عقول أجهدها النوم

السلام عليكم ورحمة الله وبركاته

إسمي أحمد .. (ده واحد غيري علي فكرة)

طول عمري وانا احمد وإلي نهاية عمري هكون أحمد (برضه مش انا)

عمري ما فكرت أغير أسمي .. وأغيره ليه إن كنت بحبه ومستريح له

هي بداية غريبة شوية .. لكن خليكم معايا

ومن البداية بحي كل شخص هيقرا الموضوع لأخره

يمكن يفهمني ويمكن ميفهمنيش لكن هيكون مشكور إنه فرغ جزء من عقله علشان يسمع كلام الاخ احمد ده .. !!

.. لو حد سألني اسمك أيه هقوله اسمي احمد

ممكن يقولي لا .. أنت مسمكشي احمد إنت فلان

ساعتها ممكن أطلعله البطاقة وأقوله لا .. إقرا كده هتلاقي مكتوب فيها ان اسمي احمد

ده لو الشخص ده اول مرة يشوفه لكن لو اللي إعترض علي أسم احمد واحد يعرفه كويس

يبقي أكيد في حاجة غلط ... ندخل في الموضوع

واحد اسمه احمد من قديم الأزل وكل الناس تعرفه بالاسم ده

فجأة لقي شخص بينادي عليه وبيقوله إزيك يا .. مسعد

يا عم انا مش مسعد .. أنا أسمي أحمد والمشكلة انك تعرفني كويس

قاله أه إفتكرت إنت احمد فعلا

تاني يوم نفس الشخص ده قابله وقاله إزيك يا .. خالد

قاله والله يا عم اسمي احمد مش خالد ولسة مفكرك بنفسي امبارح عموما دي البطاقة

علشان تتأكد إن إسمي أحمد ..

ثالث يوم قابله نفس الشخص بإبتسامة عريضة وقاله حبيبي يا .. عفيفي

قاله والله يا عم اسمي احمد .. إنت بتفهم إزاي عموما ادي شهادة الميلاد علشان تتأكد

رابع يوم قابله وهو مكشر وقاله إزيك يا .. محيي

يا عم والله انا مش محيي أنا أحمد .. عموما أدي شهادة التخرج بتاعتي علشان تتأكد

خامس يوم اول ما شافه دور وشه الناحية التانية وقاله أبعد عني يا .. شوقي

قاله والله العظيم انا مش شوقي انا اسمي احمد يا عم اللي أخويا اسلام وعمر ومحمد وعمرو والسيد وشهاب

يا عم افتكرني بقي .. قاله ايوة ياعم افتكرت خلاص

سادس يوم قابله في الشارع اول ما شافه جري وراه وهو ماسك في ايده "مطواه" وعايز يموته

وبيقوله انا هموتك يا .. منصور .. !!

قام جري من قدامه وهو بيفكر .. أقف واقوله ان انا مش منصور ولا أجري وأسيبه لعقله الخربان

لو وقلتله ان انا مش منصور ياتري هيفهم ولا كالعادة تاني يوم هيقابلني ويلفق لي اسم جديد

ياتري الراجل ده يعرف اسمي الحقيقي وبيستعبط ولا الراجل ده مجنون ..

ليه الراجل ده مش مصدق ان في اسم جديد اسمه احمد أقوي وأجمل من كل الأسماء التانية بالنسبة لي

وهفضل متمسك بيه ومش ممكن هغيره

ليه الراجل ده كل يوم يطلعلي اسم جديد ومرة الاسم يعجبه فيقابلني وهو بيضحك ومرة تانية الاسم ميعجبوش

فيكشر ومرة الاسم يفكره بحاجة وحشة فيبقي عايز يموتني إزاي الراجل ده متخيل ان انا بكل الاسماء دي

... لما فكرت في المشكلة دي بتاعة الاخ احمد

شوفت ان عقل الراجل العجيب ده بيتسم بالعقم الفكري والكساح العقلي

والشلل الرابعي في كل زوايا ومحاور الفهم (ياسلام عليا وعلي تفسيري المنطقي)

وشوفت كمان ان الراجل ده عقله نايم من زمان ومخدشي باله ان في ناس اسمهم احمد

ومعندهمشي استعداد لا يغيروا اسمهم ولا يبعوه ولا حتي بكنوز الدنيا ..

وشوفت كمان لما عرفت ان اسم الراجل ده اللي بيجري وري احمد (بلا اسم) عمره ما عرف معني

الاسماء الجميلة لانه يا عيني عليه مظلوم بأسمه اللي معرفشي ليه ماحاولشي يغيره من زمان .. !!

