ناقص دبدوب لأشرف توفيق.........

ناقص دبدوب

أشرف توفيق

ناقص دبدوبْ
فتـّشت كتير هداياي الرّاجعة ومالقيتهوش
دوّرت فْ كل هدية كتير بالطول والعرض
وقلبت الشنطة كمان عَ الأرض
ولقيتْ دِبلة وجوابات وكروت
وجنيه مقسوم وصُور وقلوبْ
لكن برضُه
ناقص دبدوبْ
*******
كل اللي فْ قلب الشنطة معايا بيستنظـَر
وبجدّ الشنطة بدون دبدوب
مالهاش منظرْ
كل الجوابات ممكن يكتبها حبيب غيري
والدِبلة خلاص موضوعها اتشال من تفكيري
والباقي حاجات بتكون دايماً بين أي اتنين
وبتتكرّرْ
وفْ شنطة كلّ حبيب وحبيبة هتِلـْقى حاجات منهُم وأكترْ
وهتـِلقى شموع ودموع وفرَح وأمل ساكِنْ
ممكِن
لكِنْ
مش كل حبيب بيجيب دبدوبْ
*******
وازّاى أنساه؟
وأنا كل أيامي الحلوة معاكِ.. معاه
أيام ماعشقتـِك قبل ما أقول
وأيام ما حلمتـِك قبل ما أطول
وأيام وأيام بتفوت على طول
وأنا وأنتِ فْ كل دقيقة بنبـْني جنينة حب وشوق وأمَلْ
وأنا قلبي الدِيبْ
على إيدِك والله لقيتـُه حَمَـلْ
كنت أمّا أزعلْ
ألاقيكِ بتِجري على الدبدوب
لجـْلْ يصالحِك
وفْ أحزانِك بيمدّ إيديه
علشان يمسح دمعة جرحِكْ
وفْ فرحِك
كان من فرْحُه يطيرْ
دا أنا كُنت باغِيــرْ
لمّا أعرف إنّه امبارح كان بين دراعِينـكْ
وباحسّ ساعات وكأنه حَرَس بيني وبينِكْ
وأتخيّل إنّه ساعتها خلاص قرّب منـّك
وعينيكِ عَـلِيه
وإيديكِ عـَليه
أجري وأطلـّع صورتِك وأندَهْ:
والله يا روحي أنا اللي شارِيه!!
وسنين بتفوت وقلوب بتدوب
وفْ لحظة خلاص يخدعنا كلام
وتموت أحلام
ويضيع دبدوبْ
********
فاكراه ولاّ إنتِ خلاصْ ناسياه مع كلّ زماني اللي عشقتـُه
طَب فاكرَة أنا امتى زمان جِبـْتُه؟
كات أول مرة انطقها (بحبـّـك) قدّامِك
وأبصّ فْ عِينك قدّامـِـك
كات أول مرة أدخل في عينيكِ بدون ما أخْجـَـل
سلـّمت كتير على كل رموشِك عَ المدخـَل
وفْ لحظة لقيتني فْ قلب عينيكِ بدون صاحب
وجناين مَاليـَة ربوع عِينك مالهاشْ صاحِب
وساعات بامشيها وحاسِس إني خلاص مجنون
من كُتر المشْي نسيت إن أنا أصلاً ف عيون
ولقيتني فْ ننّ عينيكِ خلاص بعد المشوار
ولقيت لي فْ ننّ عنيك جناين فـُلّ ودار
ومشاعر حب وشوق وحنين وحنان جَارْفـَة
عارفـَة؟
مع إنّ عينيكِ مَاهـِيش خـَضْرَة
الدنيا تملـّي فْ ننّ عينيكِ تبان خـَضْرة
مليانة أمل بتحاوْطـُه الأحلام والخـُضْرة
وأنا كلّ ما أنام
قلبي الحيران بيلوم رِمشي
وأمّا أتحرّك وأعمِل ماشي
بيقول لي: حرام .. لسّه هتمشِي؟!
وسنين بتمرّ عليّ فْ نِنّ عينيكِ السُودْ
وفْ لحظة لقِيتني خلاص مَطْرودْ
على ناصية أوّل رِمش بعيدْ
من غير دبدوبْ

