هذه اول واخر عمل شعرى بل خواطر عامية .. طالع كده من غير موازين ومرة ومش هاحاولها تانى مع الاعتذارللأحمدين وسميح ويحيى وحنين .. وغير مسموح بالنقد لانها اقل من مستوى النقد وقدروا موهبة شابة غلطت ومش هتعملها تانى
يارب يقل مقامكم جميعاً .. قولوا أمين!
امى دايما بتدعيلى بكبر المقام
اضحك فى عبى على جهلها
واقولها
ليه ياما تشتمينى وعاوزه تصغرينى
تقوم تضحك على هبلى
وتدعيلى
ربنا يسامحنى
دا انا لو حتى فى مرة
غضبت عليك
ادعى عليك غصب عنى
واكره اللى يقول امين
واتمناك احلى البشر اجمعين
وتكون فى عز عز
ولا فى حكمة القذافى
ولا كتر العلام لحس دماغى
قولتلها صح
ماهى قلة العلام مش ذنبك
دحنا فى حصة الحساب
مش الرياضة
يعنى فى الابتدائى
مش الاعدادى
عرفنا لو كبر مقام الكسر
قلت قيمته
وكان دايما ابويا يوزنى على المذاكرة
لجل ما تكبر قيمتى ومقامى
كنت اقدر الاولنية
واصهين عن التانية
واكل الكتب اكتر من المحشى
وكتير ماحشتها فى دماغى
يمكن اصبح زى العالم الفلانى
ولا الوزير العلانى
واتشطرت
وكبرت
واستنيت
احصد زرعى
لكن فقت
ولقتنا كلنا كسور
مقامك كبير قدام الملايين الصحيحة
قيمتك كبيرة عندهم
طالما مقام كسرك كبير
لكن
يقل مقامك
وتحاول تعدى خط الكسر
وتبقى صحيح
ولو صغير
وتناطح الكبار
ينداس عليك
ياصعلوك
دا الباشا هيفضل باشا
والفقير ويا الحمير
عرفتى ياما
انك بتدعى عليا
مش ليا
ينقطع لسانى
يا ابن حشاى
مكنش مرادى
وعلى قد علامى
والجهل خيبة
يقل مقامك يابنى
انت وجميع المسلمين
اجمعين
قولوا امين .
موضوع: يارب يقل مقامكم جميعاً .. قولوا أمين! 
الثلاثاء 08 مارس 2011, 3:13 pm
