(حلقات خاصة)

السلام عليكم ورحمة الله وبركاته متابعينا ومستمعينا على الموجات المتوسطه

هبدأ بجزء من الاسئلة نسأل الجزء التانى بعد اجابتك يا بشمهندس ،،

عنينا مافيش مشكله



اهم حاجة ف الاسئلة الصراحة الكاملة بس :)

الصراحة دى لعبتى على فكرة



- صلى ع النبى ^_^ ؟

اللهم صلى عليك يانبى

- ليه بحس دايما انك بعيد تماما عن السياسة حتى لو شاركت يبقى بالمتابعة او برأى بسيط ؟

الاحساس ده شىء لشخص قريب منى وبالتالى هيحس ان انا بعيد او لاأ .. انا مش بعيد عن السياسة خالص وماينفعش اكون بعيد ف الوقت ده بالذات ..انا يمكن معظم كلامى ف السياسة بس نقطة ان انا ادخل فى جدالات على النت (الفيس أو المنتدى )بحيث انتى تقدرى تعرفى ميولى.... مش بحبها ...لانها دايما استعراض قوى وكل واحد بيحاول ينصر فكرته حتى لو هو متأكد ان هو غلط بس دايما شاشة الكمبيوتر كدا عامله زى المرايه دايما تكدب على صاحبها .. يعنى تريييح مخ مش اكتر

- موضوع حبيته وكان ليه ذكرى جميلة معاك وكنت انت الى كتبه ؟

انا مواضيعى الساخرة كلها كنت بكتبها من قلبى والله .. بس فى موضوع بحبه اوى اسمه (بــــــولا بـــــولاا )



- المسلسل الى كنت عامل حلقات بيه رمضان الى فات ،، تأليفك ولا نقله :) ؟

مش انا اللى بنقل على فكرة
اولا انا ضد فكرة النقل من منتديات تانيه .. دايما بحب الابتكار .. المسلسل ده انا اللى مألفه ومخرجه وانا كنت البطل والسينارست وتقريبا انا كنت كمان المشاهد الوحيد

وكانت معظم الحلقات بنقعد نتناقش فيها مع اصحابى






- ف الماجيك ،، مين اكتر الناس الى جابت كريم بالظبط او الى حد ما ؟



بصراحة الناس كلها بتتفق فيا على حاجات وبيختلفو على نفس الحاجات تقريبا كلهم عليا ولا ايه مش عارف





- المنتدى أثر ف سلوكك وشخصيتك ولا عادى ؟

السلوك والشخصية اكيد صعب منتدى يغيرهم .. ولكن هو اكتساب لبعض التفصيلات البسيطه فى الشخصيه زى الهدوء والرزانة وكيفية التواصل الاجتماعى مع اشخاص مهما اختلف طريقة تفكيرهم



- شايف نفسك ازاى ؟

بسيــــــط ..بحب كل الناس



- اكتر لعبة كنت بتحب تلعبها هنا ؟


والله اللعب كلها جميلة وتحسى ان هى مغماطيس بتجذب الناس كلها وبالذات اللى أسمها الماجيك دى



- توقيع ليك كنت بتحطه فترات طويلة ،، وتوقيع بيعبر عن كريم ؟


التوقيع ده حالة مش شعر وقواله


- الحب مبدأيا الكلام والجدال حواليه كتير ف الغلط والصح والحرام والحلال بعيدا عن دا كله

ايه رأيك لما ولد يكون ليه علاقة بين ست متجوزة اذا كانت علاقة حب وف حالة الصداقة ؟




الاتنين مرفوضين يا اخت اسماء مين يقبل كدا على نفســـــه ؟ اكيد مافيش حد يقبل مراته تكون كدا



