اعرفى عريسك من طريقة اكله

اعرفي عريسك من طريقة اكله

1- إذا
كان عادي يعني لا بياكل بسرعة ولا ببطء ولا دايمًا شبعان ولا مفجوع على
طول.. يبقى شخص معتدل في عواطفه وقراراته ويبقى ده آخر الرجال المحترمين..

كلبشي.. واستعجلي الزفاف والحياة هتبقى بمبي

2- إذا كان بيحب الأكل زي عينيه.. وأول ما يدخل من الباب وقبل ما
يقول لك ازيك يقول لك ريحة التقلية تجنن ياروحي إنتوا عاملين ملوخية
على أرانب؟؟.. أموت أنا.. ويقعد ياكل ويحشر لحد ما يغمى عليه..
يبقى إنسان طفس.. وهوائي..

وطايش.. وأوعي تتجوزيه أحسن ياكلك وانتي نايمة....؟؟

3- أما إذا كان مش مهتم بالمرة.. لايقولك ده حلو ولا ده عادم ولا
مالح ولا مستوي ولا لسه ني ولا بيعلق أي تعليق.. وعمره مايقولك جعان
أو شبعان يبقى إنسان مالوش لزمه.. وزي قلته.. وأنصحك بدل ما تتجوزيه إتبنيه..

وهاتعيشي إنتي الراجل والست فى وقت واحد واعملي حسابك هاتركبي وتدلدلي رجلييكي.

4- أما إذا كان بياكل زى مايكون حد بيجري ورااااه وساعة الأكل
بيجيله حالة صرع معوي.. ويقوم من على الأكل قبل أي حد تاني.

يبقى متسرع .. ومتهور في اتخاذ قراراته وممكن بعد الجواااز يكتشف إنك
لستى ملهمته..ولستى فتاة أحلامه ولستىِ حلمه.. ويروح مطلقك بالتلاتة..

إخلعي إنتي بدري أحسن لكرامتك.

5- أما إذا كان بياكل على مهله.. ويمزمز.. فى كل صنف لوحده.. ويسأل
عن كل صنف إيه مقاديره ومعمول إزاااي ويقعد يستطعم فى الأكل من العصر للمغرب .

حاسبي منه يا اختي ده النوع اللي له مخ.. وبيوزن الأمور بطريقه تفقع
المرارة.. ولو في يوم طلبتي منه يقولك كلمة حلوة هايقولك مش عامل
حسابي ويقعد يفكر 3 سنين وبعدين يقول لك بحبك ويقعد يشوف وقعها عليكي

إيه؟؟
نظااااام شلل رعاش
بدري.... بدري....
إخلعي يا أمي...

6- أما إذا كان بيقعد يقطع ف الأكل زي مايكون ف خناقة ويخبط ف الطبق
من الغل.. ويقطع حتة اللحمة زي ما يكون بيدبحها.. ويتفتف.. ويتكلم..
طول ماهو بياكل لما يغرق وشك أكل..

ده شخص عصبي جدًاااا.. ومع أول خناقة هايروح مناولك بالكرسي ف راسك أو
بالسكينة ف عينك يعمل لك عاهة مستديمة وبعدين.. يهدى.. ويقول لك:

"سوووري يا روحي هي جت فيكي.. ماعاليش"
""ماعاليش برَّه يا حبيبي وخد الباب ف أيدك""

طيب انا عايز اعرف عروستى
؟؟؟؟؟؟؟؟؟؟؟

هههههههه انا احترت بئى
لانه سعات بياكل شويه شويه وسعات عادي
وسعات بسرعه وعالسريع كده هههههه
:*فلحر-:
بس انا اعتقد انه بياكل عادي ههههه
الف شكر يزهره للموضوع
وابئي جبيلنا طلب القماح لو سمحتي
علشان نعرف شخصياتنا احنا كمان مبسوط

هههههههههههههههههههههه

انا عن نفسى مش هاكل عندهم

وشكرا على الموضوع

واعملي حسابك هاتركبي وتدلدلي رجلييكي.(ده كلامك)
مفيش ست بتركب راجل وتدلدل رجليها
ده مايبقاش راجل ده يبقي تبعكوا
ويبقى يا عيني الست اتظلمت واجوزت ست زيها
انا اعرف انى البنات والستات بتحب الاكل اكتر من الرجاله
بيكلوا فى اليوم اكتر من 6 مرات
انما الراجل ممكن ميكلش الامره وحده فى اليوم.طبعا مش كل الرجاله

فيه وفيه

شكرا على الموضوع

اولا شكرا لصاحبة الموضوع على المجهود دة
بس انا من وجهة نظرى ان طريقة الاكل عمرها ماتحدد شخصية الانسان
معلشى دى اراء
واختلاف الراى لايفسد للود قضية

زائر

ههههههههه
بجد تعليقك على كل شخصيه جميل اوى
تسلمى يا زهرة الجنه
بس فعلا عمر طريقة الاكل والمشى واللبس والكلام ده..
هى اللى تقدر تحدد شخصية اى انسان

وشكرا على الموضوع اللذيذ ده

» اعرفي عريسك بدري بدري من طريقة اكله
» عريسك !!
» سجل حضورك بأخر اكله اكلتها
» اكله عروة والله ( يوم الأحد ان شاء الله )
» اسرع اكله فـي العالم بس مش دليفري ارز باللبن