الغش في الماجستير والدكتوراة

مش عارف أقول أيه بس لازم اتكلم علشان فعلا حرام

جوايا هم كبير وعايز افضفض لإني فعلا تعبان

يمكن في مشاكل كتير من حولنا لكن ساعات بنحاول نحل وساعات بنكبر دمغنا

وساعات بنحلها فعلا لكن ساعات بتبقي المشكلة ملخبطة ومتعبة ومقززة ولا انت عارف تحلها

ولا حتي عارف تحاول .. فبتكتفي إنك تتكلم وتخرج اللي جواك وخلاص يمكن فعلا تستريح

السنة دي تعتبر السنة الثانية ليا في الماجستير في جامعة (...والله قرفان أكتب أسمها....)

ومريت لحد دلوقتي بـ 45 ساعة إمتحانات وباقي 3 ساعات يعني إمتحان واحد علشان اكمل اخر مستوي

معايا حوالي 25 باحث في درجة الماجستير فضلا عن طلبة الدكتوراه

أسوء 45 ساعة في الدنيا هما الـ 45 ساعة دول

كلهم غش وكدب وقرف

عايزكم تتخيلوا إن المعيدين والدكاترة بتوع الكلية هما اللي بيمتحنوا واللي بيراقب عليهم ميين ؟؟

اللي بيراقب عليهم موظفين الكلية نفسها

يعني المعيد والمدرس المساعد اللي الموظف بيقف له وبيخاف منه دلوقتي الموظف الغلبان هو اللي بيراقب عليه

يعني طلع الكتاب زي ما أنت عايز ..

يعني طلع برشام كما يحلو لك ..

يعني إستخدم الموبايل زي ما تحب

يعني من الاخر إنت قاعد في بيتكم وأكتر وعيش بقي يا عمنا

نقدر نقول انها حاجة قرف .. حاجة تكسف .. حاجة زفت

قول زي ما تقول

والله يا جماعة بتبقي في حلقات لتبادل الأراء والنقاش داخل الإمتحان

والموظف الغلبان هيعمل أيه أهو يتفرج ممكن يهزر جايز يجيب شاي ونسكافيه وماله

وعلي عينك يا تاجر

وكل ده عادي ومكنشي فارق معايا لإني كنت بحل أحسن من اللي بيحل بكتب

لإن الإمتحانات بتاعتنا مش بتيجي وتقول عرف وإذكر

الإمتحانات بتبقي بنظام تاني يعني ممكن تلاقي كل الإجابات مختلفة عن بعضها وكلها صح

واللي بيحصر نفسه في كتاب أو مزكرة ده بيبقي الفاشل الخايب

وكل ده عادي

لكن المرة دي مبقاش عادي

بجد قرفت وزهقت من اللي بيحصل

كنا بنقعد في المدرج الكبير فكنت ممكن تاخدلك جنب في أي حتة وتحل وتركز وتكتب زي ما انت عايز

لكن المرة دي الإمتحان في معمل صغير

المفروض انه في ديسكات بيقعد فيها واحد بس في لجان الإمتحانات العادية

لكن المصيبة احنا بنقعد ثلاثة مع بعض

يعني 3 ورقات إجابة مفتوحين علي بعض

يعني إنت قاعد وبق اللي قدامك في قفاك ودماغ اللي قدامك في وراقتك واللي جنبك عايش معاك الكلمة بالكلمة

يعني لو انت مركز وفي واحد هرش ممكن يضربك بالكوع ويخرجك عن تركيزك غير انك تلاقي اللي باصص في

وراقتك ومستحيل طبعا تركز وحد باصص في وراقتك

والكارثة إن اغلبهم بنات

والله يا جماعة أول الإمتحان ما بدأ لقيت الهانم اللي جنبي بتقولي لو سمحت راقبلي الباب للدكتور يدخل علشان عايز اطلع ورق

يخرااااااااااااااابي دا انا كنت هتشل والله عايز اقولها هو انا هشتغلك نادورجي يا........

أقسم بالله ولا سوق الإتنين حاجة في منتهي القرف

احاول أركز مفيش أعصر مخي إني أركز ألاقي اللي قدامي ملفوت وباصص في ورقتي أركز تاني

ألاقي واحد ظريف بيهزر وبينكت أركز ألاقي حلقة بحث مفتوحة وراي

والمشكلة ان مفيش مكان تاني ممكن تروح تقعد فيه

والله العظيم حاول تتخيل معايا إنك عارف الإجابة بس مش عارف تصيغها وتكتبها لإنك مش عارف تركز

والكلام عمال يطير مني وعمال أسد في وداني بمناديل وبردوا مش قادر اركز وعدي الإمتحان علي خير

وربنا يستر لكن إمتحان النهاردة اللي كان اسوء إمتحان عدي علينا لإنه تقدر تقول السهل الممتنع أو المشتبهات