- حاسس ان الثورة بتتسرق مننا ولا لسا الامل موجود ف وجهة نظرك ؟



الثورة تمت وحققت من المكاسب ماحققت .. واللى بيحصل دلوقتى ماهو الا توابع ومخلفات النظام القديم .. من احداث مؤسفه لتعطيل وتخريب للبلد
مش سهل على نظام دام لفترة طويله انه يتمحى كدا بسرعة .. بس انا بصراحة متفائل اكيد مش هنفضل كدا على طول ..وغير كدا انا متفائل بالشباب دلوقتى بسم الله ماشاء الله وعى ثقة دراية حسن تفكير م الاخر بقى فى وعى سياسى


- هتنتخب مين رئاسة ؟ وقولى بدائل لو الشخص دا انسحب ؟

انا بصراحة كان البرادعى كنت شايفه رجل مابعد الثورة .. وكنت مستنى ان الجو يواكب البرادعى ولكن حدث مالم يكن ف الحسبان ...البردعى بعيدا ..

عبد المنعم ابو الفتوح هو متصدر المشهد الان .. وبالتالى دعمى له حتى النهاية ان شاء الله ..فى ظل المشهد ده لحد دلوقتى فى حالة انسحابة يبقى حدمين صباحى على طول



- وايه رأيك ف ترشح سليمان وشفيق وموسى ؟

انتى عارفة فى مثل بيقولك اللى اختشو.... ماتو .. عدم مصداقية ايادى ملوثة بالدماء .. مزيفه ومفعمه بالمصالح من جميع الاطراف والتى تصب فى مصلحة الرجوع للخلف .. عاوزين تجديد عاوزين روح عاوزين واحد بيحب البلد عاوزين واحد مش همه سلطة ولا كرسى عاوزين واحد يخلى باله من كل واحد فينا
ولو مافيش حد كدا .. مش عاوزين رئيس بقى وكل واحد يخلى باله من نفسه

- حياة كريم ف كلمة ؟

الامل



- سؤال بتكرهه او بتحرج منه ؟

ههههههه...مافيش


- كريم حد بيتقبل النصيحة حتى لو كان الشخص دا اصغر سننا منه ؟

جدا جدا بحب اشوف نفسى ف عيون اى حد ازاى وبحب ارضى كل الناس .. حتى لو كانت النصيحة لا تمقلى اى اهمية بس بتبقى بمثابة هاجس ليا نفسى احققه





- ايه الحاجة الكويسة وعكسها الى حصلتلك ف الفترة دى او الى فاتت ؟


ههههههههههههههه... سؤال مكرمش وغريب اوى .. هو الحاجات الكويسة كتير والله والحاجات الوحشة انا بنساها بسرعة





- توجه لمين العبارات دى :


بعتذرلك ؟

كل حد كنت سبب فى مضايقته وبصراحه انا رخم يالا بقى بس مش اوى




بحبك ؟

امى



بكرهك ؟

الخطيئة


سامحنى ؟

يـــارب


- هو الاعتذار ضعف يا كريم ؟؟

الاعتذار عمره ما كان ولا هيكون ضعف ... بس حاجه كدا زى اللتقرب لغير الله مذله ..بالظبط زى ماتروحى تعتذرلى لحد وهو فاهم الاعتذار غلط فيبتدى يفهم الاعتذار على انه ضعف... الشخص ده مينفعش معاه الاعتذار


- راضى عنك وعن حياتك ؟

الرضى = راحة البال وانا بالى مرتاح


- امتى انهزت ثقتك بنفسك وكان ايه السبب ؟

مافيش حد وثيــــق من نفسه على طول بس كتير اوى الضعف بيولد عدم ثقه زى ما تكونى وقعتى فى مشكلة ما . او عندك ظروف شخصيه اكبر منك وبالتالى بتحتاجى حد يثبتلك ثقتك ف نفسك او يكون جانبك مش اكتر .. ونس يعنى



