الرحلة

موضوع: الرحلة الأحد 26 يونيو 2011, 2:01 pm

عارفين ..

مين هو العبد الربانى

؟؟؟؟؟؟؟؟؟

واحد عرف ربنا

وعرف ان ربنا بيحبه

فأحبه وراح له

وعرف كمان انه لو اتخلق بأخلاق الله

واتصف بصفاته على قدره البشرى

هيزيد قدره اوى عند ربنا

ــــــــــــــــــــــــــــــــــــــــــــــــــــــــــ

الرحلة دى هاتكون فى الوصول للمعنى ده

معنى ان الله يكون هو كل شىء فى حياتى

يكون مركزية حياتى

فى طريقتين ممكن اتعامل بيهم فى حياتى

الطريقة الاولى

[ندعوك للتسجيل في المنتدى أو التعريف بنفسك لمعاينة هذه الصورة]

انى اكون انا مركز حياتى

بتعامل مع كل حاجه فى حياتى بأسلوب مختلف

بتعامل مع اهلى بشكل

مع اصحابى بشكل تانى

مع زمايل فى الشغل او فى الجامعة بشكل تالت

المشكله فى التعاملات اللى ببقى ليا فيها المركزية

انا اللى احدد شكل التعامل مع اى حاجه

واكيد بيحصل فيها غلط او مشكله

فى تعامل تانى

[ندعوك للتسجيل في المنتدى أو التعريف بنفسك لمعاينة هذه الصورة]

بيكون الله هو المركز فى حياتى

بتعامل مع الناس من خلال الله

مع عملى من خلال الله

مع اهلى من خلال الله

اى حاجه اعملها تكون من خلال الله

بس ازاى يكون ربنا هو مركز حياتى

لازم الاول اعرفه

طيب اعرفه بأيه ؟

اعرفه من خلال أسمائه وصفاته

من خلال اثاره فى الكون

طيب المعرفه حصلت

يبقى ديما ابقى فاكره

بالذكر

لما المعرفة تتحقق وتتأكد جويا

يجى بعد كده العمل

وفى نوعين من العمل

عمل عن اقتناع

وعمل من غير اقتناع

العمل اللى بأقتناع هو المطلوب هو اللى بيزيد الايمان جوايا

هو اللى بستنى وقته بفارغ الصبر علشان اعمله

زى الصلاه

كان النبى صلى الله عليه وسلم بيقول لـ بلال

اريحنا بها يابلال

هو ده العمل بأقتناع

انك تعمل العبادة بشوق

العمل من غير اقتناع غالبا مابيتحول لعادة

وفرق كبير بين العادة والعبادة

العادة بتعملها على كره

متوصلش بيها لحكمة ربنا فى العمل

العمل ليه كذا شكل

عبادات

معاملات

اعمار للأرض

شوفو معايا دى هتكون خريطتنا فى الرحلة
[ندعوك للتسجيل في المنتدى أو التعريف بنفسك لمعاينة هذه الصورة]

