بلال دياب: مصرحزينة ياريس !!!

بسم الله الرحمن الرحيم

السلام عليكم أولا

ازيكم ياشباب..ياشباب مصر...احلي وأجمل بلد في الكون

مصر بلدنا وهتفضل بلدنا طول العمر مهما شفنا من اللي حاكمنها ومهما زادت قوي الفساد

لكن هيفضل شعاع الامل دايما موجود ..موجود في شبابنا ..نبتة الخير والحب والاصلاح

أنا بجد سعيدة جدااااا وانا بكلمكم دلوقتي..وده للي يعرفني علي غير عادتي

وانا بتابع برنامج العاشرة مساء اللي بيذاع دلوقتي كانوا مستضافين بلال دياب

اكيد كلنا سمعنا عنه اليومين اللي فاتوا دول واللي مسمعش ..هو طالب الفرقة الرابعة بكلية الآداب جامعة القاهرة شاب ليبرالي تابع لحزب الغد

في الاحتفال بمئوية جامعة القاهرة استضافت جامعة القاهرة رئيس الوزراء احمد نظيف

وخلال كلمة الدكتور نظيف وهو هائما في الحديث عن ذكرياته وبداية دخوله الجامعه ومشوار حياته

قاطعه بلال بكلمات فاجأت الجميع قائلا :

ياريس ..ياريس ..مصر حزينة يا ريس ..ياريس شباب المعتقلين بتوع 6 ابريل هما الشباب بتوع الانترنت

..ياريس الشباب المعتقلين عايزينك تفرج عنهم ياريس الشباب المعتقلين هما اللي وقفوا معاك في محنتك

في مؤتمر دافوس الاقتصادي ساعة ماقلت ان مصر دولة ليبرالية

ياريس انا عايز أقوللك علي حاجة .الجامعة زي الفل والتعليم زي الفل ورغيف العيش موجود.. والديمقراطية

موجودة....والحرية موجودة ..ياريس افرج عن مصر افرج عن مصر ..يا ريس

انا طبعا قرأت الكلام ده في الجرايد من كام يوم بس متأثرتش بهم اوي ...مكنتش عارفه اقول ده شاب متهور ولا شجاع ولا ولا .......

لغاية مسمعته النهاردة بيتكلم في العاشرة مساء

بجد حسيت ان مصر لسه بخير ولسه فيه شباب حاملين الراية ...بيبذلوا اقصي جهد عشان مصر بلدنا

مش شباب يائس حاطين ايدهم علي خدهم وبيقولوا يعني احنا هنعمل ايه ؟؟؟

شاب مثقف وواعي بمعني الكلمة..عارف هو بيتكلم عن ايه وازاي ..عارف هو عايز ايه

سألته الاستاذة مني بتقولله انت ايه طموحه يا بلال ؟؟؟

قاللها تقصدي طموحي السياسي يعني..لا ..ده انا عايز ابقي ريس جمهورية

ماشاء الله ع الطموح ..ليه لاء ...مافيش حاجة اسمها مستحيل مادام بنعمل اللي علينا ونتوكل علي الله

المهم بقه انا عايزه اسالكم سؤال يمكن يختلف عليه الكثيرين
انتو شايفين ان التصرف ده كان فيه شيء من التهور ولا بتعتبروه شجاعة وكنتم تتمنوا انكم تكونوا مكان بلال؟؟؟ايه تفسيركم للموقف ؟؟؟
وده الفيديو الخاص بالموقف

[ندعوك للتسجيل في المنتدى أو التعريف بنفسك لمعاينة هذا الرابط]

والله كم اسعدنى موضوع بجد

انا قريت عن الكلام دة فى الاخبار على النت

وبجد كنت اتمنى انى اكون مثل هذا الشاب لانه بجد يثبت اننا لسه عندنا شباب بمعنى الكلامه

ولو بجد كلامه اثبت اننا لسه لو موته حياتنا لسه بردة الالسنه بتاع الشباب صحيه

الله يكرمه شاب بجد يستاهل اليوم انه يطلق عليه شاب مصرى شجاع وراجل

كلمة حق امام حاكم ؟؟؟؟؟؟؟؟؟؟؟؟؟؟

ولا أدى اهو تهور أم شجاعة .. فهى تتعلق بالنية ..