أو الحاجات اللي تلخبط جدا ومتلقيلهاش حل هو كان كدا

وللأسف كلهم كانوا بيستعينوا بالوسائل المعينة كتب ومزكرات وبرشام ووووووو

وانا من ناحية مش عارف أركز ومن ناحية الإمتحان صعب ومش عارف احل

المهم حليت اللي فيه النصيب وخرجت في نص الوقت وانا هتشل من اللي بيحصل والغش اللي شغال علي ودنه

وربنا يستر عليا لإن المادة هتأخرني سنة كاملة ويبقي عوضنا علي ربنا

أسف علي الإطالة بس كان لازم أتكلم علشان كنت معبي أووووووووي وهطق

لا تعليق
لأن التعليق سيذيد الطين بله وانت مش ناقص
ممكن أفضفض انا كمان بسى بعدين
على أى حال كان الله فى العون وبالتوفيق وهى دى مصر

هون عليك ياعم أحمد

بموت يا مصر المنباعه

وربنا أكيد هيعوض

وكل امرئ بما كسب رهين

ربنا معاك يادكتور

وربنا يوفقك

حسبى الله ونعم الوكيل

المفروض ناس محترمه من جامعه تانيه او اداره الجامعه

هى اللى تيجى تراقب عليكم

المهم حاول تركز انت على قد ماتقدر وربنا معاك

طبعا اغلبنا فى الجامعه واللى خلص يعرف انها

كوووووووووووووووووووووووووووووووووسه

خلى عندك حسن ظن بالله وان شاء الله خير

هون على نفسك يا ابوحميد

مافيش حاجة ف الدنيا تستاهل تكشيرة ذرة من جلد وشك

الكبير ليه اللى أكبر منه

إرمى حمولك على ربنا وهو هيسهلهالك

وإعرف إن حالتك ماتساويش ربع حالات ناس تانية عايشة بس نفسها تبطل تعيش

الحمد لله

زائر

أولاً فرج الله همك
لكن خليك واثق فى ربنا وفى نفسك إن إن شاء الله ربنا هايكرمك
وإن شاء الله الله تعبك مش هاروح عليك
كلامى مش جبر خواطر والله
لكن ربنا قال ( إن الله لا يضيع أجر من أحسن عملاً ) .. وده أحلى ما أهديه لك الآن
ثانياً علشان تبقى عارف شغل الفتاكة والغش والـ 7 ورقات والله ربنا مابيبارك فيه
ده حتى اللى بيذاكر كويس قوى وفاكر يعنى إنه ده مجهوده ربنا مبيكرموش
لإن كل اللى العقل قدر يستوعبه ممكن ربنا يمسحه كله بقدرته لو نسى الانسان إن اللى
أعطاله القدرة والهمة فى الاستيعاب هو ربه ..
برضه عشان ماتطولش عليك .. انت واحد من الناس اللى بتجد وبتتوكل على الله
فارمى حمولك على اللى خلقك ..

أختم بحديث جميل للنبى عليه الصلاة والسلام :

( المؤمن القوى خيرٌ وأحب الى الله من المؤمن الضعيف ، وفى كلٍ خير ،
احرص على ماينفعك + واستعن بالله + ولا تعجز .. وإن أصابك شىء فلا تقل :
لو أنى فعلت كان كذا وكذا ، ولكن قل قدر الله وماشاء فعل ، فإن لو تفتح عمل الشيطان )

بالتوفيق يا حبيبى

السلام عليكم ورحمة الله وبركاته
كمل يا استاذ احمد بعزيمه ويقين بالله
وخلى ثقتك بالله كبيره
ولازم تواجهه مشاكل من اجل تحقيق حلمك
ودى الطبيعى لان انت فى
الدنيا ( دار الابتلائات) مش فى الجنه (دار النعيم)
والحمد لله انت يتوفر فيك
التوكل على الله وحسن الظن بالله
فلا تياس
فمن توكل على الله كفاه
واستمع الى هذا المقطع
واعلم ان ما انت فيه هين ويسير
ــــــــــــــــــــــــــــــــــــــــــــــــــ

ربنا يطمنكم بجد

الحمد لله على كل حال ياستاذ احمد وفى الموافق دى بقول قدر الله وما شاء فعل

وبتذكر الايه الكريمه وعسى ان تكرهوا شيئا وهو خير لكم وعسى ان تحبوا شيئا وهو شر لكم

والله يعلم وانتم لا تعلمون صدق الله العظيم

لانى محدش يعرف ربنا مخبيى له ايه فى الغيب يمكن دة خير ليك واكيد خير لانى لايقضى الله

قضاء لعبدة الا وكان خير ليه يعنى تاكد مليون فى المائه ان دة خير ليك اكيد

بجد انا مستغربتش نهائى لما قريت كلام دكتور عبدالغنى انا لو كنت قريته وانا فى الدراسه العاديه