وانشاء الله هنبتدى الاول

بالمعرفة بالله

واول حاجه هاتكون لمحة بسيطه على الادلة على وجوده

وان الايمان اساس العمل

وبعد كده هانتعرف على الله من خلال اسمائه وصفاته

ولى عودة انشاء الله

موضوع: رد: الرحلة الأحد 26 يونيو 2011, 2:11 pm

موضوع رائع وتنظيم ممتاز

قيمة الموضوع في استكماله

شكرا لصاحب الموضوع

ومتابع معك ان شاء الله

موضوع: رد: الرحلة الأحد 26 يونيو 2011, 3:13 pm

موضوع جميل جدااااااااا
جزاك الله عنا كل خير

موضوع: رد: الرحلة الأحد 26 يونيو 2011, 4:02 pm

شكرا للاستاذ احمد هلول

وسعيد جدا بمتابعتك

وشكرا لمرورك يا استاذ اسلام

ـــــــــــــــــــــــــــــــــــــــــــــــــــــــــــــــــــ

وجود الله شىء بديهى بيتوصل الانسان ليه بفطرته

وجاء الرسل ليصححو للناس مفهوم الالوهية

زمان عرفت ان التدين غريزة فى الانسان

زيه زى الاكل والشرب وبقية الغرائز

لكن مفهوم الانسان نحو الاله كان فيه مشكله

هو تأكد ان فى قوه اعظم منه هيا اللى بتسيطر على الكون

بالمفهوم الخاطىء عن الالوهية يصنع الحجر بأيده ويعبده

هو مش منكر وجود الاله بس مفهوم الالوهية عنده غلط

وعلشان كده ربنا بعت الرسل

كل شىء فى الوجود بيصرخ بوجود الله

لكن شدة الظهور قد تلد الخفاء

وشدة القرب بتعطل الرؤية

[ندعوك للتسجيل في المنتدى أو التعريف بنفسك لمعاينة هذه الصورة]

دى ادلة وجود الله

دليل الابداع

اى حد فينا ماخقلش نفسه ولا خلق اولاده

حتى الناس اللى ادعت الالوهية ليه ماحدش فيهم قال انا خلقت السموات وخلقت الارض

فرعون نفسه قال(اليس لى ملك مصر وهذه الانهار تجرى من تحتى )

مقلش انا خلقت كذا وكذا

مقدرش يقترب من الحقيقة دى

ويعنى ايه خلق

الخلق ايجاد الشىء من عدم

خلق الله يقدر يحافظ على نوعه

وده الفرق بين خلق الله وخلق البشر

خلق البشر يفتقر الى الايجاد من عدم

وعدم قدرته على الحفاظ على نوعه

ودليل الابداع ان الله مبدع كل شىء

الابداع معناه الانشاء على غير مثال

قال الله تعالى

(ام خلقوا من غير شىء ام هم الخالقون ..ام خلقوا السموات والارض بل لايوقنون)
ــــــــــــــــــــــــــــــــــــــــــــــــــــــ
دليل العناية

لو حد دخل بيت ولقى غرفة مجهزة للأكل

واخرى للنوم واخرى للنظافة ورابعة للضيافة

سوف يجزم بان الترتيب ده مجاش محض الصدفه

لاء دا فى واراه فاعل وليه حكمه وقدرة على الترتيب ده

تخيل بقى الكون الفسييح ده والارض والسموات

وحتى فى نفسك

وفى انفسكم افلا تبصرون

واكتر من كده كمان الزرة اصغر شىء

الاليكترون اصغر حاجه ازاى محافظ على شحنته

وغيرها وغيرها

ده كل مايقولش ان فى اله واحد متحكم فى كل هذا

قال الله تعالى

تبارك الذى جعل فى السماء بروجا وجعل فيها سراج وقمرا منيرا
ــــــــــــــــــــــــــــــــــــــــــــــــ
دليل الحركة

الكون كله حركه الشمس فى حركة حول الارض والارض قى حركه حول الشمس

القمر يدول حول الارض

المجموعة الشمسيه كلها بتدور حول الشمس وبرده بتدور حول المجرة والمجرة بتدور حول مجرة غيرها

الاليكترون بيدور حول النواة

والنواة فيها نيترون وبروتون بيدورو حولين بعض

كل شىء بيدور وكل شىء ليه مسار محدد وكلها محسوبه ومقدرة

تخيل ده منظم ومرتب هل من قبيل الصدفة

بالعكس دا نظام صارخ على وجود الله

قال تعالى

ان الله يمسك السموات والارض ان تزولا ولأن زالتا ان امسكهما من احد من بعده ان الله كان حليما غفورا

ـــــــــــــــــــــــــــــــــــــــــــــــــــــــــــــــــــــــــــــــ

دليل الحدوث

كل منا يعرف بدايته

ويعرف ان له نهاية

والكون كله له بداية والعلماء بيقدروا يقدروها دلوقتى

لو حصلت حادثة قتل

ولم يستدل على الفاعل هتقول ايه الفاعل مجهول

ولا هتقول ليس هناك فاعل

ووجودنا ده محدث لانك عارف بدايته

يبقى اكيد فى خالق للحدث اوفاعل ليه

قال الله تعالى

ام خلقو انفسهم من غير شىء ام هم الخالقون

انشاء الله هنتكلم بعد كده على اخلاص التوحيد

والعوده قريبه انشاء الله

موضوع: رد: الرحلة الأحد 26 يونيو 2011, 6:56 pm

اخلاص التوحيد

لازم نوضح نقطه مهمة هيا افتقار العالم لله بمعنى

احنا قلنا ادلة وجود الله ومنها استنتجنا ان العالم فى حاجه الى الله ليستمد منها ذاته