- رسالة لكريم منك ؟ ورسالة لشخص تانى مين ومحتواها ايه ؟


احب اقول لنفسى .. وما نيل المطالب بالتمنى ولكن تؤخذ الدنيا كدهون



- موقف حصلك غير مسار حياتك ، موقف حصلك أثر ف حياتك بالسلب ؟

مافيش حاجه غيرت مسار حياتى اوى .. يمكن مرض والدى اكتر مايسبب ألمى وضعفى



- طبعا بتسمع اغانى :) سماع القرأن ليه جزء ف يومك او قرأته ؟

وليه طبعا ؟؟ على فكرة انا اكاد اكون مش بسمع اغانى تقريبا او بمعنى اصح مش حاجه اساسية عندى خالص والكلام ده من فترة كبيرة يمكن بميل للميوزك اكتر
وممكن اغانى مميزة كدا فى حالات معينه
القرأن دايما بقرا فيه قبل ما انام غير الورد اللى ممكن يبقى بعد صلاة الفجر

- ايه المعوقات الى بتبعدك عن الالتزام او القرب من المولى عز وجل ؟

اممم حاجات كتير من ضمنهم مثلن النفس بنت ال...... دايما امارة بالسوء بس لازم يكون ربنا دايما ف بالك عشان تقهرى النفس الوحشه دى .. بس متقلبات الحياة اليومين دول بصراحة وحشه جدا جدا والناس بقت وحشه فعلا






- انطابعك ايه للحاجات دى :

الخمار ،

سترة


النقاب ،


سترة ف سترة


متبرجة ،

معظم البنات اليومين دول

متعطره ، نافخه طرحتها :) ،


انزلى المترو يا اسماء وشمى جميع انواع الروايح وعلى كل لون وربنا




جملة ولا متخذات أخدان ؟


انا مش هفسر الاية الكريمة ولكن اذا كان الموضوع فى سياق (شغل -كلية - عمل مفيد وجماعى ) وبالشكل التربوى والمحترم اكيد مافيش فيه مشكلة




- اقرب شخص لكريم ف مرتبه اخوه ؟

بصى السؤال ده بيتسألى كتير جدا ... بس بأسلوب مختلف شوية يعنى : فلان الفلانى اقرب واحد ليك مش كدا ؟؟
هههههههههه.. يعنى واحد بيسأل ويجاوب يعنى ناقص يقولى قوم روح ..

بس يمكن مصطفى يعتبر كدا لان احنا اصحاب من زمان جدا واخوات بالظبط .. الواحد عرف حاجه والله ان العيش والملح ده اغلى حاجه ف الزمن ده ..
واحنا عمرنا ماكلنا عيش وملح مع بعض كل اكلنا يا اما حواوشى بايظ يا اما كفته من عند صلاح فيديو يا اما كشرى اغلبيته مكرونه





- ايه رأيك ف الاعضاء دى :

باهر ،

صديق المواصلات ههههههههههههههههههههه . اخويا الكبير وبشوف فيه طموح وقيادة وعقل

أحمد عبد العزيز ،

فاكهة المهندسين .. بموت ف شخصيته .. وبدردش معاه كتير

أحمد صلاح هلالى ،


ههههههههههههههههه.... اكتر واحد عملت معاه مشاكل بس والله العظيم بنحبك يا احمد .. يارب يكون قاعد ادام التليفزيون دلوقتى وبيشوفنا


محمد عبد الرحمن ،

ايه العقلية دى ؟؟ بجد الاحترام كما يجب ان يكون وعارفه احلى حاجه ايه ؟؟ ان انا قابلته على ارض الواقع


محمود شاهين ،

مبتسم طول الوقت .. ودى حاجه بحبها فى اى شخص بقابله


مصطفى ،


اقوله كلمة واحده بس .. مؤسسات الدولة كلها عاوزه تتنضف بصبغة اليــــــــــــــــود






خيرى ..

خيرى ده بعتبره اخويا الصغير .. عارفه لما تحسى ان الضحكة يكون ليها طعم كدا وقلبك يوجعك ؟؟ بيبقى مع خيرى .. بس المشكله كلها انه مش بيحبنى اقول ان هو أكل عندى كرات الكفته اللذيذة



حنيــــن ،

حنين شخصية دبلوماسية ولكن ...





اسيرة ،


كلامها مخيف .. بتفكرنى بالساحرة الشريرة .. !!