ولما سالت احمد ليه ما حولتش تقنعه لسابع مرة ان انت اسمك احمد

قالي انا عارف اني لو كلمته هيقتنع كالعادة لكن تعبت معاه خلاص هو عقله كدا وخليه كدا لانه ممكن لو فهم يموت

ولما سألت نفسي يمكن الراجل ده متخيل ان احمد ده بيتغير كل شوية بس رجعت وقلت مستحيل حد ييغير الاسماء دي كلها

مش منطقي انه يقدر يلعب بكل الاسماء دي ويتلون عليها كان زمانه وقع من زمان والناس اتهمته بالجنان

لكن احمد مستمر ولسة بيحظي بحب الناس واحترامهم وأصدقاءه عددهم اكتر من أصدقاء جمال مبارك (هبدأ ألخبط اهو)

دول بيقولوا ان اصحابه وصلوا لـ 4000 صاحب وكل يوم الناس بتجيله من كل مكان في الكون

يبقي ازاي احمد ده يكون بيتغير ..

احمد ثابت وقوي جدا وخلاص مش محتاج بقي يقعد يقول انا مش فلان ولا فلان ولا فلان

لانه هيقولها مرة واحدة وهيكتفي بيها

انا اسمي احمد مش حد تاني

عقول أجهدها النوم وعقول أجهدتها كثرة التفكير,وأيادى أصابها الورم من كثرة مسك العصا ..

على أفتراض أنا هذا عنوان موضوعك يا أخ أمجد ..

أمجد دا حكايه كان فى مرة عندوا سلحفاه .كانت ياعينى بردانه أووى ومستخبيه فأمجد عمال يخرج فيها مش عارف. مسك العصايه وضرب فيها بردوا مش راضيه تخرج .أبوة شافه .. ومسك العصايه من ايدة وقعدوا يدفو على النار وبعد شويه أمجد شاف السلحفاه جايه وبتقرب عليهم
وقال لأمجد :يابنى الناس زى السلحفه إن أردتهم بقربك فأدفئهم بعطفك ..

ياسلام على الاب اللى بيقول حكم

أمجد بقى كان ليه واحد صحبه أسمه تقريبا منير .
وكانو يذاكروا سوا فى بيت منير وليهم صديق تالت جار منير وكان أمجد دايما يبص على بيت صديقهم التالت دا من الشباك. ويفضل يقول دا بيتهم مش حلو ومش نظيف وكل مرة يقول كدا

لحد ما أخيرا بيبص فى مرة وبيستغرب وبيقول البيت بقى نظيف أوووى هما عملو ايه عشان يخلوة كدا .وفضل يفكر بالساعات .وعاوز يعمل فى بيتهم زى ما صديقهم التالت دا عمل
رد منير على أمجد وقاله ..لا البيت زى ماهو أنا اللى نظفتلك أزاز الشباك اللى بتبص منه ..

أمجد حس إن إنه فى عيوب كتير أوووى وتقريبا معظم تفكيرة وظنونه غلط .. وكمان قراراته على الناس معضمها او تقريبا كلها غلط ومتسرعه أوووى لحد كبير .وكمان متسرع فى الفهم .يعنى بيفهم غلط كتير أوووى .ودايما عندة حب السيطرة والتملك والعند ....

ياااااه دانا فيا عيوب كتير أوووى واللى زعله أنو حس إن الناس فاهمه كدا
باباه كان حاسس بيه أووووى وفضل يكلمه ويفهمه ..

وقال ايه بقى لأمجد.
قاله كلمه عيوب دى ياأمجد كلمه نسبيه . يعنى اللى أنا شايفه صح ممكن أنت تشوفه غلط وممكن صاحبك منير يشوفه صح .

وكمان انا مبسوط بيك أووى أنت أكتشفت إنك عندك عيوب ودا شى فى حد ذاته كويس جدا لانك بكدا هاتفهم إن باقى الناس عندها عيوب زى عيوبك وهاتدر تتقبل الأمور بشكل صحيح ..
بس فى فرق ياأمجد
انت هاتقبل نفسك كدا ولا لا.. و هاتعرف عيوبك وبس كدا ولا هاتحاول تصلح منها
سكت صاحبنا دا وبلم ..شكله كدا خيبه ومش هايعرف يعمل حاجه .
وأبوة لحد دلوقتى مش عارف أمجد هايغير من نفسه للأحسن مع أنو كويس ولا هايفضل واقف مكانه

منير صاحب امجد كان بيطور نفسه وبيصلح منها وبقى راضى أوووووووووى
أوووى عن نفسه وكمان كل أصحابه راضيه عنه

على فكرة منير دا حد اعرفه ..
هو حقيقى ميعرفش أمجد خالص ولا عمرة شافه بس أنا كنت بحكيله عنه دايما لانهم الأتنين أصحابى أوووى وكان مفكر أو بيفكر إن أمجد دا مش أمجد . وإنه أحتمال يكون أحمد بما إنه على وزن أمجد

بس امجد لسه قايلى أمبارح
أنك لازم تقبل نفسك زى ماهى حتى تصبح الحقيقه هى دائما الأقرب إليك . تقبله حتى تعيش حاضرك . تقبل ذاتك حتى تستطيع أن تتغلب على نقاط ضعفك بس أفهم بردوا إن الناس ممكن تختلف عنك .وميكونش عندها نفس الرغبه فى تقبل الذات اللى عندك . وإلا هاتتعب .