فا العقل وما به من افكار

والقلوب ومايتجدد فيها من مشاعر

والاجسام ومايجرى بها من دماء

كل هذا يقوم باردته تعالى

ولو تركه لما فكرنا اننا سنفنى

لاننا بالفعل هنكون فنينا

فا وجودنا بيستمد وجوده من وجود الله

ووجد الله واجب له من ذاته

انما احنا واخدين منحة الوجود من الله بقيت طول ماهو سامح لينا ببقائها

وتنعدم بارادته سبحانه وتعالى

وبعد الادلة على وجوده لازم نجزم بانه لا اله الا الله

ونوقن بانه لاشىء فى العالم يستحق يرتقى لمستوى العبودية لله

وعلى الرغم من ان الفطرة بتصرخ بوجود الله

يأبى الناس الا انهم يلبسو الحق بالباطل ويشوه التوحيد بما يعكر صفائه

فيحصل الاشراك بالله

والشرك بالله نوعين

شرك ظاهر

وشرك باطن

فا الشرك الظاهر اتخاذ شفعاء لله وده لا لشىء الا لتبرير الشر واتباع اهواء النفس

فهم برده مش منكرين وجود الله لكن عاوزين يبررو شرهم وشططهم باتخاذ شفعاء

يعنى واسطه بينهم وبين ربنا

ولماذا يحتاج الله الى واسطه فهو قريب اقرب الى الانسان من روحه

واذا سألك عبادى عنى فانى قريب

القرب ده بيتجلى فى ان الله لم يقل فقل لهم

حتى لاتكون هناك واسطه حتى بالكلمه

الشرك التانى بقى

الشرك الخفى

وده انك تعمل اى عمل وميكونش قصدك منه وجه الله

زى مثلا اللى يصلى ركعتين ويتقنهم اوى علشان واحد يشوفه ويقول يسلام على الصلاة

او تدى صدقه قدام الناس ويقولو شوفو الراجل السخى

عموما اى عمل تنتظر منه نظرة الناس ليك ده شرك خفى

وطبعا النيه هنا اللى بتحكم

فالخلاصه ان اخلاص التوحيد لله هو ان اى عمل دينى دنيوى اى حاجه

تعملها تعقد النيه انه لله وانك ترجو رضا الله من العمل ده

لو جت تذاكر اعقد نيتك انك بتذاكر علشان تتعلم علشان تنفع الناس علشان ترضى ربنا

ان حياتك كلها بتعيشها علشان ترضى الله فيها

ده معنى مركزية الله فى حياتى

_____________________

الايمان والعمل

الايمان والعمل زى الخٌلق والسلوك

يعنى لو شفت حد مؤدب

هو عنده خلق الادب

قيمه اترسغت فيه ادت انه يعامل الناس بالقيمه دى

العمل بدون ايمان

يعنى عادة اتعودت عليها

عمل اجوف بتنقصه الحقيقه

عمل هش ممكن اى شىء يضعفه

هضربلك مثال

لو بيت بيتبنى

اهم حاجه فيها الهيكل بتاعه الاساس و الاعمده والحديد

اللى تقدر تشيل باقى اضافات البيت

بس هو البيت ينفع يتسكن من غير حيطان وتشطيب ؟؟؟؟

لا طبعا

والبيت ممكن يتبنى من غير اساس وعمدان

بس بيت عمره قصير هش مكن يقع فى اى لحظة

فا الايمان والعمل متلازمان

امنت بالله يعنى عرفته معرفة بلغت حد اليقين

اسلمت لله اى خضعت لحكمه عن طواعيه وانقياد

فحقيقة الاسلام تتضمن اداء العبادات المطلوبه فهى تصديق بالله وتنفيذ لامره

وحقيقة الايمان تعنى المعرفة الصحيحة والقيام بحقوقها

_____________________________

كده انشاء الله هنبتدى الرحلة

اللى هتكون غايتنا فيها ان الله يكون مركزية حياتنا

مستنى ردودكم على الجزء اللى فات

موضوع: رد: الرحلة الأحد 26 يونيو 2011, 8:56 pm

بجد موضوع جميل ورائع

موضوع: رد: الرحلة الأحد 26 يونيو 2011, 9:19 pm

متابع وجزاك الله خيرا

وأود أن أضيف :

