24 ساعة

موضوع: 24 ساعة السبت 07 مايو 2011, 10:10 pm

الحقيقة ان لما كنت بحضر محاضرات فى التنمية البشرية

وتطوير الذات كنت بعانى من مشكلة واحدة

اللى هيا مشكلة التطبيق

طول ما انته فى المحاضرة بتحس بطاقة خرافيه تحس انك هاتهد الدنيا وتبنيها

وتخرج وانته ناوى بالظبط كلها اسبوع او اتنين بالكتير وتبقى بيل جيتس

او مارك زوكربيرج

وطبعا كلها 3 ساعات وكأنك ولا سمعت حاجه

كل اللى فاكره الافيهات بتاعت ابراهيم الفقى

عموما هابتدى معاكم سلسلة عن نقتطين مش اكتر

لانى بصراحة دول اللى اقدر اتكلم فيهم باسلوب علمى وتطبيقى سهل

وهما دول اللى اتعودت اتكلم فيهم

النقطة الاولى

تحديد الاهداف والتخطيط ليها

التانية

الوقت وتنظيمه

وانشاء الله هاتكلم فيهم فى خطين متوازين

راجعلكم

موضوع: رد: 24 ساعة السبت 07 مايو 2011, 10:41 pm

ربنا لما خلق البشر شىء واحد ربنا قسمه على البشر بالتساوى

مافيش حد بياخد اكتر من حد

الشىء الواحد ده هو

الوقت

ايوه الوقت كل واحد بيصح الصبح ياخد فى ايده 24 ساعة

ودى الميزة

عم عبده بياخد 24 ساعة وبيل جيتس بياخد برضه 24 ساعه

بس فى فرق بين اللى بيستغل وقته واللى بيضيع وقته

كل دقيقة ليها تمن وتمن كبير جدا

وده باين بصورة زى الشمس فى حديثه صلى الله عليه وسلم

نعمتان مغبون فيهما كثير من الناس الصحة والفراغ

فابتدى تتصرف على ان اغلى ماتملكه هو الوقت

ويمكن ده السبب الى خلانى اسمى الموضوع 24 ساعه

...................

نخش بعد كده على الاهداف

اهدافك لازم تكون

SMART

S=specific يعنى محددة

يعنى تبقى عارف انته عاوز ايه وده من المعطيات اللى عندك

M=measurable يعنى قابلة للقياس

يعنى يكون مثلا حد سبقه للهدف ده علشان تقدر تحدد الاليات اللى تقدر توصل بيها

A=achievable قابل للتحقيق

يعنى ماتجيش تقولى هاعمل مليون جنيه فى اسبوع واحد

R=realistic معقول

يعنى مافيش حد تكون رايحه منه ويقول انا هدفى انى اجيب لبن العصفور

T=time bounded متحدد بزمن معين

يعنى انته هدفك انك تتعلم انجليزى ,لازم تحدده بزمن علشان تقدر تقيس نتايجك

بكرة انشاء الله هاقولكم على حكايه تظبيط الوقت والاهداف

مستنيكم وراجعلكم

موضوع: رد: 24 ساعة الأحد 08 مايو 2011, 7:17 am

صباح الفل عليكم

نكمل موضعنا

دلوقتى هتحاول تحدد ايه اللى مطلوب منك

علشان تتوصل لهدف معين

او هتقسم اهتماماتك واهدافك الى اربع اجزاء

ومن وجهة نظرك هتقسم كل حاجه على حسب الوقت والاهميه

زى ماحنا شايفين فى الجدول فى اربع خانات

1-الحاجات المهم العاجلة

2-الحاجات المهمة بس غير عاجلة

3 الحاجات العاجلة بس مش مهمة

4-الحاجات غير مهمة وغير عاجلة

[ندعوك للتسجيل في المنتدى أو التعريف بنفسك لمعاينة هذه الصورة]

نفترض متلا ان انته عندك امتحان

وقدامك 10 صفحات لازم تزاكرهم

عندك لسه مراجعة

وعايز تجيب ورق او تستعد للمادة التانيه

وخالتك بقالك كتير مازرتهاش وتعبانه

ونفسى العب كورة

يبقى التقسيم هايكون ازاى

[ندعوك للتسجيل في المنتدى أو التعريف بنفسك لمعاينة هذه الصورة]

تمام

شويه وراجعلكم

موضوع: رد: 24 ساعة الأحد 08 مايو 2011, 12:02 pm

عارف انا بعت ردي ده علشان اقولك متابع

وان كنت افضل ان انت تكمل من غير مانشتتك او نبوظ الموضوع

بجد موضوع هايل
وعجبني كمان نظامك اوي
وان شاء الله يحقق الافادة المرجوة منه

متابع........

