.

» تحقيق محسن السكري وهشام طلعت مصطفي الجزء الرابع
» تحقيق محسن السكري وهشام طلعت مصطفي الجزء الاول
» تحقيق محسن السكري وهشام طلعت مصطفي الجزء الثالث
» الحكم بنقض حكم محكمة جنايات القاهرة بأعدام هشام طلعت مصطفي
» عمار يا مشمش...الجزء الثاني.