دبلة عيار 18

موضوع: دبلة عيار 18 الخميس 08 سبتمبر 2011, 1:37 pm

مسير البنت للجواز ،، جملة قالوها جداتنا زمان ومصدقوا البنات مسكوا فيها بإديهم واسنانهم لدرجة إنهم بيحلموا

بالفستان الأبيض والعريس الحليوة والدبلة يمكن من وهما فى الروضة وكل ده بنقول طبيعى وعادى وميضرش

ويمكن بحس إن معظم البنات همها الأول والوحيد وقضيتها فى الحياة هى مسألة العريس والخطوبة أو الجواز

ويمكن هزودها شويه وأقول همها الوحيد تبقى فى إديها دبله مش مهم اللى قبلها ولا مهم اللى بعدها

لبس فستان الخطوبة أو الزفاف والدبلة فى حد ذاتهم هدف وغاية وده يمكن الشى الغريب

ولما بتوصل البنت لمرحلة معينة بيتقدملها العرسان وتقعد امها وخلاتها يزنوا عليها ببعض العبارت الشهيرة جدا:

البنت مسيرها للجواز

خدى اللى بيحبك

البنت ليها زهوة

اللى أصغر منك معاهم عيال

الرجالة مبيتنقوش يا بنتى

ولما بيحصل النصيب وييجى يوم الخطوبة اللى يمكن بيبقى يوم النم العالمى المجنى عليه ،، قصدى العريس

بييجى مع أهله فرحان بشبابه علشان يخطب ست الحسن والجمال ويدى صابونه للشاطر حسن

وأكبر ملحوظة فى الليلة كلها هى صحبات العروسة والبنات اللى جايين مع العريس

نظرات من تحت لتحت ،،، همهمات ،،، ضحكات صفرا والغريب إن محدش بيسلم من الكلام

حتى الغلبانة اللى قاعدة فى الكوشة ولا كليوباترا فى عزها أيام ما كان الكابتن أنطونيو جاى يطلب إيدها

والموقف اللى أنا دايما بتخيلوا فى أى فرح هو منظر صحبات العروسة اللى أساسا فى الغالب حاقدين جدا عليها

وقلبهم تدخلوا بلمبة تلاقيهم بيبتسموا ويقولوا : مبروك يا حبيبتى والله فرحنالك أوى !!

ومن جواهم : يارب تنشكى فى قلبك الهى وانت جاهى متمش يا بعيدة

وده يمكن لأن النفسنة عالية شويه فى كرات الدم الحمرا اللى عند البنات أو يمكن طبع أو يمكن فطرة الله أعلم

وخد تريقة بقى لغاية بكرة : (العريس سمين لألألأ العروسة هبلة لألألأ العريس دمه تقيل أوى

لألألألأ العروسة عنيها الشمال بتحول لألألأ العريس بيضحك كتير هو عبيط ولا إيه

لألألألأ العروسة كئيبة أوى هى مغصوبة ع الموضوع ؟

لألألأ العريس قصيرة وقزعة لألألأ العروسة مكياجها بيئة أوى لألأ العريس ..............) بصراحة لا تعليق

وبعد ليلة الخطوبة بتحس العروسة إنها حيزت لها الدنيا بحزافيرها وبتبدأ علاقتها بالدبلة تتوطد لدرجة يمكن أكبر

من علاقة الأخوان وحزب الوفد اليومين دول ،، وبتبدأ تظهرها فى كل وقت وبقصد وبدون قصد

وقلبها بيرفرف من جوا (الحمد لله اتخطبت ،،، يــس ....يـــس ) ومحاولاتها دى لإظهار دبلتها

أقوى بكتير من محاولات المصريين بعد الثورة إظهار علم مصر على كل حاجة حتى الكلينكس بعد كده

تبدأ رحلتها بقى مع اختيار شكل الشقة والديكورات

والعفش وفستان الفرح والقاعة اللى هيتعمل فيها الفرح والموضات بتاعة المكياج ولفات الطرح

المهم إنها بتبذل قصارى جهدها وجهد العريس وأهله وجهد البيت وجهد الجيران

وجهد العيشة واللى عايشنها وتفضل تدعى ربنا إن فرحها يبقى أنقح من فرح (الملك وليام)

وعروسته العسولة (كيت) ربنا يعوض عليهم يارب

أكيد الجواز سنة من سنن الله فى الأرض ومن أهم أسس استمرارية الحياة ياريت نفهم ده كويس

ونتأكد إن الدبلة مش هى الهدف فى حد ذاتها دى حتة دبلة لا راحت ولا جت الأهم الحياة فيما بعد الدبلة دى

نهايته ربنا يزوج كل البنات يارب ،،، قولوا آمين

أولآ كده مســاء الفل ..

نيجي بقي للموضوع .. الموضوع فعلآ مهم جدااا والله ياحنين ..

فعلا بنات كتير جداا اليومين دول همها الأول والأخير

لبس دبلة حتي لو كانت صفيح مش مشكلة اللي هيلبسهالها ده يبقي إيه ..

