أنا مش هالومك .

موضوع: أنا مش هالومك . السبت 27 نوفمبر 2010, 5:40 pm

أنا مش هاسألك انت ليه بتعملى فيّ كده ...

ولا هاأقوللك زى ماقال جخّك* ..."ياهل ترى انت خاينة ولا مغصوبة "

لأنى متأكد إنك ع الظلم مغصوبة ...

وعارف انهم مكتّفين ايدك ..

ومغمّين عينك ...

ومغيبين وعيك ..

بس أنا ايه ذنبى ؟؟!!

لما أتضرب كل يوم بالجزمة ...فى شوارعك ..

ولما أصحى كل يوم الصبح ..على مصيبة ..فى جرايدك ...

يوم ."اللحمة باربعة وستين ..""

ويوم "الطماطم بقت بعشرة جنيه .."

دول قسموا الغاز على بطايقك ..

وهايشيلو الدعم عن رغيف العيش ..

مع انى الدعم كان ...دعمك..

.....وأدى العيال عاوزة تتكسى ..

لأجل مدارسهم..

لأجل تتعلم ..

وأنا محيلتيش ..اللضى ..

أقولك بلاش تعليم ..

وخليهم هنا جمبك..!!!

مهو مش فاضل حاجة أبيعها عشان خاطرك ..

ارجع وأقول ..عارف انك ع الظلم مغصوبة ..

ومكنتش عاوز أشيّلك همى ..كفاية عليكى ..كوم همّك..

بس أعمل ايه ..أكتم فى نفسى ..لحد مانفجر وأطق ..

أدينى بشكيلك ...

يمكن ..شكوتى تحرّك شىء..مات م القهر جواكِ..

شىْ ..يمكن يخلّيكى ..تفتكرى مجدك ..فتقومى ..

تنتفضى ..ويمكن تكسرى سجنك ..

يمكن ترجعى لوعيك ..

وتفتكرى انى كنت فى يوم ابنك ..

أنا مش هالومك انك دلوقتى نسيانى ..

وانت ايه ذنبك....؟!!

بس لما تفتكرى ..اوعى تسألينى ..أنا كنت ليه سايبك ..؟!

مهو انت السبب.....!

ماانت اللى ربتينى ..غلط

مهو لما كنت صغير وأقوللك أنا خارج ..

تقوليلى أبو رجل مسلوخة برة وهياخدك ..

ولمّا ابن جارنا ..خد لعبتى منى .. ..

جيتلك أبكيلك ..

قولتيلى .."يابنى سامحه ربنا يسامحك

وأنا بكرة غيرها راح أجيبلك "

وأديهم خدوكِ..منى ..

ولأجلك ..سيبتك ..وسامحتهم ..

روحى ربنا يسامحك ..

طيب لعبتى كنت بتجبيلى غيرها ..

بس أنت أجيب منين ..زيك..

ودلوقتى أنا ..مســـــــــــافر..

مش لأجل ماأشوف بديل غيرك ..

زى ماقاللى ..تعليمــــــــك..

مسافر لأجل ..ماأعرف ازاى افك يوم ..ايدك ..

وراجــــــــــــــــــــــــــعلك ..

أصل عمرى ماكنت يوم ..بايعك ..

بس عاوزك تسامحينى ..

لو مقدرتش أفك تكتيفتك ..

مهو أصل الذنب مش ذنبى ..

الذنب كان ذنبــــك ..

بقلمى ..محمود سمير زاهى ..

*جخك ـــــ أقصد الشاعر هشام الجخ ..

يا أخى عليك كلام

كل كلمة ولها 100 معنى ومعنى

أحييك يادكتورنا الشاعر

،،

مشاء الله كلام في الصميم فعلا الذنب كان ذنبك

ايوة كدة ياعم محمود خلينا نحسسهم الهم اللى هاينفجر فينا
بس تعمل اية البلد هى ذنبها اية انهم عاشوا فيها
ده الرد اللى قالتوا لما سالتها على اللى بيجرى لينا
كمان قالت ما انتوا ساكتين وبتقولوا خلينا قاعدين فيها
لو اتكلمنا نروح ومانعرفش نرجع تانى ليــها
بس نعمل اية ما باليد حيلة
خلينا ساكتين وسلبين وكل عيش احسن تعرف جزاء اللى يتكلم
ويقول بتالم وموجوع وعلى طول فى جوع
هس هس هس اسكت ليسمعونا ....... ليسمعونا

كلمات :م/أحمد عبد المؤمن

الله عليك والله جامدة

ومعانيها عايزة الواحد يقراها الف مرة

وأديهم خدوكِ..منى ..

ولأجلك ..سيبتك ..وسامحتهم ..

روحى ربنا يسامحك ..

