إسلام
نائب المدير العام
عدد الرسائل : 2667
الحالة : متزوج
تاريخ التسجيل : 09/03/2007
التـقــييــم : 12
 |  موضوع: كتابات ما قبل الثورة  الأحد 04 مارس 2012, 5:44 pm | |
| مـافـيـــا
مش فيلم للسقا و لا ضرب نار و حروب
دي حكومة مش فاهمة أبسط حقوق الشعوب
و الشعب أهو ساكت..حاطط في نفسه و على أمره مغلوب
ده شعب متمصمص و متبهدل و منهوب
الخوف ملازم قلوبهم..بقى أمر واقع و صعب منه الهروب
طوابير كتير في حياتهم تعمي العقول و القلوب
و الدنيا فعلا تلاهي..واتلهي يا شعبي يا منكوب
معظم شبابنا النهاردة بيحوش علشان يجيب دبدوب
ما هو لازم في عيد الحب يكون يا ناس حبوب
مترصصين عالقهاوي و عندك واحد سحلب و كمان معاه خروب
و الشيشة و الطاولة بين الشباب شيء عادي و محبوب
أهو وقت بنضيعه بدل ارتكاب الذنوب
و البانجو و الكيف..ما هو التوهان بقى بردو كمان مرغوب
و العيش بقى بطوابير وأهي الأنابيب بقت عايزة صبر أيوب
إرهاب عقول..تجويع بطون..تنضيف جيوب
قانون طواريء..نهب في ضرايب..وهيفضل المواطن على قفاه مضروب
يتحكم في عيشته ابن عز و كله تحت الترابيزة ملعوب
أنا هتكتم..دي بلاوي..لو قولتها على راسي هاخد بالجزمة و المركوب
حمار مصري محدود الدخل
حمار و ماشي مدلدل ودنه كالعاده
بيجر عربية حمولتها يجي طن و زياده
غلبان يا عيني متكتف و مسلوب الإراده
لا عمره اشتكى و لا قال للدنيا كفياكي بزياده
ماشي في الدنيا و همومه على كتفه متشالة
لا بيده حيلة و لا يقدر يقول لأ مش راضي بالحاله
الشقا من نصيبه و لا عمره يوم هيرضى يعيش عواله
و لا يقدر يصرخ في مرة و يقول لصاحبه خلاص هقدم استقاله
وأهي ماشية و بكرة تتعدل
قال يعني في يوم هيصحى يلاقي نفسه متبدل
و يبص في مرايته يلاقي أسد أو حصان
مش حتة حمار كحيان
خليك كده يا حمار و عيش
هيجي يوم تطلع معاش و مفيش
مليم معاك يجيبلك و لا حتى رغيف العيش
ماهو لو مكنتش تسعى في شبابك
هتسعى إمتى وانت يا غلبان ضيعت كل ولادك
اللي اتقتل قدام عنيك
و اللي اتخطف من بين إيديك
واللي اتسجن من غير قضاه و لا محكمه
واللي خلاص صابه العمى من كتر ضربه على الأفا
خلص الكلام و حسن الختام هنقولها كلمة صغيره
آن الأوان تصرخ كمان و تقول كفاية ذل و هوان
أيوة كفاية ذل و هوان
عواد باع وطنه
بص فـ مرة لحاله و حالي و قال وانا مالي
تخرب تولع تضرب تقلب خليني فـ حالي
دي بلد بايظه و فيها الميه ما بتطلع فـ العالي
ما هي مش ناقصة ضغط و سكر و كفاية اللي جرالي
قلت أنا همشي جنب الحيط و هربي عيالي
قاموا خدوني مـ الدار للنار و لا كان على بالي
قلت أنا ايه ذنبي بس يا عالم؟ ردوا و قالوا ساكن جنبك واحد إخواني
وانت أكيد كلمته امبارح و اليوم لازم نقرص ودنك علشان بكرة على نفسك هتكون الجاني
جريت على بيتي لملمت هدومي و حالي و محتالي و ديلي في سناني
سيبت الحتة و عزلت و غيرت مكاني و عنواني
بعد ده كله و جاي بتقولي وطني و أرضي و التغيير و أشارك و ما كونش أناني؟
لأ معلش أنا هبعد خالص و هسيب وطني و أرضي و أهلي و هروح أكمل في مكان تاني
أنا مهموم
و همي في قلبي واجعني وخانقني ماهو أصله وجع مكتوم
و الصرخة في جوفي محبوسة بتشكي لوطن ملجوم
منهوبة خيراته و متباعة و بالحديد و النار محكوم
و شعبه مقهور و متبهدل و من أبسط الحقوق محروم
أنا ببكي على انتخابات بتتاخد بضرب النار و السنج و الشوم
ووزير يسيب الوزارة و يمسك وزارة تانية في نفس اليوم
و كأنها وسية أو تكية و فيها المناصب لازم تدوم
فيها الكراسي ما بتتخلعش غير بعد الحصول على لقب مرحوم
فيها الفقير يموت مـ الجوع ما هو طبعا طالما الباشا عنه ملخوم
سايب الوسية للحرامية زي الديابة عالفريسة بتحوم
تنهش في لحم الغلابة أو تخدر بشوية كلام مسموم
ما هو شعبي بردو ليه عوزة و بينفع وقت اللزوم
وقت ما يقولوا ده فكر جديد و فيه حرية و وجوههم الحقيقية مخفية و كله متخطط و باحترافية مرسوم
و الطعم مبلوع و مهضوم و اهو كله غرقان في العسل و النوم
و الكل بيقول وانا مالي أنا في حالي و اللي تشوفه العين أكيد عالجبين مقسوم
ووطني بقى حزب يحكم و يتحكم و يلم و يكوش ووجوده بقى شيء محسوم
و عز بقى في الوسية حاميها حراميها ما هي الوسية بالمحسوبية و محدش لا يقدر يعاتب و لا يلوم
تلوم على مين يا مسكين ده انت جربت في مرة تعتصم و قلت أنا كمان عن الأكل هصوم
قالولك اخبط في أقرب حيطة راسك و في الآخر ضربوك في يوم مشئوم
ده بعد طبعا ما وقفت عريان في شارع الاعتصامات من غير الهدوم
أهو النهاردة الباشا بيقولك عن الوسية أنا هتنازل و ياريت ماشوفش لابني أي خصوم
بيتهيألي هصحى في يوم هلاقي عاصمتنا بقت شبين الكوم | |
|
KAREM
مشرف عام
عدد الرسائل : 2607
العمر : 35
المكان : ستاد القاهره
الحالة : سلـــــــــيم
الهواية : كرة القدم.البنج بونج.الشعر.المسرح.
تاريخ التسجيل : 02/04/2010
التـقــييــم : 6
| | موضوع: رد: كتابات ما قبل الثورة الأحد 04 مارس 2012, 9:29 pm | |
| الله على التحليل الممتاز يا استاذ اسلام والبساطه المتناهيه | |
|
أحمد عبدالعزيز
شــاعـر عمـاري
عدد الرسائل : 3616
العمر : 42
المكان : أبوظبي
الحالة : متزوج
الهواية : الشعر والأدب
تاريخ التسجيل : 30/09/2008
التـقــييــم : 16
| | موضوع: رد: كتابات ما قبل الثورة الإثنين 05 مارس 2012, 2:40 pm | |
| ابعت يا عم اسلام ... منتظرين اعمالك ,,,
| |
|
