الرد على التلفزيون المصرى

يا جماعة، حرام… الأشغال واقفة والمدارس والجامعات واقفة… إحنا قاعدين في بيوتنا مرعوبين… مفيش أمان والرجالة واقفة طول الليل تحرس بيوتها… ومحدش عارف ينزل من بيته… الناس مش عارفة تقبض…. الناس مش لاقية تاكل…الاقتصاد بيروح والاستثمار بيروح…. والسياحة بتنضرب والبورصة وقعت…. أنا بشتغل باليومية كل يوم 15 جنيه، أجيب منين أنا؟… أنا أهلي عايشين بره وحيموتوا من القلق علي… أنا صاحبي مات إمبارح وهو واقف بيحرس العمارة… إنتوا عايزين إيه؟ عايزين تخربوها؟ حرية إيه ودستور إيه؟ المهم الاستقرار اللي هو عماد أي دولة… وبعدين يعني يرضيكم الراجل في السن ده وهو الرئيس والأب يمشي من غير كرامة خصوصاً بعد كل اللي عمله للبلد في الحرب؟ فضحتونا في الفضائيات وخليتوا الدول كلها تشمت فينا… استمعوا لصوت العقل وارحمونا بقى…..صح ولا إيه؟
إيه… مسمعتوش؟ أيوة… إيه، وستين إيه كمان…. بالراحة بس… اقروا لحد الآخر… زي إخواتكم
ممكن ناخد كل الشكاوي دي واحدة واحدة؟

الأشغال واقفة:
صح… طب هو إيه اللي وقفها؟ المظاهرات والناس اللي بايتين في الشوارع والفوضى اللي عملوها. صح؟ لأ مش صح. لو ترجع بذاكرتك 11 يوم للوراء وبالتحديد يوم الثلاثاء 25 يناير اللي هو يوم بداية الثورة، كان فيه شغل… والأربعاء كان فيه ثورة، وكان فيه شغل… والخميس كان فيه ثورة، وكان فيه شغل. أنا عن نفسي رحت الشغل وحتى المرور كان عادي كمان، إيه رأيك بقى؟ والجامعات والمدارس الصبح برضه، قفلوها ليه؟ غير كده، المدارس كانت السنة اللي فاتت في أجازة شبه دائمة عشان أنفلونزا الخنازير، وبعدين دي الثورة حتخللي فيه ميزانية للتعليم، عشان يبقى عندنا تعلم بجد، مش الهبل اللي حاصل ده.

إحنا قاعدين في بيوتنا مرعوبين ومفيش أمان والرجالة واقفة طول الليل تحرس بيوتها ومحدش عارف ينزل من بيته:
عشان المظاهرات ولا عشان حظر التجول؟ طب هم المتظاهرين اللي عملوا حظر التجول؟ ولا النظام اللي مش عارف يتصرف مع مظاهرات سلمية؟ بلاش دي، مين اللي أجبر الأهالي يشتغلوا شغلة الشرطة؟ لما الدكتور والمهندس والطالب والموظف يضطر يمسك شومة عشان يحمي أهله، كان مين السبب؟ المتظاهرين؟ المتظاهرين اللي قالوا البلد ميبقاش فيها شرطي واحد يحميها؟ المتظاهرين اللي طلقوا البلطجية والحرامية والمجرمين عالبلد ولا الداخلية؟ لما الجيش ينزل الشوارع ويبقى صوت مرور دبابة جنب البيت ده صوت مألوف، بل ومحبب ويشعر الناس بالأمان… مين السبب؟ المتظاهرين ولا الداخلية اللي انسحبت من مواقعها وسابت الشعب يواجه البلطجية اللي هي برضه اللي جابتهم وهو أعزل وبطوله؟ بيربوا الشعب… حرية وفوضى ولا قهر وأمان؟ بيربونا والله

