ملامح

وشايله ملامحى
وطرحك ف قمحى
غريب وسط دارك
وشهدى ف مرارك
وبهجر شطوطك
أعود لك تسامحى
لإن ملامحك
بتسكن ملامحى
تهون ليالي شقايا الطويلة
وبرسم ف وشك
على صفحة بيضا
جدايل خميلة
وأبدر أمانى بعرقى وكدى
ورغم إنى عايش
ف ضلك وحضنك
دموعك بتطرح
قصايد ف خدى
وكام ليل يعدي
يقول اللى جوه ف بطنك
مش إبنى
برغم إنى ظاهر
ف روحه وملامحه
ورغم إنى عارف
أصول بذر قمحه
وكل اللى ناكر بإنى أبوه
أنا برضه راضى
جحوده ومسامحه
لإنى وهبته لكل المداين
وبكره هيبقالى
غيره جناين
وفايته وملامحه
تشاور عليا
تقول إنى أصله
وبعد الشقى اللى قاسيته ليالى
ف حلمى بوصله
أنا فايته مادنه
ومصنع وكوبري
وميت ألف مبنى
بينطح سحابك
ورغم إنى واقف
سنيني ببابك
عشان يفتكرنى
بينسي أبوه
وليه اللى داقوا حلاوته وشهده
بيستاءوا منى
وليه ينكروه
أنا اللى حضنته
ف بكره وحضانته
وليه تنكريني
دا أنا كل أملى
إعتراف منك إنتى
بإنى أبوه
وإن اللى جاى موسمه بعد بكره
هيبقى أخوه
أنا اللى رسمتك
ف قلبى خضار
سنابل بتملى شقوق البوار
وبحصد ف حلمى
برغم إنكساره
وعاشق ف ألمك
وعارف مساره
وبرسم لوشك جناين هنا
بتطرح منى
وأفضل أجيرك
ووسط المآسى
أنا اللى أجيرك
وتسهر عيونى
بتبكي عليكى
ولساكى مش عارفة
مين الصديق؟
وليه إبنى نسبه بيبقى لغيري ؟
ويجحد مشاعرى
وإمتى هيرجع لبستاني طيري ؟
يحلق على خضرة
مد البصر
ويسكن أعالى
فروح الشجر
ويطرح مطر
يغرق شقوقك بميه وندى
تعود المواسم
ف ثغري اللى باسم
وترجع ولادى
ف حضنى خضار
وتفضل ملامحى
وتطرح ف قمحى
وأحضن شطوطك
أقابلك تسامحى
لإن ملامحك
بتسكن ملامحي

كلام جامد يا استاذ سمير تسلم كتاباتك

عود حميد شاعرنا الجميل سمير جلال

موسيقاك لا تخطأها الآذان

وعذوبة لفظك ,,قد اشتقنا لها

قصيدة ملحمية جميلة

وحس وطني راسخ فى كلماتك

تحياتي لك