أن التوحيد ثلاثة أقسام :
1 ـ توحيد الالوهية
2 ـ توحيد الربوبية
3 ـ توحيد الاسماء والصفات

وهناك فرق بين المسلم والكافر والملحد في توجهه للتوحيد

فالمسلم مؤمن بالثلاثة ( الألوهية والربوبية والاسماء والصفات )
أما الكافر فهو مؤمن بتوحيد الربوبية فقط
أما الملحد فلا يؤمن بأي من الثلاثة

جزاكم الله خيرا استمر ونحن متابعون ان شاء الله .

موضوع: رد: الرحلة الثلاثاء 28 يونيو 2011, 8:06 am

شكرا للاستاذ احمد الشاعر
واتمنى المتابعة
ــــــــــــــــــــــــــــــــــــــــــــــــــ
استاذنا احمد هلول
شكرا على اضافتك الكريمة
وهو ده الغرض من الموضوع
المشاركة
واتمنى تتابعنى
وماتحرمنيش من اضافتك

موضوع: رد: الرحلة الثلاثاء 28 يونيو 2011, 8:18 am

الله الله اللله الموضوع يستحق المتابعة فعلا موضوع اكتر من رائع و ابتدا بأكتر جملة بحبها

كن عبدا ربانيا

موضوع: رد: الرحلة الثلاثاء 28 يونيو 2011, 9:01 am

احنا اتفقنا ان المعرفة بالله هتكون عن طريق 3 حاجات

1- اسماء الله وصفاته

2- مشاهدة اثار رحمته

3- الذكر

نبتدى باالاسماء والصفات

قال النبى صلى الله عليه وسلم

ان لله تسعة وتسعون اسما من احصاها دخل الجنة

صدق رسول الله صلى الله عليه وسلم

محور حديثنا الفترة الجايه هيكون عن اسماء الله وصفاته وايه اللى الاستفادة العملية منها

طيب يعنى ايه احصاها؟

مخلص قول العلماء فى احصاها

معرفة الاسم

معرفة معناه

العمل بمقتضاه

فا نبتدى باسم الله المَلِك

بسم الله الرحمن الرحيم

هو الله الذى لا اله الا هو الملك القدوس السلام المومن المهيمن العزيز الجبار

__________________

الملك الحقيقى هو الذى يستغى بصفاته وذاته عن كل موجود

فملْك الله هو الملك الحقيقى وما عاده فهو مُلْك زائل

والمُلْك هو القدرة على التصرف

فالملك عندنا الذى يحكم ولا يملك

والمالك الذى يملك ولا يحكم

الله هو مالك الملك هو الذى يملك ويحكم فيما يملكه بمايريد
________________________

الاستفادة العمليه من صفة الله الملك

سئل اعرابى لمن هذه الاغنام قال لله فى يدى

كل حاجه فى الدنيا عملك بيتك اولادك جسمك عقل وافكارك حتى هي ملك لله ولكن الله

اعطاك حق الانتفاع بيها

بس الحقيقة انك لاتملكها

بسم الله الرحمن الرحيم

رَبِّ قَدۡ ءَاتَيۡتَنِى مِنَ ٱلۡمُلۡكِ وَعَلَّمۡتَنِى مِن
تَأۡوِيلِ ٱلۡأَحَادِيثِ‌ۚ فَاطِرَ

ٱلسَّمَـٰوَٲتِ وَٱلۡأَرۡضِ أَنتَ
وَلِىِّۦ فِى ٱلدُّنۡيَا وَٱلۡأَخِرَةِ‌ۖ تَوَفَّنِى مُسۡلِمً۬ا
وَأَلۡحِقۡنِى بِٱلصَّـٰلِحِينَ