غير ان لى رأى فى هذا الموضوع ..

شئ جميل ان تحمل هم دينك وبلدك وناسك وشعبك

لكن ان قصد بهذا ان يحمس الشباب للخروج فى مظاهرات وووو الخ ..

فلا أظن أن هذا صحيح ..

وربما يفعل هذا من باب الظهور ..

طب هو ايه اللى حصل له يا جاسمين

بجد كلامه يهز القلب وحسيت انه خارج من القلب

لكن ... وما بعد ؟؟

ايه اللى حصل له ؟؟

ايه اللى حصل له يا ريس

مظنش يااخ عمرو انه هيقول الكلام دة من داعى الظهور

لانه شاب متعلم وبيتكلم امام شخصيه مهمه فى الدوله يعنى عارفه اخرته وايه اللى هيحصله

هو اتكلم بداع الشجاعه والرجوله مظنش من دافع الظهور خالص

هقوللكم ايه اللي حصل له زي مسمعته بالظبط لكن انا عايزه بس اعقب علي جزئية في كلامك يا استاذ عمرو

حضرتك بتقول انه بيدعو الشباب للخروج في مظاهرات

علي حسب كلامه ده مش صحيح

هو بيقول انه لما سمع ان الدكتور نظيف جاي في مؤتمر كتبله ورقة بيطالبه فيها بالافراج عن معتقلي 6 ابريل

لكن وسط الحشود الامنية الكبيرة جدا مقدرش يوصلهاله

قال خلاص اروح القبة واديهاله مع اني عارف ان ده مش هيحصل بس قلت احاول

بيقول انا رايح وبحاول ادخل القاعة لقيت الامن بيقولوله انت ايه اللي جابك هنا وهو طبعا معروف

قاله عايز احضر الندوة..قاله مينفعش..المهم انه اتمنع من الدخول

وبيقول وانا راجع لاقيت وفد من طلبة كلية تجارة داخل فدخلت وسطهم

المهم انه فشل في الجلوس في الصفوف الاولي لانه مش تابع لاتحاد الطلاب

فقعد في الصفوف الخلفية

بيقول بعد كده وزعوا ورق ع الحضور عشان يكتبوا اسئلتهم اللي بيوجهوها للدكتور نظيف

قال طب كويس هكتب اللي انا عايز اقوله ويقروها او ميقروهاش هما حرين

المهم انه فوجيء بالورق بيتوزع علي اصحاب الصفوف الاولي فقط اللي هما الاتحاد والصحفيين وكبار الزوار

حاول بشتي الطرق انه ياخد ورقة لكن رفضوا

وبعدين توكل علي الله وقام بكل شجاعة وقال اللي هو عايزه

يبقي شجاع بقه ولا لاء

اكمللكم بقه هو حصلله ايه

بصراحة الرد الاول بتاعى كان قبل المشاهدة

كملى يا جاسمين ..

انا مهتم

كملى ياجاسمينا

انا هسمعكى

اللي عنده حاجة يقولها واللي عنده تعليق علي حاجة من اللي انا كتبتها يتكلم

انا سمعاكم

وهقوللكم ايه اللي حصلله اهه

المهم بعد ماخللص كلامه

بيقول لاقيت اتنين من الامن بيأنكجوني يعني بيمسكوني هما الاتنين وبيحاولوا يقبضوا عليا

لكنهم فشلوا لان زمايله كانوا محاطين بيه ومنعوا ده وفالوا لبتوع الامن ايه هو عمل ايه غلط؟؟

هو عبر عن اللي جوانا ..بيقول انه كان في قمة السعادة لما لاقي كل زمايله بيدافعوا عنه بالشكل ده