طيب لعبتى كنت بتجبيلى غيرها ..

بس أنت أجيب منين ..زيك..

ودلوقتى أنا ..مســـــــــــافر..

إيـــهاب رفعت كتب:: يا أخى عليك كلام

كل كلمة ولها 100 معنى ومعنى

أحييك يادكتورنا الشاعر

،،

شاعر مرة واحدة ..ربنا يجبر بخاطرك يادكترة .
شكرا على مرورك.

نور الإسلام كتب:: مشاء الله كلام في الصميم فعلا الذنب كان ذنبك

ربنا يعزك ...
شكرا لمرورك .

حامد محمد كتب:: الله عليك والله جامدة

ومعانيها عايزة الواحد يقراها الف مرة

وأديهم خدوكِ..منى ..

ولأجلك ..سيبتك ..وسامحتهم ..

روحى ربنا يسامحك ..

طيب لعبتى كنت بتجبيلى غيرها ..

بس أنت أجيب منين ..زيك..

ودلوقتى أنا ..مســـــــــــافر..

الله يخليك يااستاذ حامد ..ده بس من ذوقك ..

سلمت يداك ..وقلمك

الله... اقولها عندما اشعر بالجمال

بجد جميلة تسلم يا دكتور

قلبت علينا المواجع يا محمود

بجد دة عايزة صوتك والقاءك وموسيقى حزينة

وتعالى نقعد مع بعض نعيط ونمسح دموعنا

ننتظر المزيد

تقبل مرورى

والله يادكترة ..

دى القصيدة الوحيدة اللى وانا كنت بلقيها ..

عيطت بجد ..

واتحرقت من جوايا قوى ..

وقلت ياريتنى ماكتبتها ,,

متشكر جدا على مرورك يادكتورنا الجميل ..

كلااام جميل وحزين بس ياترى مين يسمع ويصلح اللى احنا فيه
تسلم ايدك

بسم الله ما شاء الله
كلمات جميلة ومؤثرة
وكما قال زميلى وصديقى الدكتور اسلام
عايزة عود ونحكّى ونقعد نعيط
بس بجد جميلة
مجهود رائع
وتقبل مرورى

amica كتب:: كلااام جميل وحزين بس ياترى مين يسمع ويصلح اللى احنا فيه
تسلم ايدك

متشكر جدا على ذوقك واهتمامك ..

شكرا على مرورك ..

احمد صبحى عبدالعاطى كتب:: بسم الله ما شاء الله
كلمات جميلة ومؤثرة
وكما قال زميلى وصديقى الدكتور اسلام
عايزة عود ونحكّى ونقعد نعيط
بس بجد جميلة
مجهود رائع
وتقبل مرورى

الله يخليك يادوك ..

شكرا على مرورك الجميل

Mahmoud Samir كتب:: ودلوقتى أنا ..مســـــــــــافر..

مش لأجل ماأشوف بديل غيرك ..

زى ماقاللى ..تعليمــــــــك..

مسافر لأجل ..ماأعرف ازاى افك يوم ..ايدك ..

وراجــــــــــــــــــــــــــعلك ..

أصل عمرى ماكنت يوم ..بايعك ..

بس عاوزك تسامحينى ..

لو مقدرتش أفك تكتيفتك ..

مهو أصل الذنب مش ذنبى ..

الذنب كان ذنبــــك ..

وده ذنب مين يا ترى؟
ذنب البلد ولا ذنب مين؟
ذنب اللى عاملين نايمين...
شايفين ومش شايفين.....
عارفين ومش عارفين....
ساكتين ومش ساكتين....
وهاشكى السبب وأقول لمين....
أحنا السبب والغلطانين....
ماحنا لو قلنا عايزين ومش عايزين....
كان حالنا أتغير من سنين....
وكنا بقينا أحسن من الهند والصين....
بس منه لله اللى عايزنا فى الدوامة تايهين...
عايشين ومش عايشين....
ربنا معانا وهو خير معين....
كلام نصبر بيه نفسنا ومش متغيرين...
وأقول ايه تانى....
ده ذنب مين ولا مين...
وده ذنب مين.....
..........
..........
معلش يا جماعة الوحى نزل عليا....ههههههههه
ولسه مألفهم وأنا قاعد دلوقتى
شوية مشاعر وأحاسيس مكبوتة
فقلت أطلعهم...والسلام عليكم