المهم إنها مفكرة لو لبست دبلة هايدوها جايزة أوسكار مثلآ ..

حاجة غريبة جدااا نابع من فكر أغرب مش عارفة ده نتيجته إيه أصلآ بأمانة أو كان من إيه ..

إحنا مش في لبس الدبلة إحنا فيما بعد الخطوبة والجواز .. هو ده المهم ..

وفي الآخر ربنا يسعد بناتنا .. [ندعوك للتسجيل في المنتدى أو التعريف بنفسك لمعاينة هذه الصورة]

هههههه

موضوع جميل جدا والله

يمكن انا معرفش هل الكلام اللى حضرتك ذكرتيه صح ولا لاء

ولكن عند حضرتك حق

اقتباس :: أكيد الجواز سنة من سنن الله فى الأرض ومن أهم أسس استمرارية الحياة ياريت نفهم ده كويس

ونتأكد إن الدبلة مش هى الهدف فى حد ذاتها دى حتة دبلة لا راحت ولا جت الأهم الحياة فيما بعد الدبلة دى

ربنا يسعد كل الناس يارب ويتم لكل المخطوبين على خير

ويرزق اللى لسه بالازواج الصالحه

واتمنى ان الناس تفهم فعلا معنى الحياه

و الله يا حنون انا بحيكي بجد على اسلوبك معرفش بتجيبى الكلام ده منين [ندعوك للتسجيل في المنتدى أو التعريف بنفسك لمعاينة هذه الصورة]

اقتباس :: من علاقة الأخوان وحزب الوفد اليومين دول

تأثر الكاتبة حنين بالحياة السياسية فى مصر [ندعوك للتسجيل في المنتدى أو التعريف بنفسك لمعاينة هذه الصورة]

بس هو يا حنين البنات فيهم كمية الحقد دي كلها فعلا ؟ !

و بالنسبة للهدف الاساسي للموضوع فالبنات بيلبسوا الدبلة و أكنهم كده وصلوا للهدف السامي

و بعد كده كل يوم و التانى بتخلعها

متعرفيش بقى عدم تحمل مسؤلية و لا بتبقى و اسعة عليهم [ندعوك للتسجيل في المنتدى أو التعريف بنفسك لمعاينة هذه الصورة]

هههههههههههههه
مش عارفه أقولك حاجه يا حنين
لآن كل اللى قولتيه مظبوط
إلا حته النفسنه دى متهيألى مش موجوده فى كل البنات أو أنا شخصيا
معرفش حد بينفسن أوى
وجايز جدا يكونوا بينفسنوا وأنا عبيطه ومش باخد بالى ههههههههه
على العموم ربنا يسعد كل الناس يارب
كل اللى متجوزش يتجوز
واللى متجوز ربنا يرزقه بالذريه الصالحه
واللى معاه ذريه صالحه ربنا يباركله فيهم ويربيهم تربيه كويسه تدخله الجنه

على فكره مش مهم شكل الدبله ولا عيارها (المهم اللى لابسه الدبله واللى ملبسهالها)

أسيرة الأحلام كتب:: أولآ كده مســاء الفل ..

نيجي بقي للموضوع .. الموضوع فعلآ مهم جدااا والله ياحنين ..

فعلا بنات كتير جداا اليومين دول همها الأول والأخير

لبس دبلة حتي لو كانت صفيح مش مشكلة اللي هيلبسهالها ده يبقي إيه ..

المهم إنها مفكرة لو لبست دبلة هايدوها جايزة أوسكار مثلآ ..

حاجة غريبة جدااا نابع من فكر أغرب مش عارفة ده نتيجته إيه أصلآ بأمانة أو كان من إيه ..

إحنا مش في لبس الدبلة إحنا فيما بعد الخطوبة والجواز .. هو ده المهم ..

وفي الآخر ربنا يسعد بناتنا .. [ندعوك للتسجيل في المنتدى أو التعريف بنفسك لمعاينة هذه الصورة]

آمين

وعلى رأى سعد الصغير يارب كل البنات تتجوز :)))

شكرا على مرورك يا أسيرة

ابو حذيفه السلفى كتب:

هههههه

موضوع جميل جدا والله

يمكن انا معرفش هل الكلام اللى حضرتك ذكرتيه صح ولا لاء

ولكن عند حضرتك حق

اقتباس :: أكيد الجواز سنة من سنن الله فى الأرض ومن أهم أسس استمرارية الحياة ياريت نفهم ده كويس

ونتأكد إن الدبلة مش هى الهدف فى حد ذاتها دى حتة دبلة لا راحت ولا جت الأهم الحياة فيما بعد الدبلة دى

ربنا يسعد كل الناس يارب ويتم لكل المخطوبين على خير

ويرزق اللى لسه بالازواج الصالحه

واتمنى ان الناس تفهم فعلا معنى الحياه

يارب

وعلى فكرة الكلام اللى انا قولته تقريبا بيحصل فعلا

لكن مش كل الناس بقى فيه ناس برضه قلبها أبيض

شكرا لمرورك أ / أبو حذيفة

نور الإسلام كتب:

