قبل الميعاد

قبل الميعاد

وسبقته من قبل الميعاد بساعات

لبست طرحة ملونة

وخلعت من فوق ضحكتى توب السكات

مستعجلة ،،،، متبرجلة

مش عارفه إيه المسألة

مش فاكره غير إنى النهاردة

هشوفه فى نفس المكان

هخرج لسانى للزمان

وهقوله لسه ما بينا مواعيد واتفاق

وإنى معاه همسح بقلبى

كل أحزان الفراق

يغزلى م الفرحة فى إيدى غويشة حلوة

يكتبلى من ضى ابتسامته كلام لغنوة

نغنيها وتسمع لحنها العصافير

ما ترضى تطير

وتطرح فوق شجرنا ورود ملانه عبير

تشمه الأرض تمسك فى طرف توبنا

وتحلف مهما تبعدنا ما هتسيبنا

وفوقنا الشمس مكسوفة وفرحانه

تدفينا وهى منّا غيرانه

كلامنا مكنش زى كل مرة وبس

كلامنا كلام ما تسمع منه حتى الهمس

عيون فاهمه وقاريه بعضها احساس

مفيش هفوه تعدى غير وليها اساس

كلام مفهوش وحشتينى ولا بحبِك

ولا من بين عيون الناس أعيش جنبِك

ولا قلبى صريع مجروح فدى قلبِك

صحيح يمكن كلامنا مهوش كلام عشاق

ولا فيه حتة من ( توبة ) ولا ( مشتاق)

لكين من وسط احلامنا قصايد شعر

كتبناها وقولناها لبعض كتير

على أوراق بنلسمها فى لحظة تطير

ومبنلحقش نمسكها عشان مساجين

وننساها وتنسانا

نقوم "ساكتين"



حنين