قصيدة (جرى النعامه في الدوران) - فؤاد حداد
من ديوان (رقص ومغني)
_______
انا مش فاضيه ومش مشغوله
بين الاثنينْ
وانا مش عاقله ومش معقوله
بين الاثنينْ
وانا مش قاعدة ومش منقوله
بين الاثنينْ
يعني ما فيش غير الرقصة دي
اللي ورايا واللي قصادي
في المستقبل والاَّ الماضى
بدي أصالح والاَّ أضادي
فزّ وقال لي جناب القاضى
انا مش فاضى
يا زغلوله
وانا مش فاضيه ومش مشغوله
بين الاثنينْ …
لا بخاطرى ولا غصبٍ عني
انا مش كلمه وشاطر فني
تحت البرج قعد مستني
لما اتألفتْ ولحنني
ماشيه أهز في راسي واغني
عامله كاني
فاقسه الفوله
انا مش فاضيه ومش مشغوله
بين الاثنينْ ….
تركي رقبتي وفْقير هندي
ريشي وهيشي باشا أفندي
رجلي دي إيدي وساقي دا زندي
وانا واقفه فلاحَه وجندي
تعظيم من دا وسلامات من دي
كل دا عندي
عاوزني خجوله
انا مش فاضيه ومش مشغوله
بين الاثنينْ …
لا تدفن راسك في الرملهْ
بعد ما كِمْلت رجعت كاملْهْ
بعد العمله ما عملت عملهْ
واسمي نعأمَّه يبقي نعم لا
وادينْي وخدْ منِّي معامله
سمسمي قمله
في راس الغوله
انا مش فاضيه ومش مشغوله
بين الاثنينْ …
رايحْه وجايه أعيشْ واتمرمط
على نارْ قايده ولا أتنطنط
صحّ في صحّ الزمن اشمانْط
انا راحْ أغلط أغلط واغلط
واتهادي ومنقاري ملغمط
وأمشي ازغرط
لوله لوله لولهْ
انا مش فاضيه ومش مشغولهْ
بين الاثنينْ …
موضوع: قصيدة (جرى النعامه في الدوران) - فؤاد حداد 
الأحد 10 أبريل 2011, 2:28 pm
