هل يفعلها الحاج خالد عبد العزيز علام ويترشح لمجلس الشعب ..؟!

عنوان موضوعى سؤال طرحته على العديد من اهل العمار فى محاوله لمعرفه رأى الناس فى هذا الموضوع الهام جدا والذى بدأ يظهر بقوه فى الفتره الماضيه وخصوصا بعد المؤتمر الجماهيرى الكبير الذى نظمه الحاج خالد لمرشحى الشورى والذى يتم لاول مره فى العمار اعلم جيدا ان الحاج خالد اقام هذا المؤتمر بحكم انه أمين الوحدى الحزبية فى العمار غير ان الكثير قال ان اقامه هذا المؤتمر فى هذا التوقيت ما هو الا – قدم السبت تلاقى الحد قدامك – وانا مع هذا الرأى لا أعلم لماذا ولكنه مجرد احساس داخلى . هذا الاحساس الذى عمل على زيادته بقوه ان اسهم العميد محى داخل العمار بدأت فى الانخفاض بشكل غريب خصوصا انه لم يقدم للعمار ولا الدائرة ما كان متوقع لذلك دار بداخلى العديد من الأسئلة ...
هل يفعلها الحاج خالد علام ويترشح لمجلس الشعب ..؟؟؟
وهل لو حدث سيسانده الناس بقوة ...؟؟؟
وهل سيكون لوجود عضو مجلس شعب ومرشح للمجلس القادم – العميد محى عبد العاطى – اى تأثير على هذا الموضوع ...؟؟؟
وما رأي شباب المنتدى فى هذا الموضوع ...؟؟؟
وهل أنت مع الرأى القائل بأن العميد محى عبد العاطى لم يقدم ما كان منتظر منه لذلك سيكون الامر سهل نسيبا للحاج خالد ...؟؟؟
هل ستنقسم العمار على نفسها الى نصفين مؤيد للعميد محى عبد العاطى ومساند للحاج خالد ..؟؟؟
وهل من الممكن ان تتكرر مأساة 2000 ....؟؟؟؟
وهل من الممكن – فى حالة ترشح الحاج خالد – ان يتنازل الحاج خالد لسيادة العميد او العكس ...؟؟؟؟
هذه الأسئلة وغيرها كثير جدا دار بداخلى واردت ان اعرف رأى شباب العمار فيه ودعونا نتخيل شكل العمار بعد قرابه اربع اشهر وقت انتخابات الشعب ان شاء الله منتظر تعليقاتكم على هذا الموضوع ومعرفه رأيكم فيه وهو مجرد تخيل او توقع لما ستسفر عنه الايام ..؟؟؟

لية لأ

كل واحد شايف نفسة مناسب للمكانة دى ميترددش للترشيح

بس المهم انة يكون قد المسؤلية

وكل دة لمصلحت البلد

هو دا استبيان ...؟؟؟

عمتا لو دخل ..وكان افضل المرشحين ..اكيد هنتخبه

مصلحه البلد إن يكون فيها مرشح واحد ..وطبعا معروف .. يبقى لو حصل يبقى فين مصلحه البلد .

ليه لا

اللى فى مصلحة العمار واهلها ننتخبه

والله يامارو انا قلقان جدا من الموضوع ده
وحاسس ان فى مشاكل كتير هتحصل
لان سامع ان فى اربعه من البلد هيترشحوا
د/ شوقى الكردى
عميد /محى عبد العاطى
الحاج /خالد عبد العزيز
الاستاذ /صلاح عبد العظيم