و الله يا حنون انا بحيكي بجد على اسلوبك معرفش بتجيبى الكلام ده منين [ندعوك للتسجيل في المنتدى أو التعريف بنفسك لمعاينة هذه الصورة]

اقتباس :: من علاقة الأخوان وحزب الوفد اليومين دول

تأثر الكاتبة حنين بالحياة السياسية فى مصر [ندعوك للتسجيل في المنتدى أو التعريف بنفسك لمعاينة هذه الصورة]

بس هو يا حنين البنات فيهم كمية الحقد دي كلها فعلا ؟ !

و بالنسبة للهدف الاساسي للموضوع فالبنات بيلبسوا الدبلة و أكنهم كده وصلوا للهدف السامي

و بعد كده كل يوم و التانى بتخلعها

متعرفيش بقى عدم تحمل مسؤلية و لا بتبقى و اسعة عليهم [ندعوك للتسجيل في المنتدى أو التعريف بنفسك لمعاينة هذه الصورة]

أعتقد إنها بتكون واسعة عليهم فعلا يا نور فبتسقط سهواً [ندعوك للتسجيل في المنتدى أو التعريف بنفسك لمعاينة هذه الصورة]

شكرا على مرورك الجميل يا جميل

دهب كتب:: هههههههههههههه
مش عارفه أقولك حاجه يا حنين
لآن كل اللى قولتيه مظبوط
إلا حته النفسنه دى متهيألى مش موجوده فى كل البنات أو أنا شخصيا
معرفش حد بينفسن أوى
وجايز جدا يكونوا بينفسنوا وأنا عبيطه ومش باخد بالى ههههههههه
على العموم ربنا يسعد كل الناس يارب
كل اللى متجوزش يتجوز
واللى متجوز ربنا يرزقه بالذريه الصالحه
واللى معاه ذريه صالحه ربنا يباركله فيهم ويربيهم تربيه كويسه تدخله الجنه

على فكره مش مهم شكل الدبله ولا عيارها (المهم اللى لابسه الدبله واللى ملبسهالها)

لأ يا دهب ،، النفسنة فعلا بين البنات عالية حبتين بس إنتى اللى طيبة يا أوختى [ندعوك للتسجيل في المنتدى أو التعريف بنفسك لمعاينة هذه الصورة]

بس عادى بقى و ربنا يسعد كل الناس

كالعادة موضوع مدموغ بخفة الدم الحنينة.. لذا تتخرج مواضيعها بطابع السخريرة المريرة .. واحسنت انها وضعته فى الصالون الثقافى وليس السرد القصصى ..فبعد تلك التجارب الادبية الحنينة (الشعب يريد الصياغة)وخسبما لوتم دمغ الدبلة عيار 24 بالاسس الصحيحةلاختيار شريك العمر باسلوب ساخر ايضا.. وآسف على الاطالة

موضوع: رد: دبلة عيار 18 السبت 17 سبتمبر 2011, 9:17 am

السيد سعيد علام كتب:: كالعادة موضوع مدموغ بخفة الدم الحنينة.. لذا تتخرج مواضيعها بطابع السخريرة المريرة .. واحسنت انها وضعته فى الصالون الثقافى وليس السرد القصصى ..فبعد تلك التجارب الادبية الحنينة (الشعب يريد الصياغة)وخسبما لوتم دمغ الدبلة عيار 24 بالاسس الصحيحةلاختيار شريك العمر باسلوب ساخر ايضا.. وآسف على الاطالة

شكرا على المرور الجميل المشجع يا أستاذ سيد دايما بتعلم منك والله

وإن شاء الله نجود فى اللى جاى

وكل سنة وأنتم طيبين

موضوع: رد: دبلة عيار 18 السبت 17 سبتمبر 2011, 8:19 pm

دانتى عليكى مواضيع مصيبه
بس والله انا يوم خطوبتك كنت فرحانه لك
رغم انى مكنتش لسا اتخطبت
ورغم انى محضرتش الخطوبه بس كان نفسى
احضر وفرحتلك وربنا
بس برافو على مواضيعك الجامدة

موضوع: رد: دبلة عيار 18 السبت 17 سبتمبر 2011, 8:22 pm

ام ندى كتب:: دانتى عليكى مواضيع مصيبه
بس والله انا يوم خطوبتك كنت فرحانه لك
رغم انى مكنتش لسا اتخطبت
ورغم انى محضرتش الخطوبه بس كان نفسى
احضر وفرحتلك وربنا
بس برافو على مواضيعك الجامدة

مبروك الخطوبة

وربنا يسعدك إن شاء الله يا أم ندى

» عيار الشعب فلت يا ريس
» موقف طريف . وحكم دبلة الخطوبه للشيخ ابى اسحاق الحوينى