معنى تانى مهم فى حياتنا

انك تتصف بكلمة الملك

حينما تملك هوى نفسك ولايملكك هوى نفسك

فالله اتى سيدنا يوسف من الملك وده علشان قدر يملك نفسه امام امرأة العزيز

وهو ده الملك الحقيقى اللى تحتاجه

اعزرونى على الاختصار لان لسه فى 98 اسم وانشاء الله نحاول على قد ما نقدر

نتكلم فيهم حتى ولو بايجاز شديد

ولى عودة انشاء الله

موضوع: رد: الرحلة الثلاثاء 05 يوليو 2011, 5:35 pm

متابع وشاكرين على العرض الرائع

موضوع: رد: الرحلة الثلاثاء 05 يوليو 2011, 7:02 pm

والله اول مره اشوفه وبجد حلو جدااااااااااااااااااااا

لايك للصبح متابع

موضوع: رد: الرحلة السبت 16 يوليو 2011, 5:17 pm

[ندعوك للتسجيل في المنتدى أو التعريف بنفسك لمعاينة هذه الصورة]

اسم الله القدوس

اسم ربنا القدوس اتذكر فى القران مرتين

بِسۡمِ ٱللهِ ٱلرَّحۡمَـٰنِ ٱلرَّحِيمِ

يُسَبِّحُ لِلَّهِ مَا فِى ٱلسَّمَـٰوَٲتِ وَمَا فِى ٱلۡأَرۡضِ ٱلۡمَلِكِ ٱلۡقُدُّوسِ ٱلۡعَزِيزِ ٱلۡحَكِيمِ

سورة الجمعة

ـــــــــــــــــــــــــــــــــــــــــــــ

والاية التانيه كانت فى صورة الحشر

بِسۡمِ ٱللهِ ٱلرَّحۡمَـٰنِ ٱلرَّحِيمِ

هُوَ
ٱللَّهُ ٱلَّذِى لَآ إِلَـٰهَ إِلَّا هُوَ ٱلۡمَلِكُ ٱلۡقُدُّوسُ
ٱلسَّلَـٰمُ ٱلۡمُؤۡمِنُ ٱلۡمُهَيۡمِنُ

ٱلۡعَزِيزُ ٱلۡجَبَّارُ
ٱلۡمُتَڪَبِّرُ‌ۚ سُبۡحَـٰنَ ٱللَّهِ عَمَّا يُشۡرِڪُونَ

الجماعة بتوع اللغة بيقولوا ان قدوس جايه من القدس بمعنى الطهارة

والتقديس التطهير , وسيدنا جبريل اسمه الروح القدس لانه طاهر من العيوب فى تبليغ الوحى

طيب معنى اسم الله القدوس اى هو المنزه عن اى وصف من اوصاف الكمال

الانسان ببساطه كده لما ادرك نفسه ادرك ان فى كمالات وفى نواقص

يعنى مثلا شاف ان فى علم (كمال) وشاف ان فى جهل (نقص)

وشاف ان فى حلم (كمال)وشاف ان فى غضب (نقص)

وهكذا

وكمان ان ربنا سمح للانسان ان يتصف بصفاته

يعنى فى انسان رحيم بس مش زى رحمة الله

وانسان عليم مش زى علم الله

فلما الانسان ادرك الكمالات حب يثنى على الله بيها

فكان اسم الله القدوس

يعنى خد بالك اى كمال انته تتخيله ربنا مقدس ومنزه عنه

بِسۡمِ ٱللهِ ٱلرَّحۡمَـٰنِ ٱلرَّحِيمِ

لَيۡسَ كَمِثۡلِهِۦ شَىۡءٌ۬‌ۖ وَهُوَ ٱلسَّمِيعُ ٱلۡبَصِيرُ

على فكرة الله اكبر اللى بنسمعها فى الاذان خمس مرات فى اليوم

تقريبا 30 مره

احد معانيها

الله اكبر مما عرفت من كمال
.................