********

قلبي الطيـّب
مش قادر ينسى سنين فاتِتْ
مش قادر يرمي حكايةْ حُبـُّه عشان غلطـَة ويقول: ماتِتْ
جاي لِك من تاني بحلم جديد
جاي لك وفْ إيده أمل وحنان ولـُقى ومواعيد
ومعاه دِبلة
وجوابات وكروت
وجنيه مقسومْ
وصور
وقلوب
جاي يقول لِكْ:
عَلشاااان خَطـْرِي...
خلّـي الدبدوبْ ....

نص رائع يااخت حنين كسر القيود التقليديه في تناول العلاقه العاطفيه بين المحبين واتحير في اختيار مقطع من القصيده فكلها رائعه لكن لعل الخروج الاخير للشاعر جاء مفاجئا فلم اتوقع احساس الصفح عن المحب لكن الشاعر كسر ايضا التقليديه التي تنتاب مشاعرنا في هذه اللحظات وهي الكرامه الي تحول الي قلب كبير فضل الحب والابقاء علي الذكري والعشره عن الفراق ..نص رائع

قلبي الطيـّب
مش قادر ينسى سنين فاتِتْ
مش قادر يرمي حكايةْ حُبـُّه عشان غلطـَة ويقول: ماتِتْ
جاي لِك من تاني بحلم جديد
جاي لك وفْ إيده أمل وحنان ولـُقى ومواعيد
ومعاه دِبلة
وجوابات وكروت
وجنيه مقسومْ
وصور
وقلوب
جاي يقول لِكْ:
عَلشاااان خَطـْرِي...
خلّـي الدبدوبْ ....

ايه العسل ده انا اول مفتحت المنتدى ولقيت كلمة دبدوب فتحت التوبك فى ثانيه
احلى هديه يقدمها المحب لمحبوبه هى دبديب الغرام لسببين
الاول:لانها لو العلاقه مستمره وسعيده كل ما الحبيب يبقى سعيد
يضم الدبدوب الى قلبه يستمد منه الراحه والدفء والحنان
والثانى:لو العلاقه منتهيه لاقدر الله وحز... كل ما الحبيب ينظر الى الدبدوب
يسترجع ويعيش كل لاحظات الحب والدفء والحنان
اول ما المحب يغمض عنيه ويتنهد ها يشعر بالسعاده الابديه ويحس الراحه الحقيقيه
(اها على قلبا هواه محكما فاضى الجوا منه صميما يكتمو
ويحي انا بحتو لها بسرهي اشكو لها قلبا بنارها مغرموا
ولمحتو من عينيها ناري وحرقتي قالت على قلبي هواه محرما
كانت حياتى فلما بانت بنأيها صار الردا اها عليا ارحمو)
الله على الموضيع والدبديب والصور والذكريات
على اد ما الانسان بيحب الموضيع دى على اد مبيحبش يتكلم فيها
تسلم ايدك هى دى المواضيع ولا بلاش
تقبلى تحياتى اخت حنين

شكرا على مروركم يا جماعة

هى بصراحة انا قرأتها فعجبتنى فنقلتها

بس الدبدوب هنا مش بس دبدوب وكده

اعتقد انه رمز كبير هو يقصده

والجزء الاخير اللى استاذ احمد عقب عليه قد ايه فيه اخلاص وتمسك

بالشخص ده وبالرغم من اللى حصل هو لسه بيقول ان العشرة افضل من الفراق

بس النص كله روووووووووووووعة جدا بصراحة

ايه الجمال ده

حاجه جميلة جدا جدا وبسيطه وعميقة

اختيار موفق جدا جدا

والواد ده بيحب بجد

وتحيه كبيرة لصاحبة الإختيار

» إلى الأمير الدمشقي توفيق قباني
» ناقص حتــه
» شباب ناقص تربيه (اخص عليهم اخص)
» ((( كيــــف تعــــرف بأن احد الفيتامينــات ناقص لديـك ))) ؟
» الاستاذ سعيد توفيق