ومش عارف بلدنا هتستقر على ايه
وايه الى هيحصل الفتره الى جايه
وخايف الخلافات تكتر

هو حق مكفول للجميع بموجب الدستور

اعتقد ان الموضوع دا غاية في الخطورة ويفتح باب الفتنة على مصرعية في البلد وارى ان نقفل هذا الباب فى اسرع وقت منعا لعواقب وخيمة من الممكن ان تحدث كما ان العميد محيي لم يأحذ فرصتة كاملة ولا يمكن الحكم علية فى هذة الفترة القصيرة ومن الظلم ان نحملة ما لا طاقة له به كما انه من المرجح جدا ان يكون العميد محيي هو مرشح الحزب القادم وعلية فان فرصتة في الفوز ستكون كبيرة جدا كما اني اعتقد واجاد اجزم ان الحاج خالد عبدالعزيز من الصعب ان يوافق على مثل هذا الراى فالرجل اذكى من ان يدخل البلد في فتنة اكيدة الحدوث اذا ترشح يعلم هو قبل غيرة ما يمكن ان يحدث من مشاكل بسببها لذا فارجو من الجميع ان يتكاتف لدرء هذة الفتنة حتى لا نفقد مقعد شبة مضمون باذن الله في المجلس القادم "والا احنا مالناش في الطيب نصيب"!!!!!!

هل يفعلها الحاج خالد عبد العزيز علام ويترشح لمجلس الشعب ..؟!

الحج خالد ليس متواجد فى هذا المكان

اذن لن تجد الاجابه هنا

ستجدها

مكان تواجد الحج خالد

انتظرت حتى استمع واستمتع باراء احلى شباب فى الدنيا شباب العمار

تعقيب بسيط الاول على رد على الدكتور على لما قال

اقتباس :: واجاد اجزم ان
الحاج خالد عبدالعزيز من الصعب ان يوافق على مثل هذا الراى فالرجل اذكى من
ان يدخل البلد في فتنة اكيدة الحدوث اذا ترشح

كلام غير صحيح بالمره مع خالص احترامى للدكتور على

لان الحاج خالد بنفسه قال ان مسأله ترشحه لمجس الشعب فيها تفكير وده قاله

مع مصطفى فتحى فى برنامجه بلدى الحلقه بتاع انتخابات الشورى

لو حضرتك رجعت ليها هتسمعه بنفسك بيقول

ان فى تفكير فى موضوع الترشح فى مجلس الشعب ...

وتعقيب اخر على محمد مختار

اظن ان الاستاذ عمرو لما عمل الموضوع كان مجرد تخيل لما سيكون

يعنى الموضوع ليس سؤال بمعناه العام ولكن هو مجرد وجد تصور للعمار خلال الاربعة

اشهر القادمه فهمت يامحمد ولا اقول تانى ...ههههههههههههه

تعقيبى على الدكتور على والاستاذ محمد مختار تعقيب شخصى

مع خالص حبى واحترامى وتقديرى لهما وهما يعلمان مكانتهما عندى

ويبقى تعقيب ورد صاحب الموضوع

بخصوص الموضوع بقى

زى ما قال كل الشباب الموضوع حساس جدا وشائك وهام للغايه

وموضوع ترشح الحاج خالد او غيره من ابناء العمار

اصبح علامه استفهام كبيره

الحاج خالد لم يعلن الترشح بشكل رسمى ولكن نقول ماذا لو أعلن

فى ظنى ان العمار ستنقسم كما هو متوقع وهيكون فى مشاكل كبيرة اوى وتخوف اكبر

من تكرار كارثة 2000 زى الاستاذ عمرو ما قال

لكن خلينى اجاوب على تساؤلاتك افضل

اقتباس :: هل يفعلها الحاج خالد علام ويترشح لمجلس الشعب ..؟؟؟

من وجهه نظرى واحساسى الشخصى البحت ( نعـــــــــــــــــــــــم)

اقتباس :: وهل لو حدث سيسانده الناس بقوة ...؟؟؟

على الاقل سيضمن مسانده عائلتها وهى احد اكبر عائلات العمار

واعتقد ايضا ستنقسم العمار نصفين كما حدث من قبل عام 2000

اقتباس :: وهل سيكون لوجود عضو مجلس شعب ومرشح للمجلس القادم – العميد محى عبد العاطى – اى تأثير على هذا الموضوع ...؟؟؟