كنت استغربت لكن بعد اللى شوفته وعشته فى مرحله الدرسات دى خلانى مستغربش من كلام

دكتور عبدالغنى لانى دة الحال فعلا واللى انا بشوفه دلوقتى فى الكليه اكثر من كدا

انا حرضت من اسبوع مناقشه ماجستير لواحد اسمه احمدرمضان على ما اتزكر الدكتور حكم علينا

نحضر المناقشه بتاعته وحضرنا فعلا والله انا مش عايزة اقولكم مدى الظلم اللى بيحصل معرفش

ازاى يعنى حضور 3 دكاترة منهم دكتور سلمان مصطفى غنى عن التعريف طبعا لجامعه بنها

ودكتور مستدعينه من جامعه طنطا اسمه دكتور السيد السقا على ماتزكر بجد حسبى الله ونعمه

الوكيل على اللى حصل للولد دة انا انقهرت للولد دة سلف والله يعنى غلطات تتاخد

فى الرساله بتاعته لا تزكر والله لا تزكر معرفش يعنى كانهم بيتلككه انه مياخد الماجستير

والله ضحكت فى المناقشه وقولت لنفسى فعلا شر البليه مايضحك

يعنى تحبوا تضحكوا غلطه من الغلطات بيقلوله انت فى صفحه تكتب الالف بهمزة

وفى صفحه تانيه من غير همزة دى من الغلطات وفى المقدمه طبعا بتنكتب ايه من القران

طبعا هو كاتبها فى صفحه فى المقدمه بيقلوله مش ضرورى تنكتب فى صفحه لوحدها يعنى كانت

ممكن تبقى فى المقدمه فوق وخلاص سيبنا من دى اللى كان هيجبلى شلل وانا قاعدة

بيقوله ايه المفروض بعد انا تكتب الايه تكتب تحت رقم الايه واسم الصورة ودى كلها غلطات

بتحسب على الباحث فى رسالته دى طبعا غلطات انا بزكها كحاجات عاديه ومش راضيه ازكر

حاجه من التعليقات التجاريه واللى قاله عليها غلطات عشان محدش هيفهم كلامى غير لو خريج

تجارة دى غلطات بزمتكم لو سمعتوها مش تقموا تموته الدكتور

يعنى واحد طلع عينه ودفع دم قلبه وفى الاخر يشركوا الرساله بتاتعه فى المناقشه على حاجات

لاتزكر اصلا والله العظيم

طيب والنبى فين الدكتور اللى كان معاة وباشر معاة الرساله والله انا قومت من المانقشه

كنت هعيط على الولد دة وعلى حالنا وقولت لو كان ليه وسطه كانت اتبخط من زمان

زى اللى شوفنه فى مناقشه قبل كدا بس لواحد عمه دكتور هناك

بجد فعلا عظيمه يامصر والله ودة بره حال الكل

اخت طير فى خطأ غير مقصود
فى

اقتباس :: وبتذكر الحدث الشريف وعسى ان تكرهوا شيئا وهو خير لكم وعسى ان تحبوا شيئا وهو شر لكم

والله يعلم وانتم لا تعلمون

والصحيح
ان دى ايه فى كتاب الله
فى سورة البقره

{وَعَسَى أَنْ
تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا
وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
[البقرة: 216]}.

انا أسف والله علي جو الغم اللي عملته ده يا جماعة

وألف شكر ليكم جميعا .. ا/ مسعد النجار وم/ أحمد عبد العزيز وا/ صبحي أبوزيد وم/ أحمد عبد المجيد

ود/ إيهاب ود/ عبد الغني وأخويا العزيز محمد سمسم أ/ الطير الباكي أ/ سعيد

وشكرا علي النصايح الجميلة دي

واسف إني قلبت عليك المواجع يا دكتور عبد الغني ياااااااااااااه دا أنا الحمد لله في خير كبير وانا مش واخد بالي

وبجد مش عارف لو مريت باللي حضرتك بتوصفه ده انا ممكن أعمل ايه

الحمد لله علي كل حال وإن شاء الله خير

والنهاردة والله جتلي فكرة إننا ممكن نعمل رابطة لطلبة الدرسات العليا في العمار

ونحاول ندمج فيها كل دكاترة وأساتزة الجامعات والحاصلين علي دكتوراة وماجستير في العمار

ومن خلال الرابطة ممكن نساعد أي باحث عماري ونقف جنبه وكمان ممكن من خلال الدكاترة والأساتزة

نوفرلهم الدعم المعنوي (الواسطة) ومبقاش عيب خلاص اننا نقول واسطة لإنها فعلا بقت

ماشية كدا ..

وكل اللي بيحتاجه الباحث هو النصيحة والمساعدة في إختزال الوقت الضايع ومفيش باحث بيحتاج أكتر من كدا

وإن شاء الله خير

» بريطانيا تمنح درجة الماجستير في الفيس بوك
» فؤاد الغش
» فوائد الغش فى الامتحانات
» فوائد الغش ! وبالتوفيق للجميع
» الغش على الطريقه اليابانيه ....فكره جامده.