الانفلونزا المستجده فى الانسان [ انفلونزا الخنازير ] ..الحالات

بسم الله الرحمـن الرحيــم ...

السلام عليكم ورحمة الله وبركاته ...

الموضوع مش جديد والكلام عليه كتير والحملات موجوده فى كل قنوات التليفزيون والصحف والمجلات ...

بس زى مالاعلانات بتقول ... مش كل الناس عارفه ايه الوباء ده ..

ومش كل الناس عارفه تعالج او تحمى نفسها ازاى ...

ومش كل الناس تعرف ازاى انها مصابه بالفيرس ده ...

حاولت اجمع اكبر قدر من المعلومات دى وانى اقدر اوصلها لو لشخص او اتنين او حتى 10 اشخاص بس ميعرفوش ايه المرض ده ...

واللى هيعرف هيقول لغيره وبالتالى الناس كلها هتفهم وتحس باللى الناس دى بتحاول توصله لينا عن طريق وسائل الاعلام

واللى احنا اول ما بنشوف الاعلان بنقول [ يييه ماتنجز ياعم خلينا نكمل المسلسل ]

-----

الأنفلونزا المستجدة فى الإنسان A/H1N1

التعريف بالمرض مش صعب ومش محتاج كلام علمى ولا موضوعى بطريقه صعبه على الناس انها تفهمها ...

باختصار هو انفلونزا عاديه زى الانفلونزا الموسميه اللى بتيجى للبشر بس دى
للخنازير وبتتنقل بينهم بشكل عادى وبتتنقل للانسان عن طريق الاختلاط
المباشر بالخنازير

وبتتنقل بين الانسان والتانى عن طريق النفس والاحضان والرذاذ من الحكه او العطس ...

...

مادام هى عاديه كدا وبتحصل على طول ... اشمعنا المره دى يعنى الخطر ده كله والتوعيه دى كلها !!!

منظمه الصحه العالميه اكدت ان الانلفونزا المره دى مش عاديه ... مش هى بتاعت كل سنه

المره دى النسخه من المرض مختلفه .... بمعنى انها بتحتوى على جينات مشتركه
بين انفلونزا الخنازير المعتاده وانفلونزا الطيور القاتله وفى نفس الوقت
انفلونزا البشر العاديه ..

وبالتالى هى اكثر خطوره من اى موسم ومن اى سنه ...

ما مدى خطورة إنفلونزا الخنازير؟

تسبب إنفلونزا الخنازير أعراضًا مشابهة للإنفلونزا الموسمية العادية التي
تصيب الإنسان، ومنها الحمى والسعال وآلام الحنجرة والمفاصل وموجات البرد
والإعياء. ومعظم الأعراض الناتجة عن إنفلونزا الخنازير حول العالم تبدو
خفيفة، إلا في المكسيك حيث أدت إلى وفاة العشرات...

بس مش معنى ان المرض كان قاتل فى المكسيك انه هيبقى كدا فى باقى الدول او
فى مصر خصوصا ... لحد النهارده محدش عارف سبب ان المرض كان قاتل بالنسبه
دى فى المكسيك

بس معظم الاراء تتجه نحو الموقع الجغرافى او ممكن السبب الاكتر هو ان
اكتشاف المرض كان متأخر شويه هناك بعد ماصيب بيه نسبه كبيره من الناس
لأنها اول دوله اكتشف فيها المرض ... فمكنش فيه وقتها توعيه ولا احتياطات
لظهور حاجه زى دى فى العالم ...

انا يمكن بقول الكلام ده عشان الناس مش تقلق وتخاف من المرض ده وتحسس
نفسها انها معرضه للموت ... ولكن الحرص واجب علينا كلنا عشان سلامه الكل ..

----

ماهو الوضع الحالى فى مصر والعالم بالنسبه للوباء الحالى .... حتى 13 سبتمبر 2009

الوضع فى مصر اولا ::

بلغ عدد الحالات المؤكدة لانفلونزا (H1N1) A في الجمهورية الي "879" حالة

-- 47.4 % من الحالات أقل من 20 سنة
-- حوالي 7.5 % من اجمالي الحالات اكبر من سن 45 سنة
-- لايزال الفيروس حتي الآن لايسبب تطور حاد للمرض أو مضاعفات خطيرة
--
تم رفع درجة الاستعداد القصوي وحشد جميع الامكانيات علي كافة المستويات
واتخاذ كافة الاجراءات الاحترازية و الوقائية للكشف المبكر عن أي حالات
أخري والحد من انتشار المرض.

تم حتى اليوم شفاء كامل لعدد "772" حالة والباقى حالتهم الصحية مستقرة

عدد حالات الوفاة ( حالتين )

وده صوره من الحالات دى .. تاريخ الاصابه وتاريخ العزل وهل الشخص ده مصرى او لأ وقادم من الخارج ولا لأ ...