فى معنى تانى جميل لاسم الله القدوس

القدوس من تقدست عن الحاجات ذاته

وتقدس عن مكان يحيويه وعن زمان يبليه

وعزيز عن ان يرتقى الى تصويره وهم

او يطمع فى جواز تقديره فهم
ــــــــــــــــــــــــــــــــــــــــــــــــــــ

احنا قلنا قبل كده احصاء الاسماء هانفهم معناها

ونحاول نشوف ايه صفات من عرف صفات الله

وكمان اتصفنا بيها بيكون شكله ايه

فاول حاجه الانسان بيكون متصف بقدسية الله على قدره البشرى

بان يقدس نفسه عن كل ذنب

او يطهر نفسه من كل شىء يغضب القدوس

ودائما مستحضر قدسية الله فى قلبه ومستحضر ان الله يراه

فا ديما يكون فى المكان اللى ربنا يحب يشوفه فيه

ويعمل اللى يامره بيه ويبتعد عن اللى ينهاه عنه

كمان اتصاف الانسان بصفة الله القدوس على قدره البشرى

تعنى ان الانسان يقدس نفسه عن التذلل لغير الله

قريت مرة ان فى واحد سلم على النبى وحس بشرف

لمس النبى واستحضر بقلبه حب النبى صلى الله عليه وسلم

فكان من الراجل ده ان يقول والله لا امس بها شيئا غير شريف

ويقال ان الراجل ده عاش قوق الثمانين ما مسش بيمينه اى شيىء غير منزه حتى ذكره

طيب النفس اللى عبدت ربنا وعرفت اسمه القدوس هل ينفع انها تتزلل لحد غير القدوس

بنفسى المعنى ده قالت الملائكة لربنا

بِسۡمِ ٱللهِ ٱلرَّحۡمَـٰنِ ٱلرَّحِيمِ

وَإِذۡ
قَالَ رَبُّكَ لِلۡمَلَـٰٓٮِٕكَةِ إِنِّى جَاعِلٌ۬ فِى ٱلۡأَرۡضِ
خَلِيفَةً۬‌ۖ

قَالُوٓاْ أَتَجۡعَلُ فِي?َا مَن يُفۡسِدُ فِي?َا وَيَسۡفِكُ
ٱلدِّمَآءَ وَنَحۡنُ

نُسَبِّحُ بِحَمۡدِكَ وَنُقَدِّسُ لَكَ‌ۖ قَالَ
إِنِّىٓ أَعۡلَمُ مَا لَا تَعۡلَمُونَ

نقدس لك هنا معناها اننا مطهرين نفسنا كى تكون اهلا للاقبال عليك ولعبادتك

وكده خلصنا بحمد الله القدوس اسمه القدوس

والمرة الجاية مع اسمه الكريم السلام

موضوع: رد: الرحلة السبت 23 يوليو 2011, 8:04 am

[ندعوك للتسجيل في المنتدى أو التعريف بنفسك لمعاينة هذه الصورة]
معنى الاسم الكريم

اتقال فى معنى اسم الله السلام ثلاثة معانى

المعنى الاول

ماخوذ من السلامة زى الرضاع والرضاعة

والمعنى انه جل جلاله سلمت ذاته من كل عيب وصفاته من كل نقص

وافعاله من الشرور

المعنى التانى

انه ذو السلامة للانسان

بمعنى ان مافيش سلامه فى اى حاجه الا معزوه اليه

المعنى الثالث

انه الله يورث الامن والطمأنينه والسلامه لعباده

نشرح المعانى دى بصورة مبسطه

المعنى الاول ان سلامة ذات الله من العيوب وصفاته من النواقص وافعاله من الشرور

طيب لو اتقال ان العالم مليان شرور

حروب وظلم وكل انواع الشرور موجوده على الارض

طيب سؤال

لو عندنا حد عنده مثلا مشكله صحيه وتحتاج تدخل جراحى

يبقى مسكت المشرط وتقطيع الجسم دلوقتى شر

بالعكس فى غايه اعظم بس لازم هذه الغاية تتحقق بأسلوب معين

انته ممكن تنظر اليه على انه شر بس الحقيقه انه كله خير

وعلشان كده الله سلمت افعاله من الشر المطلق
ـــــــــــــــــــــــــــــــــــــــــــــــــــــــــــــــــــــ