موضوع: رد: 24 ساعة الأحد 08 مايو 2011, 2:53 pm

موضوع غاية في الجمال والروعة..

متااااااااابعة للرؤية الجديدة..

موضوع: رد: 24 ساعة الأحد 08 مايو 2011, 3:26 pm

موضوع جامد ومتابع معاك يا كبير

موضوع: رد: 24 ساعة الأحد 08 مايو 2011, 6:57 pm

شكرا على مروركم جميعا وشجعونى كده

.........................

اللى فات ده كان عبارة عن حاجه زى المقدمة

اللى هانتكلم عليه النهارده حاجه مهمة اوى

اللى هيا الجدول

ماتضحكش ايوه الجدول

كلنا عمالنا جداول مزاكرة

فاكر اول جدول عملته

كان اهم واحلى حاجه فى الجدول

ان اول يوم مانذكرش فيه

وطبعا كنا بنعمل الجدول مخصوص علشان كده

وكان الواحد يعمل الجدول مايخرش الميه

بس الحقيقة زى ماقولتلكم اننا كنا بنعمل الجدول علشان نضحك على نفسنا

ونبتدى من بكرة او من يوم السبت

طيب ايه حكاية الجدول

الجدول ده المفروض انه كان اختراع قديم

وكان اسمه

to do list

اللى هية مهامى اليومية

فاكرين الاعلان بتاع بيبسى

اللى الواد فيه ضحك على البت هو وصحابه

وعمل النيزك علشان تقوله بحبك

فاكرين الواد قام بعد ماخلص الشغلانه شطب على كلمة

اكسب قلبها

هيا دى القصة ان انته ها تصحى الصبح مطلوب منك ايه تكتبه اللى تخلصه تشطبه

ودى عيبها انه ليها نطاق محدود يوم اويومين او اسبوع بالكتير

طيب شكله ايه الجدول اللى بقولكم عليه

هو جزئين

الجزء الاول اللى بسميه البودى (body)

اللى هو الهيكل الاساسى واللى منه 80% من القصه

ادى الجدول

[ندعوك للتسجيل في المنتدى أو التعريف بنفسك لمعاينة هذه الصورة]

شكله حلو صح

هابتدى اقولكم واشرحلكم كل خانه لوحدها

وبالشرح الممل

اللى جاى بعد كده هو زتونة الموضوع

فا اعيرونى انتباهكم

راجع لكم

موضوع: رد: 24 ساعة الأحد 08 مايو 2011, 7:39 pm

هنبتدى بخانات الجدول

الخانة الاولى

mission

الترجمة بتاعتها المهمة

بس معناها

انته عايش ليه فى جملة او جملتين

الخانة دى صعبة اوى مش سهلة

لانها هاتلخص حياتك كلها ليه وعاوز تحقق فيها ايه

او الغاية العظمى من حياتك

بسم الله الرحمن الرحيم

افحسبتم انما خلقناكم عبثا وانكم الينا لاترجعون

صدق الله العظيم

الايه دى لازم تحطها قدام عنيك ديما

لان حياتك مش ايام وسنين هاتعدى وخلاص وبعد كده تموت

انته مخلوق لغاية

ولحاجه مهمة جدا

ممكن ماتكونش الحاجه دى واضحه ليك اوى

بس لازم تعرف ان فى حاجه ربنا خلقنى علشانها

مش مخلوق كمالة عدد

ودى اللى لازم تكون عندك قناعة فيها

بالنسبة لينا

الـــ mission بتاعتنا هتكون ايه

طاعة ربنا وعبادة وحسن طاعته

تكمل نقطتين كمان

مثلا وافيد الناس

واعمل اسرة الناس تفخر بيها

...........................