[ندعوك للتسجيل في المنتدى أو التعريف بنفسك لمعاينة هذه الصورة]

---

الوضع العالمى ثانيا :-

عدد الدول التى ابلغت عن حالات مؤكدة : 193دولة
إجمالى عدد الوفيات على مستوى العالم : 3607حالة
منطقة الشرق المتوسط :
حتى تاريخ 13 سبتمبر2009 تم الابلاغ عن 9996 حالة بشرية مؤكدة معمليا من عدد 21 دولة من دول المنطقة متضمنة عدد 85 حالة وفاة بمعدل وفاة 0.8% ( منهم 26 حالة وفاة بالمملكة العربية السعودية و 21 حالة وفاة فى اسرائيل و 12 حالات وفاة فى عمان حيث يمثل عدد حالات الوفاة للثلاث دول بنسبة 69% من اجمالى حالات الوفاة بالاقليم )

ودى صوره من توزيع حالات الوفيات بالعالم كله

[ندعوك للتسجيل في المنتدى أو التعريف بنفسك لمعاينة هذه الصورة] هذه الصورة تم اعادة تحجيمها . الحجم الافتراضي لها هو 960x720.

-----

طرق الوقايه والعلاج ..

قبل اى حاجه لازم لما حد يشعر بأى اعراض من اللى ذكرتها فوق مش يطنش
ويقولك ده شويه بردو وهيروحوا ... الكشف مش هيضرك فى حاجه بالعكس ده
هيحافظ على صحتك

-
المريض لازم يكون فى مكان جيد التهويه عشان الرذاذ اللى يخرج منه وقت
العطس او السعال ميبقاش مركز فى المكان اللى هو فيه وبالتالى ميبقاش عملنا
اى حاجه ..

- التهويه الكامله
للمكان اللى فيه المريض او اللى احنا شاكين انه تعبان ... يعنى مش الاوضه
اللى هو فيها بس .. لا البيت كله لازم يتهوى كويس ...

-
عدم الاقتراب من المريض لأن المرض بيتنقل عن طريق الرذاذ ده او ممكن لو
النفس كمان لو كنت قريب منه اوى ويفضل ان يكون فيه منديل او اى واقى على
فمه وانفه وهو موجود فى غرفته عشان الرذاذ ده مش ينتشر فى البيت ...

-
اذا كنت عايش وتقيم فى منطقه فيها المرض او ظهر فيها حالات من المرض يفضل
الابتعاد عن التقبيل للأشخاص وليس المقصورد طبعا البرود العاطفى فى
التعامل مع الاشخاص ولكن دى طريقه من طرق الوقايه المهمه جدا ...

- فى حاله شعور الشخص بالاصابه يجب عدم الخروج من منزله حتى لايتسبب فى انتشار المرض بين الاخرين ..

-
غسل اليدين جيدا بالماء والصابون بعد كل مره يعطس فيها الانسان او يسعل
فيها ... ولذلك لأن اليدين هى اقرب طريق لتوصيل المرض .. واكثر المناطق
التى تستقبل المرض هى الانف والفم والعين ..

----

ملحوظه مهمه لناس كتير بتقلق منها وناس كتير اتكلمت عنها ...

سؤال بيتردد كتير ... ياترى لو كلنا اى لحوم خنزير او مشتقاتها بعلم او بدون علم .. هل ممكن ان ينتقل لينا المرض ؟؟؟

الكلام ده مش صحيح بشكل كبير جدا .. بمعنى ان اللحوم دى او مشتقاتها مش
بتنقل المرض للأنسان عند اكلها لأن الفيرس مش بيستحمل درجه حراره اكتر من
70 درجه سليزيوس وهى دى الدرجه او اقل كمان من الدرجه اللى احنا بنستخدمها
واحنا بنطهى اللحوم وبالتالى لو فيه فيرس فبيموت من درجه الحراره دى ...

----

الاسأله كتير والكلام كتير ويارب يكون فيه ناس فهمت المرض وعرفت تتعامل
معاه ازاى وتقدر تنصح بيه الناس التانيه اللى متعرفش هو ايه ..

ياريت الناس تبلغ لو فيه مشكله مش شخص معين

الخط الساخن لوزاره الصحه m]105 ] او اقرب دكتور او اى مستشفى ... اتصل عشان تتابع وتتطمن على صحتك ...

-----

مفيش داعى للقلق ولكن الاحتياط واجب ... كل الحالات تقريبا اتعالجت بس ده عشان الاكتشاف المبكر للحالات

ولو الاكتشاف ده متأخر .. ربنا يعلم ايه المخاطر اللى هتحصل ...

الرعايه موجوده والعلاج موجود مش ناقص غير التبليغ عن اى حاله والحرص والاحتياط والحد من الانتشار

وبالتوفيق ان شاء الله وربنا يبعد الخطر عن العالم كله ويقضى على المرض ده ...

» جهاز للكشف عن انفلونزا الخنازير.
» انفلونزا الخنازير - شعبان عبد الرحيم‏
» كارثة بكل المقاييس عن انفلونزا الخنازير لو هذا صدق
» مضاعفات لقاح انفلونزا الخنازير تؤثر على الاطفال.
» هروب تلاميذ مدارس العمار من حقنه التطعيم ضد مرض انفلونزا الخنازير