هى دى النقطه الخلافية واللى هترجع لعلاقه الرجلين ببعض

وهما من كبار رجلات العمار وعلى اساس علاقتهما تتحدد اجابه تسؤلك

اقتباس :: وما رأي شباب المنتدى فى هذا الموضوع ...؟؟؟

رأيى المتواضع انه فى حاله ما رشح الحزب الكابتن محى

لابد ان تكون العمار بأسرها خلفه لانه وقتها سيكون الاقرب للفوز او ان شئت قل التعيين

اقتباس :: وهل أنت مع الرأى القائل بأن العميد محى عبد العاطى لم يقدم ما كان منتظر منه لذلك سيكون الامر سهل نسيبا للحاج خالد ...؟؟؟

من الصعب والظلم ان نقيم الكابتن محى فى هذه المدة القصيرة جدا

ولابد وان نعطى الرجل فرصته الكاملة

اقتباس :: هل ستنقسم العمار على نفسها الى نصفين مؤيد للعميد محى عبد العاطى ومساند للحاج خالد ..؟؟؟

ده شيىء طبيعى جدا ومتوقع كما اجبت سابقا

اقتباس :: وهل من الممكن ان تتكرر مأساة 2000 ....؟؟؟؟

تبقى دى بقى المصيبة الكبرى ولكنى اظن انها صعب التكرار

لان الناس اتعلمت من الدرس وعرفت النهايه من الاول

اللى الحزب هيرشحه هيتعين وخلاص وبلاش وجع دماغ بقى

اقتباس :: وهل من الممكن – فى حالة ترشح الحاج خالد – ان يتنازل الحاج خالد لسيادة العميد او العكس ...؟؟؟؟

أجبت مسبقا على هذا التساؤل وكما قلت تعود لعلاقة الرجلين الشخصية

برنامج بلدى .. قريبا جدا

طبعا انا بشكر كل اخوتي من شباب العمار المثقف واريد ان اوضح ان هذا الموضوع ما هو الا تخيل لما سيحدث مستقبلا ولا اريد عمل فتنه لا قدر الله واوجه جزيل الشكر لكل من رد علي هذا الموضوع واوجه شكرا خاصا للأخ احمد السيد علي الردود المقنعة من جانبه
ولكن يبقي لي سؤال واحدا بصراحة لم افهم رد اخي الصغير مصطفي فتحي
ويبقي لي رأي واحد الا وهو اذا تم ترشيح العميد محي عبد العاطي من قبل الحزب الوطني فنحن جميعا معه واما ان لم يتم ترشيحه فلنا حرية الاختيار

اقتباس :: ولكن يبقي لي سؤال واحدا بصراحة لم افهم رد اخي الصغير مصطفي فتحي

مش محتاج .؟؟

اكيد الحلقه الجايه عن الموضوع دا...