براحتك انته بقى شوف مغزى لحياتك واكتبه

طيب هاتقولى لازمته ايه اكتبه

هاقولك فاكر الجدول اللى انته كنت بتعمله علشان تأجز يوم من المزاكرة

مش كنت بتلزقه قدامك كده على المكتب

ده ياريت تعمله كده

المفروض انك تبص فيه بصه كل اسبوع مرة

لانك ديما هاتبقى محتاج تفتكر

نقطتين مهمين اوى

النقطة الاولى

الجدول مش هايتعمل فى 10 دقايق

لا دانتا تقعدالفترة اللى تريحك تعرف انته عاوز تملاه الزاى

النقطة التانيه

الجدول ده مش قالب ثابت

يعنى ممكن تغير فيه براحتك زى مانتا عاوز

بس المهم تكون فاهم ايه هيا الفكرة

ودمتم

راجعلكم باذن الله

موضوع: رد: 24 ساعة الأحد 08 مايو 2011, 9:43 pm

مساء الخير عليكم

الخانة التانية

target

الترجمة الاهداف
(بس نسيت احط الــs)

زى ماقولنا قبل كده الاهداف اهدافك الزكية

الـــ SMART

بس دى خصائصها

انما هيا ايه الاهداف؟

وليه اهداف مش هدف واحد؟

وايه الفرق بين التارجت والجول؟

شوف ياسيدى وياستى

خانة التارجت دى

دى كل جوانب حياتك الناحية الاجتماعية والعلمية والعملية

والغاية النهائية بتاعتها

طيب الغاية دى علشان اوصلها

لازم فى واحد واتنين وتلاته

اخلص واحد كده جبت جول

واتنين وتلاته وهكذا

لحد ماوصل للتارجت بتاعى فى النقطة دى

خد بالك مافيش حاجه اسمها هدفى كذا بس

لا لازم تكون اهدافك كلها مع بعض وماشيه سوا

على رأى المتنبى

لو غامرت فى امر مروم فلاتقنع بما دون النجوم
فطعم الموت فى امر حقير كطعم الموت فى امر عظيم

او بالبلدى ينعيش عيشه فل يانموت احنا الكل

حط اهدافك كلها

زبطها اعرفها كويس وانا جايلك دلوقتى

اول خانة

career

الحياة العملية بتاعتك

شغلك وظيفتك او زى ماتسميها

الاول فى عندنا اتنين من البشر

ناس لسه ماحددتش شغلها زى اخوتنا فى الثانوى

وناس خلاص عرفت مصيرها

اخوتنا اللى لس ماعرفوش لسه هايشتغلوا ايه اكتبوها من دلوقتى انتم عاوزين تطلعو ايه

وجايلكم تانى

اللى عرفو بقا خلاص اكتب يامعلم

طيب هانكتب ايه

اكتب اخرك ايه فى الشغلانه

يعنى ايه؟

يعنى مثلا انا راجل محاسب

تارجتى انى افتح مكتب محاسبه ويكون مكتب ناجح

واحد لسه فى ثانوى وعاوز يخش تجارة

ولو ده برده حلمه يكون عنده مكتب محاسبه خلاص هايكتبه

بعد كده هاتقسم الهدف ده تصاعدى 5سنين فى 5سنين

بمعنى عمنا بتاع الثانوى

هايقول هاخش كلية تجارة

اتخرج من كلية التجارة

اشتغل فى شركة

افتح مكتبى

ويحط لكل نقطة من دول 5 سنين او اقل زى ماقولتلكم براحتك ده مش قالب خليهم سنتين

يمينك بقى يامعلم هتلاقى

5 years goals

هاتقسم كل نقطة لمجموعة اجوال

بمعنى انا علشان اخش كلية تجارة

لازم انشاء الله
1-اجيب مجموع كذا
2-اشوف انهى جامعه الاحسن
3-هاذاكر ازاى فى الكلية
...........
............
وهكذا

