أجمل قصه فشل

أتمنى من كل الناس تقرأ قصتى اللى علشان دى أجمل قصه فشل بجد
أبتدت بطفوله أتحرمت فيها من انى أكون زى أى طفل مش من حقى العب ولا أضحك الا فى حدود يعنى من الاخر كبت
معرفتش أكون زى اى طفل كنت على طول اتفرج عليهم من بعيد بس كان ولدى حاطط فى دماغى انك كبير مينفعش تعمل كده زيهم وماما ديما كانت تمنعنى من انى العب او اخرج المهم
كبرت وعدت ايام الطفوله وبقيت شب وبدأت مرحله المراهقه فى الاعداى اتعلقت ببنت كانت جارتى وفضلت لمده سنه احاول اكلمها ولما اخدت بالها سابوا المنطقه باللى فيها وعزلوا
وبعدها خيم عليا شبح الثانويه العامه والمجموع والدرجات كنت غير موفق رغم انى كنت بزاكر جااااااااامد اوى بس لظروف خاصه محققتش المجموع اللى كنت بحلم بيه ولو انه كان مجموع معقول المهم كان فى بالى انى اقدم فى احد الاكادميات زى الشرطه او الحربيه بس لسبب عضوى عندى اتحرمت من انى اقدم وبينت للناس كلها انى اصلا مش بحب النوع دا من الكليات كنت حاطط املى كله بقى انى ادخل كليه الالسن بس وقفت على حاجات هايفه ومقدرتش ادخلها دخلت كليه مش بطاله بس مش كنت حاببها اوى المهم قبل ما أدخل الكليه حبيت بنت فى الثانوى اوى بس للاسف برده حصلت ظروف غيرت اللى بنا وسبتها بعد ماقلت ان ربنا عوضنى بيها لكن فشلت فى انى اقدر احافظ على اللى بنا او تقدر تقول هى اللى سبتنى بسبب الماااااااااده والفلوس
فى الجامعه بقى اتحولت حياتى تدريجيا واتعرضت لبعض التقلبات مثلا بعد ماكنت شب رياضى وملتزم وعلاقتى بربنا مش بطاله بدأ ردأء الايمان فى السقوط جربت حاجات كتير اوى بس كنت برجع لربنا على فترات زى اى حد وهناك برده اعجبت ببنت أو تقدر تقول انى كنت بحاول انسى نفسى حبى اللى كان فى الثانوى وبرده فشلت فى العلاقه معاها وخلال الفترات اللى فاتت لاحظت ان كل مابنت تحبنى وتقرب منى كنت بلاقى رفض غير طبيعى ليها حتى ولو ان مفيش حاجه فيها تخلينى ارفضها كانت جوايا حاجه ديما بتخلينى اتعمد امشى فى الطرق الصعبه واللى كانت بتنتهى بالفشل
وكترت العلاقات وتعددت وبرده هى فى قلبى حتى بعد مااتجوزت هى المهم جت الحاجه الاصعب واللى مش كنت متوقعها خاااااااالص توفى احد ابواى وبعدها بقى دخلت فى مرحله يأس وفيها بعد عنى اقرب الناس ليا اللى مش كنت اتوقع انهم يسيبونى واللى انا بعدها شلتهم من حسباتى وفجأءه لقيت نفسى وحيد ولا حب ولا اهل حطيت املى على حلم التخرج من الكليه والوظيفه اللى كنت المفروض انى اشتغلها خلصت وأتصدمت بالواقع اللى كان نقطه تحول ملقيتش شغل الا برواتب ضعيفه مش تقضى مواصلات وكمان وظائف مهينه جدا ملهاش اى مستقبل ولا وضع اجتماعى
بجد حاولت كتير ادور على شغل يناسبنى ويناسب مؤهلى ووضعى كونى خارج من اسره تعتبر متوسط ملقيتش حاجه خالص والفرص القليله اللى موجوده كلها بالواسطه والمحسوبيه لحد مايئست ونزلت اشتغل فى المتاح من الوظائف المتدنيه دى لا راتب ولا اى حاجه بس مصروفى وخلاص غصب عنى حسيت انى هتفجر من اللى جوايا من اللى كنت فيه ووصلت ليه بدون اى ذنب وسالت نفسى هى دى اخرتها ؟؟؟؟
وأيه اللى مستنينى بعد كدا مش عارف بس بيتهيألى انه أنيل من كدا لان وأنا وسط الشغل بدور على حاجه افضل مش لاقى فى نفس الوقت مفيش اى دعم معنوى من اى حد لا حبيب ولا قريب ولا حديهون عليا بجد فكرت فى الانتحار اكتر من مره بس كنت برجع بسرعه وأستغفر ربنا بس مش عارف انا بجد خايف اوى لاحتياجى لحجات كتير يخلينى اعمل حاجات كتير يعاقب عليها القانون القانون اللى بكل بنوده قيدنى فى البلد دى وحرمنى من كل حقوقى وضيع حقى فى انى اكون انسان انسان بيحب مش بيكرهه
مش القانون بس اللى هيعاقبنى عليها لاء الناس لانهم شيفنها انها حرام ومش من حقى اعملها لانها المفروض اعيش بملليم علشان حلال لكن أى حاجه غير كدا غلط بجد الناس مش ليها غير الظاهر الناس اللى بجد اكتشفت انهم مفطوريين على الانانيه وحب الذات قبل اى حاجه اللى ملقيتش أيد فيهم اتمدتلى اكيد صعب اوى حد فيهم هيصعب عليا
يجماعه فعلا اثبتلى ان محدش بيتفطر على الشر والانحراف المجتمع والناس والبلد والظروف كل دول هما اللى بيغيروا أى اساس مهما كان قوى وعلشان كدا سميت حياتى أجمل قصه فشل وحاولت احكيهالكم من طفولتى بس مش عارف نهايتها هتبقى ايه اتمنى بجد والله من كل قلبى محدش يمر بيها

بتمنى ان نهايتها تكون كويسه ومهما حصل ما تيأس من رحمه ربنا سبحانه وتعالى

وماتبصش لغيرك وتقول اشمعنى ده مع انه اقل منى بس فى وظيفه احسن منى
ربنا سبحانه وتعالى مش بينسى حد وبيدى لكل واحد رزقه على حسب اجتهاده وديما ربنا سبحانه وتعالى شايل للانسان الاحسن وماتعرفش الخير فين

تاكد ان اختيار ربنا احسن من اختيارك انت حتى لو الاختيار اللى انت اخترته كان نفسك فيه بشده
يعنى القدر بيكون ماشى كويس جدا لحد لحظه تصادفك حاجه بتحبها وعايزها بس مش ليك بتحاول بكل الطرق تعوج قدرك بس للاسف مش بيتعوج وبرده للاسف بنظلم القدر وانه ماجاش على هواك مع انه القدر ماشى صح بكل المقاييس واللى فيه الخير ليك

تاكد ان ربنا مش بيشق فم الا وكاتب ليه رزقه

ومش معنى انك فشلت فى حاجه يبقى كده انت انسان فاشل
بالعكس الانسان الفاشل اللى بيفشل فى شىء وبيستسلم كده ده الفشل اللى بجد

خلى عندك ثقه فى ربنا سبحانه وتعالى اكبر من كده واتقرب من ربنا اكتر واكتر واتاكد ان اللى انت فيه دلوقتى هو الخير ليك