المهم انهم معرفوش يقبضوا عليه لكن لما راح كليته قبضوا عليه وحجزوه في غرفة قائد الحرس بس الحمد لله في النهاية خرج

لكن بعد كده بيقول طبعا انه قوبل بلوم وعتاب كبير من اهله

بيقول انهم في اليوم ده مناموش في بيتهم ..كلهم سابوا البيت وكانوا متاكدين ان حد هييجي يقبض عليه

بيقول بس انا رجعت البيت تاني يوم لكن اهله فضلوا فترة يناموا خارج البيت

وسالته كمان طب لما راح الكلية بعد كده ايه اللي حصل بس هو بيقول انه مرحش بعد اليوم ده عشان بيذاكر استعدادا للامتحان

وفي النهاية الاستاذة مني توعدتله انه هيكون له مستقبل سياسي

وفي النهاية قال انا بوجه كلمة لسيادة الريس

بيقول انه من يومين اعلنوا الافراج عن معتقلين تبع منظمات سياسية

بيقول طب احنا 20000 شخص ليبرالي في مصر

مش عاوزين حاجة غير ان البلد ينصلح حالها ومبيعملوش حاجة غلط

بتقولولنا عبروا عن رايكم بس عن طريق قنوات سلمية

طب وهو فيه قنوات سلمية اكتر من النت ؟؟؟

موضوع جميل

اتمني طبعا اني أكون مكانه

وموقفه منتهي الشجاعة والإخلاص للقضية الوطنية

كلام جميل بجد يا جاسمين

يستدعى اعادة التفكير

مصر حزينة ياريس

والله الجملة دي معبرة بشكل

شاب فعلا من خيرة شباب مصر

انا مقدرش افسر الموقف ده غير انه شاب شجاع جريء خايف علي بلده وحاسس بالازمة اللي عايشها زمايله في المعتقلات بدون اي وجه حق

افرج عن مصر ياريس

كلمة كبيرة اوي ومعبرة اوي

مش ممكن تكون طلعت من شاب متهور او مش عارف هو بيقول ايه

ومش ممكن نسميها حب ظهور

ازاي حب ظهور وهو بيقول الكلام ده وهو عارف ومتأكد انه هيروح بعدها ورا الشمس

لكن نصيبه ان الريس مش ناقص هجوم عليه اكتر من اللي حاصل اليومين دول

بسبب كم الازمات اللي وقع مصر فيها في فترة حكمه

كانوا بيقولوله في برنامج القاهرة اليوم ماهو انت فعلا يابلال لو مش في بلد ديموقراطية مكنتش قدرت تقول كلام زي ده لسيادة الريس

قاللهم وبكل جرأة : لااااااااااااااااااااا..ده انا داخل المؤتمر بالحيلةوكنت ممنوع اصلا من الدخول

يبقي فين الديموقراطية

بيقول بعد مالمؤتمر خلص ..رحت التواليت وانا خارج لاقيت 4 مستيني

ضابط بنجمتين وعسكري امن اسمه ايمن وواحد تاني ببدلة كده

فبيقوله وريني كارنيهك ..فساله بلال طب حضرتك مين

قاله انا دكتور جامعه ..قالله طب وريني كارنيهك ..حضرتك مش بتقول انك دكتور جامعه طب وريني كارنيهك اعرف مين عاوز يشوف كارنيهي

المهم لما رفض يديله الكارنيه بيقول شالوه باسلوب اقل مايقال عنه انه همجي وغير متحضر

شالوه من راسه ورجله وودوه لمكتب رئيس الامن في الجامعة

قممممممممة الديموقراطية طبعاااااااااا

فعلا شاب شجاع
يستحق ان يتكلم باسم المصريين
ويفكر في صلاح الامور
وانا اتمني ان اكون مكانه

متابعة رائعة ياخت جاسمين وانا مشتاق لرد نظيف عليه

حمادة يوسف كتب:: متابعة رائعة ياخت جاسمين وانا مشتاق لرد نظيف عليه

أكيد مردش .. هيتكلم يقول ايه .. هيفضح نفسه اكتر ؟؟؟

طبعا الرد اكيد هيكون فى الظلام ..