معلش اصل انا فهمي علي قده

اقتباس :: معلش اصل انا فهمي علي قده

بعتذر . لغلاظة اسلوبى معك

فعلا ياعم عمرو سمعت

ان مصطفى وزيزو بيجهزوا لحلقة كبيرة جدا

عن الموضوع ده او عن الانتخابات بصفه عامه

وننتظر بشوق ليها ان شاء الله

وزى ما انا علقت قبل كده الموضوع مش فتنه ولا غيره

زى عمرو ما قال كل الموضوع تخيل وتصور وليس اكثر

وربنا ييسر الايام اللى جايه تكشف لينا كل اللى غايب عننا

مش ممكن يكون مستنى منصور يدخله الحزب

احنا أخيرا بقى عندنا عضو مجلس شعب
بعد صبر و عذاب و أهوال حصلت لبلدنا بسبب الانتخابات
يبقى نحافظ عالكرسي ده لمصلحة بلدنا و لا نضحي بيه بسهولة كده
آه معاكم اننا لسة ما شوفناش اللي تمنناه من الكابتن محيي
بس احنا بنتكلم عن عضو مجلس شعب لفترة زمنية قصيرة جدا ما يلحقش يعمل فيها أي حاجة
مش هنقارن بين عضو مجلس شعب بقاله أربع سنين عرف فيهم ازاي يمضي وزير أو يجيب قرارات علاج أو يجيب خدمات أبسهولة و بين عضو مجلس شعب لشهور لسة قدامه يتأقلم مع الوضع و يعرف المجلس ماشي ازاي و الخدمات بتتجاب ازاي

و لو دخل حد من البلد الانتخابات يبقى بيشتت الأصوات و بيقول فيها لخفيها
و يبقى ضاع الكرسي اللي ممكن نستفيد منه جدا لمصلحة بلدنا و لمصلحتنا كلنا

أما بالنسبة للحاج خالد فهو قالها صريحة من السفه و قلة الوعي اني أدخل من غير ما يكون الحزب مرشحني لأن كلنا عارفين ان اللي الحزب هيرشحه هو اللي هينجح
فلو الحزب رشحني هدخل الانتخابات و لو مكنش يبقى بضيع وقتي و فلوسي

اقتباس :: و لو دخل حد من البلد الانتخابات يبقى بيشتت الأصوات و
بيقول فيها لخفيها
و يبقى ضاع الكرسي اللي
ممكن نستفيد منه جدا لمصلحة بلدنا و لمصلحتنا كلنا

هى دى الخلاصه..

متفق جدا مع كلام حبيب قلبى اسلام طلعت

ومن الظلم فعلا الحكم على نائب مجلس شعب لعدة شهور .. لازم يبقى فى مدة كافية للتحرك من أجل خدمة البلد

طبعا الحاج خالد عبد العزيز كإنسان شخصية محترمة وله يد فى العمل العام ..

لكن الأمر الغريب أن كل الناس عاوزة ترشح نفسها للإنتخابات وهو فعلا حق مكفول لهم .. لكن الأهم مصلحة بلدك إيه ؟؟ .. مش مسألة انك معاك فلوس وتقدر تنفق على الدعايا فى الانتخابات يبقى تترشح ..

أما بخصوص تكرار مأساة 2000 .. فهى إن شاء الله لن تتكرر

لأن الناس استكفت بما فيه الكفاية عن الانتخابات .. وصعب جدا ان الناس تنقسم لدرجة حد الموت من اجل مرشحين اثنين يعيشا فى جلباب واحد (العمار)

غير أن الأمر أصبح عند الناس محتوم بفوز الجزب الوطنى دون أدنى شك .. وصعب أنهم يفكروا يشتغلوا فى العملية الانتخابية فى الجبهة المقابلة له ..

شكرا لطرح الاستبيان يا عمرو .. لعله يفيد ف الرأى العام بالعمار

.
.

أنا متفق مع إسلام وعمرو فيما ذهبا إليه
وربنا يولى من يصلح
وقلبى معاك ياكابتن محيى وأنت تصارع الأمواج العاتية هذه الأيام
داخل الحزب وخارجة
وياريت ننظر للأمور بموضوعية شديدة العمار لو إتوحدت هيبقى منها على مدار السنوات القادمة
عضو مجلس شعب دائم
قيمتنا كبيرة عند السياسيين فوق بس إحنا اللى بنضيع أنفسنا مش عارف ليه وفى صالح مين ؟
كامل إحترامى للجميع ولحقهم فى الترشح ولكن تبقى المصلحة العليا للعمار هى الأهم
وهى تصب فى قالب وصالح كابتن محيى وأتمنى التوفيق للحاج خالد فى مكان أخر
شكرا لطرح هذا الموضوع فهو يدل عن وعى شباب العمار