الناس مش عارفة تقبض…. الناس مش لاقية تاكل… الاقتصاد بيروح والاستثمار بيروح:
هو مين اللي قفل كل المصالح؟ مين اللي قفل البنوك؟ مين اللي منع نقل البضائع بين المدن لما قفل الطرق؟ مين اللي قرر يوقف كل الأنشطة الإقتصادية في البلد؟ مش الحكومة؟ ولو قلتلي مهم عملوا كده عشان السرقات والتخريب حنرجع لنقطة إن الداخلية هي اللي أجرتهم، ولو قلتلي عشان حظر التجول، هو كان مين اللي فرضه؟ وبعدين تعلالي هنا… إنت ناسي إن لما الثورة تحاكم الناس، حناخد فلوسنا اللي نهبوها؟ تخيل ثروات ناس زي أحمد عز وجمال مبارك لو بقت ملك الشعب؟ تخيل لماإيرادات قناة السويس تبقى موارد للدولة مش لرئاسة الدولة؟ تخيل لو المدن السكنية اللي على أرارضي الدولة بقت ملك الدولة وبقت أسعارها تناسب دخول المواطنين؟ تخيل حجم الاستثمار في بلد مش بتتعامل بالرشوة والمحسوبية والمصالحالخاصة؟

السياحة بتتضرب:
هو مين اللي استخدم عنف غير آدمي وقنابل ورصاص وكملها لما عمل حظر تجول ورعبهم لحد ما مشيوا؟ المتظاهرين؟

والبورصة وقعت:
أي خسارة في البورصة دلوقتي هي خسارة تقديرية مش خسارة حقيقية… الخسارة الحقيقية في البورصة لما تبيع السهم بأرخص من تمنه، إنما لو مبيعتوش وفضل عندك، هو خسران تقديرياً بس. يعني أول ما الدنيا تتصلح حتعلى قيمة الأسهم تاني وتبقى مخسرتش حاجة.الى فى التحرير ايرانين وخونة وامريكان ويهود وروس طيب ومين المسئول عن ده مش المخابرات العامة ومين سمح لثمانية مليون عميل يدخلو البلد الناس دى بتنفذ اجندات امريكية واسرائيلةطيب والنظام الحالى هو قائد قوى الممانعة فى العالم ومين بييبيع الغاز لاسرائيل ببلاش ومين بيحاصر غزة وميين منبطح لامريكا واسرائيل

أنا بشتغل باليومية كل يوم 15 جنيه، أجيب منين أنا؟:
وهو ده طبيعي؟ لما يبقى دستور بلدك بيقول إن فيه…. إستنى إستنى، والله لاجيبلك مواد الدستور الحلوة عشان تصدقني: “العمل حق وواجب وشرف تكفله الدولة، ويكون العاملون الممتازون محل تقدير الدولة والمجتمع. ولا يجوز فرض أى عمل جبرا على المواطنين إلا بمقتضى قانون ولأداء خدمة عامة وبمقابل عادل”. وخد دي كمان: “تكفل الدولة خدمات التأمين الاجتماعى والصحى، ومعاشات العجز عن العمل والبطالة والشيخوخة للمواطنين جميعا، وذلك وفقا للقانون.” يعني مش بس من حقك تلاقي شغل وبمقابل عادل، ده إنت كمان لو مالقتش، ليك تعويض. إنت متخيل الظلم اللي إنت فيه؟ لما رئيس دولتك يقوللك مانتو بتخلفوا كتير، أأكلكم منين؟ هم المتظاهرين اللي كتير منهم أصلاً معاهم فلوس حيتظاهروا ليه؟ دول طالعين عشانك إنت قبل أي حد… يا راجل ده إنت أصلاً اللي المفروض تتظاهر.. بس ولا يهمك، رقبتنا سدادة… وإنت أول حد لازم ياخد حقه أول ما تنجح الثورة.

أنا أهلي عايشين بره وحيموتوا من القلق علي:
وهم لو كانوا لقوا شغل محترم هنا كانوا سافروا أصلاً؟ راجع السابق. بالإضافة، شغل بره يعني ممكن أوي يكونوا متبهدلين، عشان الحمد لله خارجيتنا مش بتعبرنا ولا بتحمينا بره… وده كمان لازم يتغير
أنا صاحبي مات إمبارح وهو واقف بيحرس العمارة:
مش بس حقولك راجع ردّي على موضوع البلطجية… حقولك إن اللي ماتوا عشان إحنا نرتاح دول من سن صاحبك… وعندهم صحاب برضه… وزي ما صاحبك مات شهيد عشان بيدافع عن بيته، هم كمان ماتوا شهداء عشان قضيتهم… اللي هي في الأصل قضيتنا كلنا لو فكرنا.