هقوللكم رد نظيف عليه كان ايه بس قبل ماقوللكم هو رد عليه قالله ايه

هقوللكم هو كان بيتكلم في ايه قبل ما بلال يقوم يتكلم

طبعا زي ماقلتلكم كان هائم في الحديث عن ذكرياته وتاريخه المجيد والانجازات العظيمة اللي عملها للبلد

كان بيقول حسب ماقرأت في جريدة البديل "مصر تقف علي أرض صلبة، والظروف الآن أفضل مما كانت عليه منذ 10 سنوات، مصر لديها قاعدة علمية كبيرة وجامعة حكومية في كل محافظة وثلث الشباب يدرسون في الجامعات، وهؤلاء هم القوة الضاربة التي تعبر بها مصر إلي المستقبل"

طبعا كلام جمييييييييل جدااااااااا ولازم يستفز اي حد شايف حال البلد

وبعد مابلال قال كلمته "الجامعة زي الفل والتعليم زي الفل والحرية والديموقراطية موجودين "

رد عليه نظيف كما يقول بلال ب3 مضامين

اول مضمون : قاله انا حاسس في كلامك بسخرية

المضمون التاني : قاله لو مصر مافيهاش ديموقراطية مكنتش هتقدر تقول الكلام اللي انت قلته

وطبعا بلال رد علي الديموقراطية المفرطة الموجودة سواء بمنعه من دخول المؤتمر او محاولة القاء القبض عليه بعد خروجه من المؤتمر

المضمون التالت : فيه فرق بين انكم تعبروا عن رايكم وبين اعمال التخريب والهدم اللي حصلت ..عبروا عن رايكم بس بطريقة سلمية

وبلال رد علي الكلام ده وقال طب وهو فيه طرق سلمية اكتر من النت !!!!!

زائر

والله م عارفه اشكرك ازاى

الشاب ده عمل حاجه كلنا معرفناش نعملها

واليوم اللى كنا بنقول هنعمل وهنعمل يجيجوا اهلينا يمنعونا من الخروج اصلا

اهو الشاب ده عبر عن نفسه وطلع اللى جواه

احنا عملنا ايه بقى والله حاجه تكسف..؟

عارفه وانا بسمع كلامه ده كنت بقشعر والله حد عند شجاعه وااتكلم وعبر عن اللى جوانا وكملت حواره مع عمرو اديب اللى كانت ردود سخيفه

عمرو أديب ده اصلا انسان بيهوي الاستفزاز والسخرية

لكن ماشاء الله بلال شاب مثقف ولبق وعرف ازاي يرد عليه

كل اللي عجبني في الموضوع ده الناس اللي سقفت علشان تشوش علي

لا يا استاذ محمود

دي مش طريقة ناس بتسقف عشان تشوش عليه

دي طريقة ناس منبهرة ومعجبة بجد بالتصرف الشجاع اللي عمله

بدليل زمايله اللي يعرفوه واللي ميعرفوهوش عملوا المستحيل عشان الامن ميقبضش عليه بعد انتهاء المؤتمر

بجد حسيت ان مصر لسه بخير ولسه فيه شباب حاملين الراية ...بيبذلوا اقصي جهد عشان مصر بلدنا

والله الشاب ده شجاع

ولسه في مصر ابطال ابرار احرار
بجد موضوع جامد
شكرا شكرا شكرا Jasmin

جزاك الله كل خير
ياريت كل الناس تبقى زيه
فى هذه الحاله لن يكون هذا حالنا

» حازم الكاديكي يشعلها نار ويرد علي طارق دياب و كلام طارق دياب
» يعنى اية ياريس
» أمن الدولة ودم سيد بلال
» ودع فلوسك ياريس ..
» ارجع ياريس.............!!!!