أنا أشك إذاً أنا دبوس !!

أنا أشك إذا أنا دبوس !!



فى الحقيقة الله يرحمه الفيلسوف ديكارت بقى هو السبب فى نظرية الشك دى

والراجل كتر خيره قالك لازم تشك فى كل حاجة وفى كل شىء حتى لازم تشك فى كونك حى أصلا لأنك

ممكن تكون مت من زمان وهو مخبيين عليك علشان متتخضش!

ساعات كتير جدا بيصيبنا الشك وهو شىء طبيعى عند بعض الناس وشىء مش


طبيعى عند كتير من الناس وده اللى بيسموه وسوسه وبنشوفها كتير

يعنى لو حصلك مرة و إنت قاعد مع أسرتك وبتتفرج على برنامج واحد من الناس

وبتشوف قد إيه مصر جميلة جدا وهادية! فجأة تلاقى

حد قطع حبل أفكارك وحبك لمصر وقالك بدون مقدمات كده :

( يا فلان : شوفنى كده والنبى طفيت البوتاجاز ولا لسه والع ..؟؟)

والغريب إنك لما تدخل المطبخ هتلاقى البوتاجاز مطفى من فترة مش أقل من ساعة

إلا ربع على الأقل !! وبرضه ساعات تلاقى نفسك مثلا بعد ما تجهز نفسك وتلبس

وتبقى على سنجة عشرة مع إنى مش عارفه يعنى إيه على سنجة عشرة وليه مش

على سنجة 11 مثلا أو 16 القصد تتشيك وتخرج رايح مشوارك تلاقيك بعد ما

مشيت شوية لا بأس بهم وقفت وكلمت نفسك قدام الناس فى وسط الطريق

( الله !!هو أنا قفلت باب الشقة بالمفتاح ولا شديته بس و سايبه مفتوح.؟!)

ولو قلبك جامد شويه هتمشى وزى ما تيجى تيجى يعنى هما الحرامية

واقفين مستنيين لما أمشى ويسرقونا ؟ حتى لو دخلوا هيسرقوا إيه يعنى

معندناش غير الكمبيوتر ومتفيرس والخلاط فيشته سايبه عادى بقى

ولو قلبك خفيف وده المتوقع هتلاقى نفسك رجعت حتى لو كنت مشيت نص الطريق

علشان تتأكد من قفلك للباب,, الغريب إنك لما توصل هتلاقى الباب مقفول ولو

جبت تلاتة معاك علشان يفتحوه مش هتعرف !! الشك كمان ممكن يجيلك وإنت

قاعد فى أمان الله فى عربية من بتوع بنها المكيفين دول وتقول لنفسك قرب بلتان كده,,,

( هو أنا خدت الباقى ..؟؟!!) وتقعد تعصر فى دماغك علشان متحرجش نفسك مع

قائد السيارة وتفضل تعد الفلوس اللى كانت معاك وتسأل اللى جنبك وتتصل

بالتليفون تسأل فى البيت هو انا كان معايا فلوس كام وأنا خارج يا جماعة وتفتكر

طيب وانا رايح على الموقف قرب النادى كده اشتريت علبة مناديل وباكو لبان

تشكلز يا نهار اسوح مش متذكر أوى برضه كم الفلوس الفظيع اللى كان بحوذتى

يا ترى أنا خدت الباقى ولا لأ؟؟!! والغريب بقى فى النهاية إن الباقى يطلع ربع

جنيه والأغرب إنك واخده مرتين لغاية دلوقتى..... والشك مش بعيد عننا فى

الإمتحانات كمان تلاقى نفسك لما تخرج مثلا من إمتحان مهم

بتقول لروحك ( هو أنا كتبت رقم جلوسى ولا نسيته ..؟؟)

وتقعد تفتكر تفتكر وشويه تقول كتبته وشويتين نسيته ولما تييجى تسأل حد فى

زمايلك (يا عيال محدش خد باله أنا كتبت رقم جلوسى ولا لأ؟)

يقولولك يا ابنى أهمد ده أحنا شايفين المراقب بيشد الورقة منك وبيحلفلك مية يمين

إن رقم جلوسك مكتوب صح يعم !!

والشك بيترواح من واحد للتانى فيه ناس الشك داخلها فى حتة النظافة وبتغسل

الصابونه بصابونه تانية قبل ما تستعملها ولو مثلا فكرت تسلم عليه يسيبك وعلى

أقرب مركز ديتول فى البلد علشان يلحق الفيروسات!!

