الكيل طفح يابلد
و انا استويت منك
يجرى لنا ما يجري
وانتي ولا يهمك
ثورنا عشان ننصِفك
وعشان نزيل همك
لكن كتير يوحشك
حٌضن اللي باح دمك
وقلعتي توب حِشمتك
والعسكري ضمك
مبسوط فى ليلة الهنا
قايم بدور "عمّك"
يكتب كتابك على
اللي خلف ظنك
ولا همّه يوم تقبلي
ولا همّه كام سنك
دستور يا خلق اشهدوا
جوازة مطبوخة
شايب وعايب عريس
والبطن منفوخة
حِبله فى ألف شهيد
بيسقّطوا العيّل
علشان ما عاد لها وش
إن شافه تتنيّل
وتحط الأحمر والأخضر
وقت ام بيقيّل
شِلاه يابلد الغلابة
شِلاه يا ثورتنا
روحتي بلاش فى المزاد
يا مُر خيبتنا
شِلاه يا دستور مفصّل
جلاليب وفوقها شيلان
هما بقو الأنبياء
وإحنا ولاد جرذان
والعسكري مُنتشي
"والدُخلة" فى الميدان
"والنُقطة" قطبان تحرر
السجن والسجان
صلي وسلم ياواد
على دولة الخلان
أُمك مابينهم هناك
حلّت ضفايرها
مين اللي بعدك ياواد
ياخد بخاطرها !؟
ومن الأيادي الخبيثة
حافظ وساترها
بكره النهار يزعجك
والليل جبان بيخاف
قلبك هيكلِك علينا
إذا صار عشانا حاف
بكره اللي عجبه الغوايش
هيبيع وهيطلق
واحنا ولاد الحلال
عنك ما نتفرق
إحنا اللي دقتي الوجع
يوم المخاض فينا
ولا عمر غير فرحتك
فى الدنيا ترضينا
وإذا يوم فى لحظة غضب
بالكلمة خطّينا
انتي اللي طول الامد
صابرة ,,, فــ سامحينا
موضوع: شلاه يا دستور 
السبت 24 مارس 2012, 4:56 pm