أيوة أنا عارف الواد أحمد ده
مش هي دي بردو حكاية أحمد و المستخبي
هو محدش قابله و قاله ازيك يا عماراوي خالص؟
أصله من عيلة العماراوي
حد عارفها؟
بيتهيألي فعلا ان محدش عايز يصدق ان أحمد ده ممكن يبقى ليه أسامي بعدد شعر راسه لأن عيلته كبيرة قوي و الأسامي فيها مفيش أكتر منها إنما بردو ليه كيانه و شخصيته
و لو مشي شوية بإسم معين بيبقى للصالح و الخير و شايف انه هيقدر يقدم منفعة لعيلته و هو شايل الإسم ده و ماشي بيه
و لو حد قاله تعالى يا أحمد خد اسمي شوية و خلص المصلحة دي بدالي هيروح بكل حب و يرجع كما كان بعد ما يخلص لأن اسمه الحقيقي و الأساسي أحمد اللي لا يقدر ينساه و لا يستبدله و لا يعيش من غيره

موضوع ممتاز جدا ولة مذاق خاص

حيث يطرح فكرة جديدة من نوعها كالعادة للاستاذ احمد(مش حد تانى)

انا يمكن اخد الموضوع دة من وجهة نظر بعيدة خالص

بمعنى ان (الاستاذ احمد ) لم يقصد بة الاسم ولكنة يقصد بية

المبدأ اللى مستحيل يتغير ابدا حتى لو الناس صمموا على ذلك

وقد اعجبنى تصمميم الاخ احمد على مبدأة

موضوع راااائع جدآ ياأ/احمد كالعاده..

وانا في رأيي الشخصي ان اسمي هو جزء مني هو مبدأ في حد ذاته..

والمبادئ لا تتجزأ..

شكرآ علي الموضوع الرائع..

اقتباس :: و لو حد قاله تعالى يا أحمد خد اسمي شوية و خلص المصلحة دي بدالي هيروح بكل حب

ده اللى عاوز اقوله

عجبني أمجد ومنير وأحمد والمستخبي

نفس حكاية محمود اللي فضل يحلم بالحب ولما جاله مقدرشي يحافظ عليه

لكنه قرر ان حبه ده تجربة .. لازم يستفاد منها

علشان لما يحب تاني يقدر يحافظ علي حبه وميجرحشي ولا يتجرحشي

...

بقولك ايه يا احمد

ممكن تلخصلى الموضوع ف كلمتين لان بجد مستكلف اقرأ [ندعوك للتسجيل في المنتدى أو التعريف بنفسك لمعاينة هذه الصورة]

أزعم أن عمرو إمام قرأ وقرأ جيدا

ولكنه يمثل دور المستخبي

شكرا على الموضوع يا عم أحمد

وأعذرنا لدغتنا حشرة التسي تسي

ازي حضرتك يا ا/ مختار

انا لا أعيش دور المستخبى .. لكن بقوم بدور الكسول ..

عموما وزى ما انتم اتكلمتم عن احمد وامجد والمستخبى فأنا هاتكلم عن واحد اعرفه اسمه زكى

زكى ده بقى كتير بيحس ان الكون واقف ضده .. وساعات كتير بيحس انه محتار قوى .. وساعات كتير بيحس انه مش فاهم حاجة

كمان بيتعجب قوى م اللى بيعمله زميله خالد رغم انه هو كمان ممكن يعمل كده واكتر من كده ..

وده لانه دايما بيشوف الحاجة لنفسه فى صورة كويسة لكن بالنسبة للناس غلط وعيب ومينفعش .. ميصحش

وكمان حاسس ان فى كتير بيغيروا منه وبيحقددوا ع اللى هو فيه .. يمكن علشان دايرة معارفه العريضه

او علشان محبوب قوى حتى من ناس متعرفهوش لمجرد السماع عنه ؟؟

أو علشان بسمته اللى بيفرقها بحب على كل اللى يقابله ؟؟

أو علشان غضبه الشديد ف الحق ؟؟

او علشان اسمه ؟؟

او علشان أخلاقه العالية قوى ؟؟

او علشان صراحته الشديدة فى صورة جميلة دون خدش حياء ؟؟

او علشان بيخفض جناحه وبيسمع للكل ؟؟

هو لحد دلوقتى مش عارف ..

