الصبر مفتاح الفرج ..... لأهل العمار

لقد عرضت قصيدتي هذه اكثر من مرة علي المنتدي

ونظرا لاني اراها لاهلي وبلدي فقررت ان اعرضها هنا

وانا احترم ادارة المنتدي وقراراتهم



عزيمه وايمان

جينا نروح الغيط قالولنا ارجعوا

واللى فى ارضه مشمش يروح ويقللعه

ومن بطاطس وبامية وفلفل ازرعوا

اصل الكلام كبير ولازم تسمعوا

انى المشمش خلاص ايامه ودعوا

وادى المولى العزيز بالطرح رجعه

****
ياحبايبى اوعوا ترشوا من الرش المفسود

احسن ما ييجى المشمش ويتملى بالدود

واوعوا تسمعوا ناس فى المشمش علمهم محدود

****
اصل الحكايه حكاية عزيمة ويا ايمـــــــــــان

وكان لازم فى يوم المستخبى يبـــــــــــــــــان

وسيرة اللى قلعو تبقى على كل لســـــــــــــان

رب العباد ده كبير موجود فى كل زمــــــــــن

لازم يتعمل له حســــــــــــاب قبل فوات الاوان

واديك رميت نعمته جهرا فى كل مكــــــــــــان

فى ناس رمت فى الترعه وناس سابوا الغيطان

وناس رموا لحمارهم واكلوا الخرفـــــــــــــــــان

ياناس ده للانسان مش اكل للحيـــــــــــــوان

وهى دى الخطيئه وهو ده العصــــــــــــــــيان

وهى دى النعمه نعمة ربنا الحنــــــــــــــــــــان

كان لازم من يوم حساب لان على نعمته غضبان

من اللى حصل فيها من عبده الغفــــــــــــــــــلان

****
وتعالى نلف لفه على الناس الطيبين

ونزور سقية عبيدو وولاد ابو اسماعين

ونعدى على القطاطوه والزقازقة والجزارين

ونشوف اللى عملوه اخواننا الفلاحين

آدى اللى منهم قلعوا ... ياخساره دول خايبين

وآدى اللى صانوا النعمه ... اتعدوا من الفالحين

والرزق بكره يجيلهم ويكونوا بيه راضيين

****
هو لو ابنك تعب ؟ هتدفنه فى الطين

كان لازم من الصبر عالشده يا عاقلين

ده رب العباد قال انه مع الصابرين

****
يا اخواننا من فضلكم اوعوا فى يوم تانى

تعودا للغفله والجهل يا اخوانى

اصل الجهاله ظلام ومنها هانعانى

****
ياشجرة المشمشه يا ساتره ارض العمار

اوعى فى يوم تزعلى من اهلك الشطار

ده خلاص فهمه الحكايه وربنا ستار

هيزرعوا بذمة ويجمعوا التجار

والكل بكره هايملا ارضه بالاشجــــــــــــــار

والخير يعمك يا بلدى ويزيد العمار بعمار


عمر مختار عبيدة

بجد جميلة جدا جدا
وانت قلت كل حاجه...وضحت المشكلة والسبب وكمان الحل
*******
والعمار من غير المشمش تبقى مش عمار....وانا قبل السنة دي كنت بقول لنفسي ان خلاص المشمش ده هيبقى ذكرى بالنسبه للبلد..لكن سبحان الله طرح الشجر السنه دي تقريبا رجع لنا الامل تاني في العمار بتاع زمان.......وباذن الله الناس خلاص الناس تقريبا استوعبت الدرس كويس وباذن الله المشمش هيرجع احسن من الاول بس مسألة وقت فقط

وشكرا للاستاذ عمر

كان هذا ردي عندما قرأت القصيدة لأول مرة ياأستاذ عمر

ولأجلك أعيد الرد مرة ثانية كما أعدت نشر القصيدة

ذلك لمكانة الشجرة العمارية الهوية , ومكانتك الغاية بقلبي

أهديك أول اعمال الغربة التي كتبتها ردا على موضوعك

لا تمحو عنه هويته.!!