إنتوا عايزين إيه؟ حرية إيه ودستور إيه؟ المهم الاستقرار اللي هو عماد أي دولة. إنتوا عايزين تخربوها؟:
أيوة إحنا عايزين حرية، مالها؟ إنت دقتها؟ عارف يعني إيه إنك تقول رأيك من غير خوف؟ عارف يعني إيه أنك تختار مبن يحكمك؟ ولو طلعت غلطان ولا طلع مش كويس تحاكمه وتمشيه وتجيب غيره؟ أنهي استقرار و فيه طوارئ؟ أنهي استقرار وأي ضابط ممكن يجيبك ويفتشك ويحبسك لو شكلك مش عاجبه وتفضل محجوز لحد مايبانلك صحاب، ده طبعاً غير اللي حتشوفه وإنت محجوز؟ تصدق إن دستورك بيقول إن لازم يتقالك مقبوض عليك ليه؟ وإن فيه شروط لأماكن الاحتجاز؟ وإن حتى لو طلعت مجرم، مش من حق حد لا يعذبك ولا حتى يهينك؟ يا راجل، ده على رأي صديق لي: أنا مش عارف حتى أربي دقني، حتى لو كنت بربيها عشان شكلي عاجبني كدة مش أكتر. وبعدين مين اللي يخربها؟ الشباب اللي نزلوا وهم محتسبين الشهادة عشان مض ضامنين يرجعوا بيوتهم على رجليهم، وفي وقت فراغهم لما ميكونش حد بيضربهم بينضفواالشارع وينظموا المرور ويعاجوا المصابين منهم ومن اللي ضربوهم؟ طب أقولك حاجة؟ الشباب دول لقوا عسكري أمن (كان لسة بيرمي عليهم قنابل) متصاب، عالجوه ولبسوه مدني عشان محدش يكون غضبان فيؤذيه. طب أقولك حاجة تانية؟ الشباب دول كتير ومن طبقات مختلفة وفي وسطهم بنات كتير، محدش فكر يضايقهم بفعل أو كلمة

وبعدين يعني يرضيكم الراجل في السن ده وهو الرئيس والأب يمشي من غير كرامة خصوصاً بعد كل اللي عمله للبلد في الحرب؟:
محدش يقوللي كلمة أب ديه، أنا أبويا راجل محترم، بيخاف عليا من الهوا، مش حيسلط عليا بلطجية، مش حيطلق عليا رصاص حي، وللي بيقولوا ميعرفش، دي تبقى أنيل وأنيل.. وبعدين معرفش قبلها، معملش حاجة بعدها ليه؟ ولا معرفشبرضه؟ إيه؟ معندوش تليفزيون؟ أما موضوع الحرب ده، فإرحمونا بقى… السادات هو صاحب نصر أكتوبر قيادياً وشهداء أكتوبر واللي حاربوا هم أصحابها فعلياً… تعرف إن كل اللي عموله إنه هو اللي أمر بالطلعة الجوية من على الأرض؟ يعني حتى مطلعش. وبعدين الحاكم مش أب، ولا إله… موظف في الدولة، بيشتغل عند الشعب… يعني لو مش يؤدي وظيفته صح، يتحاكم ويمشي… عادي جداً.

فضحتونا في الفضائيات وخليتوا الدول كلها تشمت فينا:
لو حنتكلم على الفضائيات العربية والغربية، والله لو كان اللي في التحرير لقوا حد معبرهم في التليفزيون المصري، كانوا كلموه… ربنا يخلي أنس الفقي بقى… ده لما كانوا الشباب بيتضربوا في التحرير، كان التليفزيون المصري بيعلن نبأ “عاجل” عن ثلاثة مسلحين بيقتحموا ”بقالة” في الدقهلية… ناس بيترمى عليهم مولوتوف والمتحف المصري بيولع، وده مركز مع بقالة. والله واحدة صاحبتي كانت حتتشل فيها. أما الشماتة، فياريت تتفرج على رسائل الأخوة العرب في فضائياتهم، إلا ما فيه حد فيهم غير وبيدعيلنا بالنصر. الجزائريين بيعتذروا، واللي كانوا شايفينا خونة وعملاء بيقولوا في إتظار مصر لتخرج وتقود العرب. أما الأجانب، فمبهورين بإن الشعب اللي كان طول عمره متخلف وفوضوي خارج عشان يطالب بحقوقه وبيتظاهر بأعداد غفيرة وفي منتهى النظام والتحضر.

