مسا مسا على كل الناس الكويسة
انا بجد خلاص هنفجر من الى بيحصل ده
مش قادر استحمل اكتر من كده
خلاص مش هقرا جرايد تانى ولا هتفرج على اخبار تانى !!
اتعقدت يا ناس
شوفو الى حصل وقولو من حقى اتعقد ولا لاء
صحيت على الصبح يا فتاح يا عليم يا رزاق يا كريم
وفطرنا وصلينا وظبط الانانى خالص
وجه وقت الجرايد افتح جريدتى المفضلة المصرى اليوم
الاقى خبر غريب ويجيب اكتئاب على الصبح كده
(لم يحتمل البطالة والمرض فترك شكوي إلي الله وقفز من علي كوبري قصر النيل )
لا حول ولا قوة الا بالله
طيب يا عم اقلب الصفحة كده
(بلاغ بتعرض تلميذ للاعتداء الغشى داخل معهدازهرى )
يادى الفضيحة ام جلاجل يادى الجرسة ام حناجل معهد ازهرى
يحدث هذا الفعل القذر فى معهد ازهرى ومن مدرس من المفروض انه يعلم طلابه الدين
واداب الاسلام وعلوم القران الكريم
هذا حدث فى ازهرنا الشريف
وحدث مرتين فى مدرستين !!
بزمتكم مش حاجة تحبط وتجيب اكتئاب
وبعد ما قريت الخبر التانى قلت يا واد كفاية كده غم على الصبح
روح فرفش وشوف اخر اخبار الرياضة ايه والمتشات والاهلى والكلام الى بيفرح الشعوب الحزينة
وبما ان الاهلى استطاع ان ينسى الناس قرف الحياة ويعطيهم جرعة من الفرحة
ويضيف لمصر صاحبة حضارة (السبع تلاف) سنة الكثير من البطولات والالقاب التى تزيدنا فشخراً
بين شعوب العالم الاول والتانى والثالث والرابع كمان !
وقريت خبر بسم الله مشاء الله دب فى قلبى الفرحة والبهجة والسرور
الاهلى هيلاعب بطل اسبانيا برشلونة فى ظل احتفال الاهلى بمرور 100 عام على تاريخ انشائه
وهيدفع لبرشلونة حاجة كده بتاع (ببعتاشر) مليون جنيه قيمة العقد يعنى
وقال ايه ان الاهلى مش هيتكبد المبلغ كله لا ده الشركات الراعية للحدث هتتحمل معظم قيمة المبلغ
يعنى الاهلى هيعمل عيد ميلاده ال100 بكام مليون كده يا سيدى يعمل هو حر! هو احنا بندفع من جيوب ابونا حاجة
المهم !!
سبكم من الاهلى وانا بتفرج على التلفزيون لقيت اعلان ظريف اوى
هو صراحة مش اعلان دول (السبع تلاف سنة ) بيشحتو علشان نعمل مستشفى سرطان الاطفال الجديد
وبصراحة كله شارك فى الشو (الشحاتى ده ) من ممثلين للعيبة كورة لرقصات وكله بسم الله ساهم بكل المستطاع
انه يشحت علشان نبنى المستشفى اتصل على رقم (ببعتاشر زيرو ببعتاشر) وساعد فى بناء المستشفى
المهم سبت الاعلان
ورجت لموضوع الكورة تانى
مبروك للأهلى العب مع برشولونة لمدة ساعة ونص ب كذا مليون كده
وان شاء الله نكسب وويشغلو بعدها اغنية الى بتشتغل بعد كل متش نكسبه دى يلا مش فكرها
المهم مطولش عليكم لقيت ان كل الاخبار على الصبح بقت كأيبة اوى اوى وتجيب الضغط
عندما يفكر احد فى ان ينتحر بسبب الفقر ولأنه لا يستطيع العمل وعلاج نفسه فى وقت فيه
اناس يصرفون الملايين فى التفاهات والاشياء الفارغة
يسمى هذا .....؟
لا يخفى على معظمنا كيف تهدر وتسرق اموال هذه البلد مش هنحكى على القروض ولا بعض رجال الاعمال
الى واكلين البلد بالمحسوبية كل انواع السرقه فعلوها ونعرفها جيدا
وفيه ناس اموات احياء يجدون رغيف العيش بالعافية
شباب تخرج بدون عمل
مستشفيات لا يوجد بها سوى الاهمال والسراير الروبابيكيا والاكياس والاجهزة الملوثة
طعام مسرطن
لبن ببودرة السيراميك
بلاوى وبلاوى وبلاوى
عندى سؤال ؟
هل مصر بلد فقير ؟
لما نفعل الشىء الاقل اهمية قبل الشىء الاهم ؟
لماذ نبنى شىء وبعد ذلك نكتشف انه كان خطء ونهدمه؟
لماذا لا نحاسب كبيرنا قبل صغيرنا؟
ده مش سؤال دول مليون سؤال ؟
هل هناك امل فى مصر افضل ؟
جايز كلامى طلع ملغبط على بعضه شوية لكن علشان دى مش اكتر من فضفضة مع نفسى ولنفسى
انا لا اعرف ماذا كتبت فى الاسطر الفائتة
وكما قال الشاعر العظيم هيمة حنكش
الكلام معلهوش جمرك
وسلام علشان عايز انام
ملحوظة
انا اهلاوى متعصب وبحب النادى الاهلى جدا
لكن ده رأى فى موضوع ما ولا يقل من شأن هذا النادى
يلا بقى سلام علشان انام
وعلى رأى الاستاذ ابرهيم حجازى
وللكلام بقية مادام فى العمر بقية
solo man
موضوع: مسا مسا على كل الناس العمراويه 
الأحد 10 يونيو 2007, 5:38 pm