الله عليك يا احمد يا صبحى

الغربة غيرت فيك حاجات كتير

اولها انها ظهرت على حقيقتك

يعنى حوالى 10 سنين مع بعض اول مرة اعرف انك بتشعر دلوقت

ماشى يا دكتور ...اظهر بقى

بس جميلة

عندى فكرة اية رايك نعمل لقاء السحاب
يجمع بين

الدكتورين

المحمودين

احمد صبحى

محمود سمير

ونطبع ونبيع بقى

ونقب على وش الدنبا

وانا ابقى مدير اعمالكم

ونسينا بقة من الطب والصيدلة اللى مش بياكلو عيش

فكروا وقولوا بقى

والفرصة مش بتيجى غير مرة واحدة

الحلزونة يا امة الحلزونة
يا امة خدينى يا حلزونة

Islamtaha كتب:: الله عليك يا احمد يا صبحى

الغربة غيرت فيك حاجات كتير

اولها انها ظهرت على حقيقتك

يعنى حوالى 10 سنين مع بعض اول مرة اعرف انك بتشعر دلوقت

ماشى يا دكتور ...اظهر بقى

بس جميلة

عندى فكرة اية رايك نعمل لقاء السحاب
يجمع بين

الدكتورين

المحمودين

احمد صبحى

محمود سمير

ونطبع ونبيع بقى

ونقب على وش الدنبا

وانا ابقى مدير اعمالكم

ونسينا بقة من الطب والصيدلة اللى مش بياكلو عيش

فكروا وقولوا بقى

والفرصة مش بتيجى غير مرة واحدة

الحلزونة يا امة الحلزونة
يا امة خدينى يا حلزونة

[ندعوك للتسجيل في المنتدى أو التعريف بنفسك لمعاينة هذه الصورة]

انا جاهز واللى خايف ينسحب من دلوقتى..[ندعوك للتسجيل في المنتدى أو التعريف بنفسك لمعاينة هذه الصورة]

انا الل هانسحب يادكتر احمد .....

عشان محرجكش ..[ندعوك للتسجيل في المنتدى أو التعريف بنفسك لمعاينة هذه الصورة]

وتسلم ياسلم يابو الأفكار ..

طيب يلا اية رايكم نبدا بقى

نبدا بالهجاء

المطلوب هجاء الحزب التيت

وانا عارف ان محمود اول واحد هيعمل القصيدة دى

وانت يا صبحى يلا بقى اصحى كدة وفوق واكتب يا دكترة

واهى فرصة انت برة البلد محدش هيقدر يعمل حاجة

كبيرها منع من دخول مصر

حاجة بسيطة مش كدة

الدور والباقى على محمود يا عينى هيتبهدل وهيلاقى كلام مش هيعرف معناة والله

وانا مليش دعوة بقى
وجنت على نفسها

فعلا مش لاقية كلام اقوله..تسلم ايدك..

[ندعوك للتسجيل في المنتدى أو التعريف بنفسك لمعاينة هذه الصورة]

انا القصيدة جاهزة ..من امبارح..

واسمها "مبقيتش اخاف منك"

اهو حصريات للمنتدى اهه ..عدوا الجمايل دى[ندعوك للتسجيل في المنتدى أو التعريف بنفسك لمعاينة هذه الصورة]

بس مستنى لما القصيدة نارها تهدى شوية ..

ولا انت عاوز تخلص منى بدرى بدرى [ندعوك للتسجيل في المنتدى أو التعريف بنفسك لمعاينة هذه الصورة]

اسيرة الاحلام كتب:: فعلا مش لاقية كلام اقوله..تسلم ايدك..

[ندعوك للتسجيل في المنتدى أو التعريف بنفسك لمعاينة هذه الصورة]

شكرا على مرور حضرتك ..

زى ما بيقولوا

كلام فى الجوووووووووووووون
[ندعوك للتسجيل في المنتدى أو التعريف بنفسك لمعاينة هذه الصورة]

وجعت قلبي يا جدع

Islamtaha كتب:: طيب يلا اية رايكم نبدا بقى

نبدا بالهجاء

المطلوب هجاء الحزب التيت

وانا عارف ان محمود اول واحد هيعمل القصيدة دى

وانت يا صبحى يلا بقى اصحى كدة وفوق واكتب يا دكترة

واهى فرصة انت برة البلد محدش هيقدر يعمل حاجة

كبيرها منع من دخول مصر

حاجة بسيطة مش كدة

الدور والباقى على محمود يا عينى هيتبهدل وهيلاقى كلام مش هيعرف معناة والله

وانا مليش دعوة بقى
وجنت على نفسها

هههههههههه[ندعوك للتسجيل في المنتدى أو التعريف بنفسك لمعاينة هذه الصورة]
والله ضحكتنى يا اسلام
ومش عارف أمسك نفسى والله
يا عم شعر أيه دى ساعة زغللة
وبعدين انت عاوزنا منروحش مصر تانى
على العموم أنا هانسحب وخليها لما ساعة الجلالة تيجى تانى

وكأن الشاعر محمود سمير يفضفض معنا بلا رقابة من داخله

استمتعنا ببوحك النابع من قلبك