المعنى التانى ذو السلامه للانسان ولعباده

بص كده فى نفسك على كم السلامات اللى موجود فى جسمك

مش هاقولك بص على الكون ولا على الارض ولا على السما ولا على اى حاجه تانيه

بص على النخاع الشوكى كده فين

فى قلب الفقرات تخيل لو كان ظاهر مش كان لو حد هرشلك بس فى ضهرك كان جالك شلل

هيا دية السلامه

بص العين موجوده فى تجويف يحميها من اى شى

شوف السلامه

مثال تانى عارفين نظام اى حركه فى الجسم بتكون ازاى

عن طريق الاعصاب فى نوعين من الاعصاب

لكل عضو واحد رايح للمخ وواحد جاى من المخ

afferent, efferent nerves

ودول اللى بينقلو الاشارات الكهربية من والى المخ

وبنقل الاشارات دى بتحصل الحركة

لو حصل لواحد مشكله فى المخ او اى حاجه عطلت الحكايه دى يحصل الشلل

الا عضو واحد

القلب لاهميته الله خلى الحركه بتعته منه هو ذاتيه Automaticity

من عقده بيسموها

نود S.A

والسلامه الاكبر ان لو حصل مشكله فى المكان اللى بتتولد منه كهربة القلب

بتتولد نقط او اماكن تانيه تطلع منها الكهرباء وتستمر الحركه

وهى دى السلامه

لو قعدنا نتكلم عن السلامه فى جسمنا هنقعد سنين والله بجد سنين

والناس الدكاترة اللى هنا معانا فى المنتدى عارفين الكلام ده كويس اوى

لو بصينا على السلامه فى الكون نفس الحكايه

ان الله يمسك السماء ان تقع على الارض الا بأذنه
ـــــــــــــــــــــــــــــــ
وجعلنا الجبال اوتادا

ــــــــــــــــــــــــــــــــــــــ
بص انته اطلق لعقلك العنان وفكر واستخدمه زى ماربنا امرك

وانته هتلاقى السلامه دى فى كل حاجه حواليك

وهيا دى الفايده من الكلام ده كله وهى دى اللى بنسميها اثار رحمت الله فى خلقه وفى كونه

بس نخليها لوقتها

المعنى الثالت

ان الله يورث الامن والطمأنينه والسلامه لعباده

بسم الله الرحمن الرحيم

الابذكر الله تطئن القلوب

صدق الله العظيم

فاسم الله السلام اذا ذكرته شعرت بالسلام

الاتصال بالله عن طريق الذكر واستحضار صفاته وعظمته وجلاله فى القلب

بينتقى العبد من الشرور والنواقص

ولوكان خائفا يعطيه الامن والسلام

كتبت قيل كده فى موضوع ان الطفل او مابيتولد بيبكى ويصرخ بيكون نتيجه انه عرف الحقيقه

فالحقيقة انى فى ثلاثة ايام من اصعب الايام على الانسان

يوم المولد

يوم الموت

ويوم البعث

تامل الايام دى وانت تعرف

يوم الميلاد هو يوم الخروج الى تلك الحقيقة حقيقة الوجود

ويوم الموت انتهاء فترة الاختبار

ويوم البعث هو بداية اعلان النتيجه

قتلاقى القران يقول حكاية على سيدنا يحى

بسم الله الرحمن الرحيم

وسلام عليه يوم ولد ويوم يموت ويوم يبعث حيا

صدق الله العظيم

خص السلام فى الايام دى لانها بتكون اكثر ايام محتاجه طمأنينه وسلام

التخلق بصفة الله السلام

فى كل معنى ليه تطبيقه

المعنى الاول

سلامة الله من العيوب والنواقص والشرور

نبص على الذنوب والمعاصى على انها عيوب ونواقص ونتخلق بصفة الله السلام

ونسلم انفسنا منها

وكمان يسلم الناس من شرورنا

قال النبى صلى الله عليه وسلم

المسلم من سلم المسلمون من لسانه ويده

المعنى التانى

ان سلامة الانسان معزوه الى الله

دائما تعزو كل سلامه الى الله

سلامة الجسد الى الله

سلامة العقل الى الله

حاول تعرف ايه السلامات اللى حواليك وتفكر فيها واعزوها الى الله

المعنى الثالث

لو احتجت الى الطمأنينه اوحسيت بخوف وقلق

جرب واذكر الله

وشوف ايه اللى هايحصل

ـــــــــــــــــــــــــــــــــــــــــ

اللهم انت السلام ومنك السلام تباركت ياذا الجلال والاكرام

موضوع: رد: الرحلة السبت 23 يوليو 2011, 9:08 am

الله
والله لم اجد من الكلمات ما اعبر به عن اعجابى بالموضوع وروعته
جزاك الله خيرا وجعله فى ميزان حسناتك ان شاء الله

» تغطية الرحلة الثانية لمدينة الانتاج الاعلامى