يمينك شويه يامعلم

فى خانة careerالكبيرة دى

تقسم اجوال الخمس سنين او زى ماعملتهم سنتين

لعشر اوعشرين جول

جول يوصل لجول

يعنى علشان اجيب مجموع كويس

ازاكر كويس

اركز شويه على الرياضيات

وهكذا هكذا

تمام

نكمل بكرة انشاء الله

ولو فى حاجه مش واضحه

ياريت تقولولى

يتبع بأذن الله

موضوع: رد: 24 ساعة الأحد 08 مايو 2011, 9:50 pm

متابعة فى صمت

موضوع: رد: 24 ساعة الإثنين 09 مايو 2011, 8:32 am

السلام عليكم

نخش بقى على خانة social

الخانة دى بقى اللى هيا حياتك الاجتماعية

حياتك الاجتماعية اللى بتشمل

زوجتك

اولادك

اسرتك

وزى ماقولنا ايه هيا غايتك الاجتماعية

يعنى مثلا هاتقول

زى ونيس كده

نفسى اطلع من ولادى ابا عظيما واما فاضلة

وتضيف واكون بارا بوالدى

محافظ على صلة الارحام

ننتقل اللى الخانة بتاعة الاجوال اللى على اليمين

فى حاجة مثلا عاوز تعملها لابوك وامك

عاوز مثلا تطلعهم عمرة

عاوز فى خلال سنتين مثلا اخطب

وديما محافظ على صلة الارحام

طبعا على يمينك خالص هاتقوم مقسم الجول الواحد على 10 اوعشرين نقطة

ودى توصلك لدى

مثلا انا عاوز اطلع ولدى وولدتى عمرة

طيب محتاج احوش فلوس

محتاج اعرف تأشيرة العمرة ازاى

هايسفروا طيران ولا برى
.
.
. وهكذا
لحد ماتخلص الجول الاولانى

يعنى حياتك الاجتماعسة كلها تحطها فى شكل سلم

درجة بتوصل للدرجة لحد انشاء الله ماربنا يكرمك وتوصل لغايتك

بعد كده
financial
اللى هيا الماديات بقى

يعنى انا بحلم يكون عندى مليون جنيه

طيب المليون جنيه دى هاجبها ازى

وتجى اليمين

تحط التصورات بتاعتك اللى هاتجيب بيها المليون جنيه

وتعملها اجوال

ونفس القصه اللى مشينا فيها

طيب انته راجل عندك موهبة

يعنى خانة Artistic

طيب مثلا انا بكتب شعر

هاتحط تارجتك انى اكون شاعر معروف ومشهور

يمينك هاتقول هاحاول اثقل الموهبة بتاعتى

اعمل 20 قصيدة

اطبع ديوانى

بعد كده هاتجيب نقطة اثقل موهبتى وتقسمها عشرين بوينت

اقرا للشعراء كبار

اقر كويس فىاللغة العربية

وهكذا

نيجى بقى

لـــ attitude

اللى هيا سلوكى واخلاقى

طبعا هاتحط تارجتك اكون انسان محترم وخلوق

طيب هنا بقا الوضع هايختلف شويه

هاتيجى تكتب نقط ضعفك الاخلاقيه

زى انا بتعصب بسرعه

انا مش بصبر على حاجه

وهكذا

هاتيجى بقى لكل عيب وتشوف عشرين طريقه تحسن بيها العيب ده

وتابع نفسك

يعنى انا بتعصب بسرعه

اجيب كتاب عن مثلا ضبط النفس

ماحولش اكلم حد وانا منفعل

وهكذا

نيجى بقى على خانة الـــ physical

وهى نوعين المجهود العقلى والعضلى

يعنى تحافظ على رياضة

وتحافظ على شغل دماغك

مثال احافظ على لعب الكورة

السباحة اوى اى هوايه رياضيه

العقلية بقى

مثلا احفظ 10 ارقام مهمة من الموبايل

العب سودكو

اقرا

العب شطرنج

وهنعمل فيهم زى اللى فات تحط تارجت فيهم

وتقسمه لجوال

والجول لعشرين درجه

او زى مانتا عاوز

اهم نقطة بقى spiritual

او الحاجات الروحانية

ازاى بقى

نفسى احفظ القران

نفسى اقرا فى الحديث

اداوم على قراءة القران

نفسى اتعلم امور دينى

وهكذا

تارجتك تظبطه

وليكن حفظ القران

هاتيجى على الاجوال

هاحفظ 5 اجزاء فى خمس سنين

كل سنه جزء

يمينك هاتقسم كل جزى لعشرين جزء

وهكذا

اللى جاى بقا اخر حاجه انشاء الله

اللى هيا اسمها

sharpen the saw

او اشحذ منشارك

سن السكينه يعنى

ودى اللى هيا هاتبقى طريقة التطبيق العملى اللى بجد

راجعلكم

موضوع: رد: 24 ساعة الإثنين 09 مايو 2011, 2:06 pm

جميل الموضوع يا رؤيه متااااااااااااااااااااااااابع
استمر يا باشا