دهب ،

شخصية هادئة ولكن الهدوء الذى يسبق العاصفة






نور ،،

نور الاسلام .. الهدوء والتدين والاحترام



المنتدى كله كدا بمعنى اصح ههههه ؟

المنتدى كله حلو ولذيذ والله



- لو الزمن رجع بيك تانى ايه الحاجة الى كنت عملتها والحاجة الى مكنتش عملتها ؟



لو الزمن رجع بيا تانى مكنتش عيشت ف العمار الناس مالهاش دعوة غير ان هى تتكلم على الناس التانيين والناس التانيين يتكلمو على الناس اللى قبلهم




- مدرس او مدرسة مش ممكن تنساهم ؟

ههههههههههههههههه.... عاوز بس اوصل رساله لابله اسمها ايات ربنا يمسيكى بالخير وانا مسامحك ان انتى كنتى كل يوم تفقعيلى مرارتى

مدرس : اتنين : أ/ مدحت هنرى : ده كان واحد صاحبنا مش مدرس وبصراحة انا مش عارف هو استحملنى سنتين ازاى ده انا لو مكانه كنت اتشليت او اتجننت

التانى : أ/ شفيق عجاج ... مدرس رياضة ف تانية وتالته ثانوى كنت بحبه وجدا ربنا يمسيك بالخير يا أ/ شفيق



- حابب مجالك ؟


حب ما تعمل حتى تعمل ما تحب

- التعليم ، الصحة ، الزواج ، العمل ، قبل وبعد الثورة حصل فيهم تغيير بعد الثورة ف وجهة نظرك ؟

هبدأ بالزواج : اصبح اكثر تعقيدا ولاول مره اشوف افراح يشتغل فيها اغانى وطنية ويترقص بالاعلام فيها

التعليم : اه حصل تغيير وتغيير كبير كمان المدرسين كل مايخشو يكتبو ع السبورة ف وسط السطر ثورة 25 يناير اسبابها واهدافها يكتبو 20 سبب ومافيش ولا هدف اتحقق



- الفيس بوك ،

خد اكبر من حجمه جدا بعد الثورة


المنتدى ،

ساحة للنقاش الهادىء



الكلية ،

أشغال شاقة والمصحف

العمار ،

بلد المشمش اللى مش موجود

التحرير ،

وحش .. عشان منع الريش والبيتزا

الغيط :) ،،

بحلم كل يوم اول ما اصحى اتمشى فيه ولو دقيقة





- امنية حياتك ؟

يكون عندى أطفال ويكونو أشقية عشان مخدهمش معايا فى حته خالص



- لو لقيت ولاد بتضايق بنت ف الكلية او الشارع بتقول انا مالى ولا بتروح تحامى عنها ؟


لاأ ازاى الكلام ده ... بروح واعمل فيها فريد شوقى .. بس مش عارف غالبا ان انا مش شبهه ف ده بيأثر على موقفى



- اتعلمت فوتو شوب فين ؟ وهواية ولا ؟


ههههههههههههههههههه.... والله العظيم ما اعرف انا اتعلمت فوتو شوب ازاى ؟؟ مرة واحده كدا لقتلك صور وحاجات حلوة بتتعمل قلت والله لا انا منزل البرنامج وفعلا ماكانش معدى نص ساعه الا وكنت فاتح البرنامج وبخبط اى حاجه ف اى حاجه مع شوية فيديوهات من ع اليوتيوب كنت تمام اوى هو مجرد حاجات بسيطة هواية مش اكتر





- موقف حصلك ع المنتدى مش ممكن تنساه سلبى او ايجابى ؟

لاأ انا لازم يتنســــــــــــى




- كريم حد متسرع ؟

بالعكس انا هادى جدا بس مش عارف لما بشوف حاجه مش داخله دماغى مش بسكت

معلش سرحت ف الاسئلة ^_^ منتظرة اجابتك ومع حفظ الالقاب لكل الى ذكرتهم طبعا ..

عادى على فكرة والاسئلة كانت جميلة جدا