المشكلة انه كل فترة بينصدم فى ناس ويضرب كف على كف

يعنى لما لقى صديق عمره وسنينه مدحت بيتكلم عنه بطريقة وحشة ..

ولما لقى الناس بتقابله بوجه وقلبهم مليان منه أضغان ..

بجد انا لو مكانه كنت تعبت وجالى الضغط ويمين تلاتة واكون فى تعداد الموتى

نسيت اقول ان زكى متحمل لأقصى درجة ومبيملش

هو شايف انه موجود مع ناس غلط .. حاسس انه ف غابة

يمكن علشان هو شايف نفسه مثالى زيادة عن اللزوم فى زمان يكره المثالية ويحقرها .. وفى الحالة دى يكون (زكى) غبى ومغفل

لانه علشان تعيش بين الذئاب لابد ان يكون لك انياب ..

ولحد دلوقتى مش قادر يحكم على شخص ان كان طيب او شرير

وده لانه حاسس جواه بالخير والشر

السؤال بقى :

يا ترى مين زكى ده .. ؟؟؟؟؟؟؟؟؟؟؟؟؟

ياريت مفيش حد يكون الزكاء مفرتك دماغه يطلع ويقول انه هو انا ..

ساعتها هارد عليه وأقوله انا اسمى عمرو يا غبى مش (زكى) ..

أمممممممم...
صحيح هو ذكى مش على وزن عمرو خالص
بس أظاهر انهم شبه بعض كتير ..
بس تعرف ذكى دا صعبان عليا .
أصلى ساعات بحس أنو غلبان أووى وطيب

معتقدش ان فى وجه شبه خالص

وزكى ده مش طيب .. ده بيصطنع الطيابة كما يزعم معظم من جوله

اسألنى عنه .. أعرفه قوى

اقتباس :: وزكى ده مش طيب .. ده بيصطنع الطيابة كما يزعم معظم من
جوله

استرنا يارب ولا تفضحنا....

اه والله يا نور

اكبر نعمة بعد الاسلام هى الستر

واجب علينا ان نشكر الله علي نعمة الستر .. وان نشكره على ان وفقنا لشكره .. فالشكر يحتاج إلى شكر

ربنا استرنا ولا تفضحنا .. وزدنا ولا تنقصنا ..

طيب وانت بتعرف حد كدا ومتمسك بيه كدا ليه متسيبك منه ..؟

انا مش شايف فيه كده

انا بقول الناس اللى بتعتقد كده

لان الناس من كتر الفهلوة بقت تشوف ما وراء الجدار

يعنى حتى لو هو فعلا طيب .. هيقولولك : لا .. مش طيب .. احنا اكبر منك ونعرف عنك كتير ..

ومضطر تقتنع ان (زكى) فعلا مش طيب .. ولو عارضت هتبقى عنيد وبتصمم على رأيك

فسلك أمورك وامشى معاهم حتى ولو هتكون امعة .. دى نصيحة ياريت (متاخدش بيها)

اقتباس :: فسلك أمورك وامشى معاهم حتى ولو هتكون امعة ..

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

AhMeD ELSaYeD كتب:

اقتباس :: فسلك أمورك وامشى معاهم حتى ولو هتكون امعة ..

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

طيب كملها بقى يا هندسة

دى نصيحة ياريت (متاخدش بيها)

اقتباس :: طيب كملها بقى يا هندسة

دى نصيحة ياريت (متاخدش بيها)

حاضر ..!

قصدك عيش بلشي

من البلشية

أسعدني مرورك الكريم استاذ مختار محمود

وشكرا جزيلا لكل من مر من هنا

فى حكايات تانيه كتييييييييييييييير ؛؛

MhmeD A ElSaLaM كتب:: فى حكايات تانيه كتييييييييييييييير ؛؛

يا عم لا حكايا ت ولا روايات

ده اللى قدر عليه صاحب الموضوع

أحمد منصور كتب:: أسعدني مرورك الكريم استاذ مختار محمود

وشكرا جزيلا لكل من مر من هنا

احنا غلطانين أصلا ان ردينا فى الموضوع
Evil or Very Mad

طيب ماتديله فرصه يقول هو .. خلينا نسمعها منه .

هو حتى عاوز يتكلم !!؟؟

» سطحية سكنت عقول الرجال
» قبل النوم !!!!!
» الوضوء قبل النوم
» النوم..ملف كامل عنه.
» مساء النوم يا جماعة