موضوع: رد: 24 ساعة الإثنين 09 مايو 2011, 4:41 pm

مساء الخيرات عليكم

لو فى واحد حطاب عاوز يقطع شجرة هايعمل ايه

هينام بدرى علشان يصحى بدرى

يصح الصبح يفطر

يجهز العدة بتاعته

واخر حاجه هايجهزها هو انه هايسن المنشار قبل ما يقطع الشجرة

وبعد كده يقطع الشجرة

لو تخيلنا ان التارجت بتاع الراجل ده هو قطع الشجرة

يبقى كل اللى جهزه قبل كده عبارة عن اجوال علشان التارجت الرئيسى

يعنى نومه بدرى ده جول حققه ودخل الجول اللى اللى بعده انه هايصحى بدرى

وهكذا انها اجوال بتوصل لاجوال لحد مانوصل للتارجت بتاعنا

لحد ماوصل قبل مايشتغل على طول اللى هيا سن المنشار

حتت سن المنشار دى هيا اللى سهلت عليه القطع وبالتالى وصل للتارجت بتاعه

بسهوله وبسرعه

تخيل لو عمنا ده كان ممشيها بالبركة

حقيقى كان هيوصل للتارجت بتاعه بس لوقارنها بالسلاسه

والسهوله فى الحالة الاولى

اكيد فيه فرق

ــــــــــــــــــــــــــــــــــــــــــــــــــــــــــــــــــــــــــ
نخش بقى على الشغل بتاعنا

ده الجدول التطبيقى بتاعنا

[ندعوك للتسجيل في المنتدى أو التعريف بنفسك لمعاينة هذه الصورة]

هنبص على الجدول بصه بسرعه كده

اول حاجه انى بدأت الجدول من يوم الاربعاء علشان حكاية الاجازة بتاعة اول يوم فى الجدول

الايام كلها واحد مش هاتفرق معايا

الجدول فى ارقام من 8 الى 12 او 16 ساعه قسمهم زى مانتا عاوز

احسن حاجه اننا نملى الجدول بيانات هيبان اكتر

[ندعوك للتسجيل في المنتدى أو التعريف بنفسك لمعاينة هذه الصورة]

هانيجى على الجدول بتاع sharpen the saw

وتحط الحاجات اللى هاتعملها فى مواعيدها

يعنى مثلا فى اوقات الصلاة بعد الصلاة تقعد 10 دقايق تحفظ ايه

يوم الخميس مثلا هاتقابل اصحابك تشوف الميعاد اللى انته عاوزه

وتظبط جدولك كل اسبوع

وكده يبقى انا برأة وخلصت

بس فى نقطتين

كل اللى انته كتبته او عاوز تعمله لو حسيت انه صعب عليك

قلل شويه

خير الاعمال ادومها وان قل

مافيش حاجه فى الدنيا صعبه

فى حاجه اسمها تعود

مافيش حاجه اسمها مستحيلة

فى حد عملها ماتبقاش مستحيله

فى حاجات بتيجى فجأة بتعطل مشاريعك

او تغير مسارها

ولا يهمك اقلم نفسك على الوضع الجديد ومعاه برده اهدافك

اتمنى انى اكون قدمت حاجه بسيطه يمكن تفيد

مستنى ردوكم

واللى مش واضح انا موجود

ومعلش لوكانت طريقتى رخمه بس المهم تكون المعلومه وصلت

ودمتم بصحة وعافيه

موضوع: رد: 24 ساعة الإثنين 09 مايو 2011, 7:26 pm

متابعة جدا وبجد بقى اهم حاجة بعملها لما ادخل المنتدى اقرأ التوبيك كله

ربنا يبارك فيك ويحسبه ف ميزان حسناتك

اللهم امين

موضوع: رد: 24 ساعة الإثنين 09 مايو 2011, 11:24 pm

اقتباس :: متابعة جدا وبجد بقى اهم حاجة بعملها لما ادخل المنتدى اقرأ التوبيك كله

ربنا يبارك فيك ويحسبه ف ميزان حسناتك

اللهم امين

دا شرف ليا يافندم
سعدت جدا بمرورك

موضوع: رد: 24 ساعة الخميس 12 مايو 2011, 1:26 pm

جميل ذلك الطرح .. وشئ جميل عندما يعرف الشخص علم او موضوع ويحب بجمال ان يفيد الاخرين بقلة امكانيتهم فى تحمل هذا الكورس او عدم ابصار للشئ او تقديره اهميته فى الحياة .. اعانك الله وزقك ورزقنا واعضاء المنتدى بمن يمتلك الكثير اويحب ان يفيدهم به بدلا من كم الشات المهول فى النت عموما .

موضوع: رد: 24 ساعة الخميس 12 مايو 2011, 2:25 pm

متابع معك اخي العزيز تحياتي لك

» ابراج ساعة مكه.
» ساعة مفقودة
» 9مايو,,,,, دقت ساعة العمل
» اذا اتت ساعة الفراق.......بين العشاق
» يلا يا جماعه باقى من الزمن 24 ساعة