وفيه ناس بتشك فى إن الحاجات بتقع منها يعنى تلاقى واحدة تفضل كل

شويه تفتح شنطتها تشوف المحفظة والموبيل موجودين ولا لأ الغريب الفرق بين

الفتحة وأختها 3 دقايق والأغرب إنها متعرفش إن ممكن حد فعلا يسرقها من

تصرفاتها دى زى اللى وقف واحدة بيقولها :

حضرتك بتدورى فى شنطتك على إيه قالتله المحفظة ,, قالها زى دى وشاور على

المحفظة اللى هى ماسكاها فى إيدها أصلا!!

هل هو الشك زيادة تطمين ولا مرض ؟

وكمان كتييييير تلاقى اللى بيشك إنه أى حاجة تحصله

عرض لمرض خطير جدا وده مش مرحلة مؤقته لأسباب نفسية

لأ ده هو كده طول عمره يعنى يروح يكشف الدكتور يقوله

بتشتكى من إيه يا حضرة ؟؟!!

يرد يقوله : والله يا دكتور أنا كان جالى نغزة فى جنبى اليمين من تلت سنين

كده ومجتليش من ساعتها تانى بس أنا شاكك إنها الزايدة !؟

هو الموضوع مشكوك فيه اساسا ان كان جد ولا هزار
بس الطبيعى انى عمرى ماحبيت الجد فأكيد هقلبه هزار
بصوا بقى انا اقرب شك جالى كان امبارح وانا تحت البطنيه
وحوليه التلج الى ملوش حل ده
افتكرت انى كنت حاطط ميه على النار عشان اعمل كباية شاى
بس طبعا فضلت ورا نفسى لحد ما اقنعت نفسى انى طفيت على الميه دى
بس شكى مطلعش فى محله لانى سمعت زعيق كده لدرجة انه صحانى من النوم
حد بيستحلف لحد وفى نار ايده جواه من الحد ده
برضوا فضلت ورا نفسى لحد ما اقتنعت ان الكلام مش قاصدنى
صحيت تانى يوم ويارتنى ماصحيت ولقيت كلام لا ع البال ولا ع الخاطر
ومش عندنا بس دا الجيران نفسهم بقوا يقبلونى فى الشارع ينفع يا احمد تقلب الدنيا امبارح
مكنتش كباية شاى ياجدعان


تعرفوا ياجماعه ان اجمل حاجه فى الدنيا الضحك
وانا بقالى يومين بضحك بسبب فزوره بطبقها على اى حد مربى شنبه دلوقتى اشوفه ماشى فى الشارع
شوفوا بقى كام واحد مربى شنبه وبضحك اد ايه فى اليوم
الفزوره بتقول

هو ليه الصعيدى مربى شنبه
عشان الدبان يمسح رجله قبل مايخش
ههههههههههههههههههه

وعليها بقى طول اليوم الى اقابله بشنب اقوله
ايه هو بيمسح رجله قبل مايخش ولا ايه
ايه ياعم يبو عتبه
ومش سايب حد بشنب فى حاله

هههههههههههههههههههههههههههه

وعامل حوجبه تنده عشان تضلل على عيونه المغمصه

أنتى عارفة أنا كده مش دبوس أنا ماكينة خياطة قاعدة بتشكشك دا أنا بعتبر كل ده عادى جدا دا أنا بيحصلي أكتر من كده دا أنا لازم كل يوم أفضل أشك أنى مشلتش فيشة المكواه و أفضل أشك لغاية ما أوصل الكلية و طبعا علشان أقعد فى المحاضرة مركزة دى محاضرات رياضة يعنى لازم أكون منتبه جدا المهم يعنى لازم اتصل ب بابا أو ماما أو حد من اخواتى اللى أنا عارفة أنه فى البيت و أقول اتأكد أنى أنا شلت فيشة المكواه و طبعا يرد بابا يقولى يا بنتى ما أنتى قولتلى أتأكد مرة قبل ما تخرجى ع الكلية و ف مرة كلمت ماما و قولتلها كده و طبعا لأنها شكاكة أكتر منى و لأنى شغلها فى البلد رجعت من الشغل مخصوص علشان تتأكد لأنها شكت هى كمان
و فى مرة تانيه جيت اتصل ملقتش الموبيل قولت أكيد وقع طيب فى العربية و لا السوزوكى و لا نسيته فى المدرج طيب مين أخر حد كلمته المهم أنى مفكرتش أنى أكون نسيته فى البيت و اتصلت عليه ( الموبايل) ردت عليا أختى و قالتلى أنتى نسيتى الموبايل فى البيت قولتلها طيب شوفى فيشة المكواه شلتها و لا لاء طبعا ردها أنها صوتت فى وشي


أنا بقى لاقيت الحل للموضوع ده و هو أنى مكويش لبسي خالص و بقيت دلوقتى و أنا بشترى لبس بحاول اختار اللى مش بيتكوى