الجنيه غلب الكارنيه !!

عزيزى القارىء عزيزتى القارئة بنمسى عليك طبعا كلنا يمكن اعتراضنا

وأنا كنت أول المعترضين على مسألة إن أجرة بنها

ترفع ربع جنيه بحاله وتوصل لجنيه ( صحيح) حتة واحدة ويمكن لأنى رؤيتى فى أحيان كتير جدا بتبقى محدودة للامور

معرفتش إن أجرة بنها لما تبقى جنيه الدنيا هتتغير أوى كده للأحسن ،،،، من ساعة أجرة بنها ما بقت جنيه يا جماعة

كل حاجة فى حياتنا أتغيرت بجد ،، يعنى مثلاً أم كلثوم رجعت تغنى تانى الصبح

على إذاعة الشرق الأوسط "يا صباح الخير ياللى معانا"

عمى " الحاج" بتاع الطابونة مبقاش يسرق فى العيش وبقى يكبر الرغيف ويخليه حلو !!

بخلاف إنى الوحدة المحلية بعتت شجر يتزرع وسمعنا

كلمة " تشجير فى بلدنا أخيراً ، لأ واللى أكتر من كده المية بقت تيجى قوية

لدرجة إنها بتوصلنا فى " الدور الأول " تخيلوا !؟

ده كله بقى كوم والتغيير العنيف فى سلوك " سائقى بنها" كوم لوحده

بجد بجد حاجة غريبة أنا أتصدمت فى مشاعرى من اللى شوفته لما

رجعت أسافر تانى بعد الأجازة ،،،، لك أن تتخيل عزيزى القارىء معى هذه النقاط :

1- قبل الجنيه لما كان حد مغضوب عليه وحظه العثر يرميه ورا فى الكنبة الأخيرة كان بيشوف النجوم

فى وضح النهار السواق يفضل يرص يرص يرص على أساس إننا قوالب طوب مثلاً ولو حد أعترض يبقى الرد:

"والله هو كده واللى مش عاجبه ينزل فى اليوم ال............ ده"

** بعد الجنيه عمو السواق مستحيل ومن خامس المستحيلات يسمح لوجود أكتر من 3 أنفار فى الكنبة الأخيرة

حتى لو هما راضيين ويقولك :

" لألأ يا جماعة أنا عاوزكم تقعدوا براحتكم متزنقوش نفسكم المهم تبقوا مرتاحين " وشويه شويه هنسمع عبد الحليم بيغنى

2- قبل الجنيه كانت لما واحدة ست من اللى بياخدوا خضار

أو فاكهة يبعوها فى بنها أو العكس تقوله طلعلى الشيلة بتاعتى فوق العربية

بتشوف الأمرين وتسمع مما تكره ويبقى السواق نفسه يحط السيخ المحمى فى صرصور ودنها وبيبقى الرد:

" الشغلانة السودا دى مش جايبة همها يا ستى الشبكة مبتستحملش ولو الشيلة وقعت فى السكة هتقرفوا أبونا "

**بعد الجنيه بنلاقى الرد :

"على عينى يا حجة إنتى تؤمرى ربنا يرزقك ويسهلهالك ده الجرى ع المعايش حلال " وفى ثانية تلاقيه فوق شبكة العربية

بيظبطلها الشيلة ولا " سبيدر مان " فى زمانه وناقص يروح يبيع معاها فى السوق كمان ،،، سبحان من يغير ولا يتغير

3- قبل الجنيه : الكاسيت كان بيبقى شغال على آخر درجة فى الصوت وأغانى بقى من اللى هى معمولة مخصوص

للإضرار "بالإذن الوسطى" ولو حد بس فكر يقوله وطى الكاسيت شويه يا اسطى يبقى الرد :

" والله لو كان عاجب واللى مش عاجبه ينزل من العربية "

يلى هذا الرد مجموعة من الألفاظ الجميلة اللى كلنا بنسمعها دايماً ومفيش داعى لذكرها

** بعد الجنيه : لو حد قال للسواق وطى الكاسيت يقولك :

" عينى يا أبا "وبيبقى بيسابق الزمن وحركة إيده أسرع من الصوت

علشان يوطى الكاسيت بسرعة قبل ما الراكب يكمل كلامه لدرجة

إنك تحس إنه نفسه وقتها يلاقى مفك فى إيده يشيل بيه الكاسيت

ويرميه على آخر دراعه فى البحر علشان ميزعجش الركاب .يا سلاااااااااااااااام الله عليك يا حبيب والديك

4- قبل الجنيه مكناش بنشوف غير العربيات اللى تحس إن واكلها قطر قبل كده مش أقل من خمس مرات

يعنى مفيش إزاز ولا كراسى ولا مقابض للبيبان ولا فيه بيبان أصلا ولا فيها أحيانا حتى عجل أو سواق !!

** بعد الجنيه بقينا نشوف عربيات تويوتا فارهه من اللى

فيها كراسى حلوة دى وليها باب والغريب إن فيها إزاز وبتمشى كمان

من غير ما دماغك يخبط فى السقف " سبحان الله" العلم اتقدم يا ولاد !!

5- قبل الجنيه كانت معاملة السواقين لينا

شبه معاملة الأعيان للحرافيش فى سلسلة نجيب محفوظ وبالأخص عاشور الناجى

أو شبه معاملة الباشاوات لأحمد عبد العزيز فى مسلسل " الوسية " شخط نطر إهانة توبيخ استغلال ذل وهوان وممكن _ ضرب _

** بعد الجنيه المعاملة بقت "سفن ستارز" بجد رقة وأخلاق وذوق وجنتله وجدعنة وابتسامة رقيقة وصوت هادى

لدرجة إنى وأنا راكبة العربية ببقى حاسه إنى شويه وهلاقى مضيفة معدية تقولى :

" أربطى الحزام يا فندم علشان إحنا وصلنا بنها حمد لله على السلامة "

هتسألونى إيه اللى حصل علشان التغيير المفاجىء ده ،، هقولكم معرفش ومعنديش تبرير غير إن

من ساعة ما الجنيه ظهر والدنيا لها طعم جديد

أنا حاسة كمان إن من ساعة ما الأجرة وصلت جنيه لبنها أمى مبقتش تزعقلى كل يوم ،،، لأ بقت تزعقلى يوم ويوم بس

أنا خايفة بكرة أمشى ألاقى الناس فى الشارع لا قدر الله مبتسمة لبعضها وقلوبهم صافية ولا حاجة

ده الواحد كده يتوه بجد !!

،،،،،،،،،،،،،،،،،،،،،،،،،،

موضوع جميل و لذيذ كالعادة

و أكيد كمان من بعد الجنيه إتشال من قاموس السواقين حاجة اسمها الفلتر

بس خلي بالك إن النعمة دي مش بتدوم كام يوم كده لحد ما يتأكدوا من إن الأمن مستتب و الجنيه بقى ماركة مسجلة و بعدها ترجع ريما لعادتها القديمة بس خلينا متفائلين و فرحانين و نعيشلنا يومين