استمعوا لصوت العقل وارحمونا بقى:
أظن بعد كل اللي قلته ده، باين صوت العقل يقول إيه. ولله مقدرين إن الناس تعبانة، بس هانت… زقة واحدة… بس نضمن حقوقنا وبعدين يروحوا، اصبروا شوية… هانت

نقلت الكلام ده علشان بيحاول يوضح صورة مغلوطة و ياريت يكون بفايدة

تسمل ايدك اللي نقلت وكلام رسم صورة صحيحة وهذا يكفيني

الإعلام الحكومى المنحاز يرتكب جرائم أبشع بكثير من جرائم الداخلية

ياطول صبرك يا إسلام
وتسلم ايدك
النظام عمال يخطط ويدبر فى كل مؤامراته وللأسف ناس كتير بتنخدع
ليه ؟
مش عارف
أعان الله الثوار وثبتهم وبث تأييدهم فى القلوب

تسلم ايدك يا كبير

والله كل لحظة بتمر علي الثوار في الميدان بنكسب فيها أرض عمرنا ما هنخسرها تاني

اقتباس :: الرد على التلفيون المصرى

والله معنديش رد على التلفزيون المصرى اللى أبدع فى الفترة دى الحقيقة غير:

(وحياة أبوكو تروحوا تنعسوا وتريحونا )

فضيحة عالمية للإعلام المصرى: استقالة نائب مدير الفضائية المصرية وانضمامها للمتظاهرين

07-02-2011

[ندعوك للتسجيل في المنتدى أو التعريف بنفسك لمعاينة هذه الصورة]

رغم أن “بلطجية الوطنى” في مصر ما زالوا يلاحقون ويعتدون على
الإعلاميين الغربيين ويحاولن ترويعهم بشتى الأساليب، قامت الإعلامية
المصرية “شهيرة أمين” بخطوة جريئة عندما قدمت استقالتها من التلفزيون
المصري احتجاجا على الأوضاع.
تقول أمين: “لقد فاض الكيل ولم اعد أطيق ما يجري في وسائل الإعلام المصرية،
وخاصة المرئية منها وأمين هي نائبة المدير العام في فضائية النيل، وتعمل
هناك منذ عام 1989. تتابع شهيرة حديثها وتقول: “أسبوع كامل من وخز الضمير
لحق بي وأنا أقدم نشرات الأخبار والتقارير عما يحدث في مصر. منعنا من عرض
صور المتظاهرين

[ندعوك للتسجيل في المنتدى أو التعريف بنفسك لمعاينة هذا الرابط]

عجبتني مقولة

الإعلام المصري عامل زي واحد أخرس بيقول لواحد أطرش إن في واحد أعمى شاف واحد مشلول بيجري وراء واحد أصلع بيشد في شعره

ايه يفيد وانت جايبلي المظاهرات ومانع الصوت ومشغل اغاني وطنية
بتفصلني عن الحدث ليه

اعلام يذل
والله سبب كل الفساد هو تسترهم علي الحرامية اللي عمل كده
خلو ابو تريكة وعمرو دياب واحمد السقا هم دول الابطال بالنسبة للاطفال

حسبي الله ونعم الوكيل فيهم

اعلام النظام وليس الشعب

» عاجل : التلفزيون المصرى ينقل مباراة مصر ونيجيريا
» أثر التلفزيون على الاطفال
» الاصدار الثانى لقنوات التلفزيون الى دخلة على بعضها
» جدول مباريات كأس العالم المذاعة على التلفزيون المصري
» تخيل ان قنوات التلفزيون دخات على بعض والله موضوع جامد