الآذان...الدرس الاول ...كن مع الله .

الدرس الاول
الحمد لله حمدا نستدر به صيب إقبال الحق ,

ونشهد أن لا إله الا الله , شهادة تثبت في القلب متى ماللسان بها نطق ,

ونصلي ونسلم على اعظم شمس نورها في الوجود أشرق

.. محمد .. صلى الله عليه وسلم

... ثم أما بعد ...

واحنا مشغولين والدنيا واخدانا , وفي مننا اللي عنده مشاكل واللي مشغول بالدنيا

واللي خايف وقلقان على مستقبله واللي بيذاكر والي بيلعب , واللي مش لاقي شغل

واللي خايفة ما تتجوزش , واللي ذنوبه ملياه ومش عارف يقرب من ربنا , وتبدأ الحياة

في الظلام ...

ومرة واحدة نسمع صوت الأمل بيقول :

الله أكبر ... الله أكبر

اللــــــــــــــــــــــــــــــــــــــه على صوت الأمل !!!

خلي بالك ! ده مش عم مصطفى اللي بيأذن , ولا عم محمود , ده منادي من عند الله

تخيل معايا كده واستشعر إن المنادي ده بيسألك ..

هوه ربنا كبير في قلبك ولا لأ ؟؟؟!!!!

هوه أكبر وأهم من شغلك ولا لأ ؟؟!! هوه أكبر واهم من فلوسك ولا لأ ؟؟!!

هوه ربنا ده مهم عندك ولا لأ ؟؟؟؟

تبدأ أنت بكل امانة تشوف وتحسبها وتقيس هل فعلا ربنا كبير في قلبك ولا لأ ؟؟؟ !!!

لو لسة القلب قاسي شوية .. يبدأ المنادي يقولك ..

الله أكبر ... الله أكبر

واستشعر كده كأنه بيقولك :

عبد الله ! ربنا أكبر من همومك كلها وهوه اللي يقدر يشلها , وهوه اللي يقدر يصلح حالك

وهوه اللي يقدر يكرمك ويعزك ويرزقك ويهديك ,

تعرف ربنا اكبر من إيه كمان ؟؟!!! أكبر من ذنوبك .. ايوة والله اكبر من ذنوبك كلها

وبيفرح جدا لما يغفرلك

استشعر المعنى ده في قلبك وابدأ قول بقلب جامد نعم يارب .. نعم يارب

انت أكبر من كل شئ وأهم من كل شئ

وتقول بلسانك

الله أكبر ... الله أكبر

يبدأ المنادي يقول :

يا عبد الله هيا اعلن إسلامك لكل الدنيا

أشهد أن لا إله الإ الله ... أشهد ان لا إله الإ الله

وكأنه يسألك :

أتشهد ان لا إله الإ الله ؟؟؟!!! فتمرر الكلمة على قلبك وتستشعرها

وتجاوب بكل يقين وحب نعم نعم والله

أشهد أن لا إله الإ الله

فيكررها لك المنادي , فتجيب بحماس ويقين أكبر

نعم ! نعم والله

أشهد أن لا إله إلا الله

فيقول المنادي :

أشهد ان محمدا رسول الله ... أشهد أن محمدا رسول الله

وكأنه يسألك :

أتشهد ان محمد رسول الله ؟؟؟!!

فتستشعر قد إيه تعب الحبيب علشان يوصلك هذا الدين , وقد إيه مقام هذا النبي الذي قرن الله اسمه باسمه

ويكررها لك فتجيب مرفوع الرأس متباهيا امام الأمم ان الله هو ربك وان محمدا هو نبيك

ألم أقل لك نداء الأمل

فيقول المنادي :

يا عبد الله ! هاقد أعلنت إسلامك أمام الدنيا , فهيا ...

حي على الصلاة ... حي على الصلاة

اسمعه بقلبك وكأنه بيشفق عليك , ويخاف عليك

فتستشعر ضعفك وذلك وأنك لا تملك من الأمر شئ , وتتذكر إنك محتاج ربنا في كل حاجة , كل حاجة

ربي لا تكلني لنفسي طرفة عين ولا أقل منها , فإنك إن تكلني إلى نفسي , تكلني إلى ضعف وهوان وخطيئه

فإذا استشعرت هذا المعنى , فقل كما علمك الحبيب _ صلى الله عليه وسلم _

لا حول ولا قوة الإ بالله

أي لا حول عن المعصية ولا قوة على الطاعة إلا بيك يا رب

أنا مش هقدر أطيع ولا هقدر أبعد عن المعصية إلا بيك يارب

فيقول المنادي :

حي على الفلاح ... حي على الفلاح

وكأنه ينصحك

صلاتك هيه فلاحك دنيا واخرة

أنت بتروح وبتسمع دورات تنمية بشرية علشان تصلح نفسك , الصلاة دي هتصلح حياتك كلها

فتقول في خضوع وذلل لله وطلب الحاجة والهداية

لا حول ولا قوة إلا بالله

لا حول عن المعصية ولا قوة على الطاعة إلا بالله

فيقول المنادي وكأنه يودعك :

عبد الله !

لا تنسى ما اتفقنا عليه من قبل ..

الله أكبر .. الله أكبر

فتقول :

نعم أذكر ولن أنسى ما حييت

الله أكبر .. الله أكبر

فيقول المنادي :

لا إله إلا الله

وكأنه يقول : أرجو أن تلقى الله بهذه الكلمة

فتقول مطمانا ومودعا للمنادي

لا إله إلا الله

قال الحبيب:

" من قال مثل ما يقول المؤذن ... من قلبه دخل الجنة "

لا تنسى القاعدة , وابدأ في التنفيذ من الآن واكتب الملاحظات حتى ترجع اليها للتذكرة اثناء الأذان

" حاول تفصل نفسك عن من حولك أثناء ترديد الأذان , وتذكر تلك المعاني أثناء الترديد

حتى لو مكتوبة في ورقة , واستمع الى مؤذن حسن الصوت ,

يومين تنفيذ وبعد كده نقول تجربتنا يا ترى حدث فرق , ولو ربنا فتح عليكم بمعاني ياريت تقولوهالنا "

الله اكبر..

» الثقة في الله الدرس وتفريغه..
» الدرس الثانى ...الوضوء ...كن مع الله.
» الافتقار الى الله الدرس وتفريغه
» الدرس الثالث...الذهاب الى المسجد...كن مع الله.
» الدرس الرابع ...الصلاة والطاقه..كن مع الله.