أيام فى حضن الليل

أيام وبتعدّى
يااللى بحور حلمك
بتاخدنى وتهدّى
وف لحظه ننده لك
لا الندهه بتجيبك
ولاحلمنا يسيبك 00
ليه غيبتى عن صوتى
عن لقمتى وقوتى
فى الصبح ماتفوتى
ولا فى المنام جيتى 00
ع الناى باغنى لك
ألحان تنادى لك
ليه غاب قمر ليلك
م العتمه باشكى لك
ليه تطفى قنديلك
وتنام عصافيرك
فى الضلمه مايملك
غير الدياب والبوم 00
ماتزعليش م اللوم
ده اللوم عشان قدّك
ماينحنيشى ف يوم
ولاينفرط عقدك 00
ضمينا من تانى
واملى كفوف ولدك
بالغلّه من خيرك
ياللى ماليش غيرك
وحشانى ضحكايه
ويّا الولاد السمر
ويّا عيون الشمس
قبل انتصار ليلك 00
وحشانى بانده لك
يترد لك أصلك
بازعق وانادى لك
واتعب ولا آجى لك
ولا فيه خبر عنّك
ولا عن مصير خيلك 00
أيام وبتعدّى
يااللى بحور حلمك
بتاخدنى وتهدّى
أيام بننده لك
لا الندهه بتجيبك
ولا حلمنا يسيبك !

-----------

د/حورية البدرى