العزيز باشمهندس احمد السيد اشكرك على الرد الجميل ..بس لو فعلا الحاج خالد قال انه ناوى يترشح فعلا فاعتقد انة هيكون الخاسر الاكبر وذلك في حالة عدم كونة مرشح الحزب اما لو كان هو مرشح الحزب فسيكون الامر محسوم فالامور واضحة واظن انتخابات الشورى خير دليل ولا يبقى الا ان نتمنى ان يكون مرشح الحزب من العمار _قولوا يا رب_ سواء كان الكابتن محيي او الحاج خالد و اهى تبقى نفحة من سيد الوطنى والسلام ههههههههه و اعتقد ان الرجلين من الذكاء بحيث لا يقف احدهما امام الاخر اذا كان ايا منهما مرشح الحزب حتى لو كان الاخر اكثر شعبية وقبولا بين الناس ومدد يا سيدي الوطني مدد!!!!!!!!!! وعشان نكون ايجابيين يا جماعة تعالوا ندعي بعد كل صلاة وحتى موعد الانتخابات ان مرشح الوطني يكون احد الرجلين ويبقى ضمنا كرسي البرلمان من غير انتخابات ولا يحزنون!!!!!

اعتقد انى الموضوع مش محتاج دعا احنا لو مفروض ندعى لازم يكون دعاءنا اننا نولى من يصلح
وبعدين السؤال اللى المفروض يطرح نفسه هو ايهما افضل انه يمثل البلد والدايرة فى الانتخابات سواء كا مرشح من الحزب او غيره

ننتظر حلقة برنامج بلدى

الخاصه بالانتخابات فى العمار

وبعدها هيكون فى كلام كتير ان شاء الله

عندما كتبت هذا الموضوع من حوالى 5 أشهر وتوقعت ان يكون هناك صراع فى العمار
فى حاله ما ترشح الحاج خالد
وتناول الجميع الموضوع وظنوا اننى ادعوا الى فرقه فى العمار والى ان يترشح الحاج خالد
وكلامى كله كان فى اتجاه التوقع ليس اكثر
لكن مرت الايام ووجب ان اتقدم باعتذار لللواء محى عبد العاطى على كتابه هذا الموضوع
ليس لانى اخطأت فى كتابته ولكن لاننى لم اتوقع يوما ان يقدم الحاج خالد عبد العزيز
حتى لو ترشح فى المجلس على ما شهدت عليه الايام السابقة
لست فى منبر للتعليق على ما كان من الحاج خالد غير اننى حزين لما حدث
لما كان له من مكانه كبيرة فى قلبى وفى قلوب الكثير واظن انه فقدها بما قام بعمله
سواء بالمقاطعه التامه للكابتن محى وعدم مساندته وهو ابن العمار وكذلك التصرفات الغريبه التى
حدثت يوم الانتخابات الاول والتى يعلمها الجميع ولا داعى لذكرها
لكن كل ما اريد قوله هو اننا بكل ما أوتينا من قوه خلف اللواء محى عبد العاطى فى معركته الانتخابية الكبيرة سواء فاز او اخفق فى الحالتين نحن نحبه ليس لانه محى عبد العاطى ولكن لاننا تعودنا ان نحب وان نخلص وان نعمل جميعا من اجل العمار وأبنائها
وختاما نصيحه منى للحاج خالد اذا كنت تفكر فى خوض الانتخابات الدورة القادمه
انصحك بألا تفعل فلن تجد من شباب العمار او اهلها احدا معك
لم تقدم السبت فلن تجد الاحد فى انتظارك
وشكرا

» رسالة إلى الحاج خالد عبد العزيز
» الأستاذ أحمد يوسف أبو النجا عضوا لمجلس الشعب
» سر اختفاء يفط الحاج خالد عبدالعزيز
» جمال الشاذلى مرشحا لمجلس الشعب
» ماذا لو كان هناك مرشح لمجلس الشعب من امياي ؟؟؟