وش تانى للنشيد - أ/سميح عزت الهيو

زائر

أنا مش هاقول الشعر ف عنيكى
وارسم لك الكحله .. ع العيون الحُمر
ولا هانقش الحنه على إيديكى
واعمل لك الزفه .. م المسا للفجر
آسف ياغزة أصلى ( واد خايب )
عودت نفسى .. تستسيغ الذل
آسف ياقدس القلب مش تايب
عن خوف فارشنى تحت رجل القهر
أنا مش هاقول الشعر فى عنيكى
أنا مش هاكحـل دمـعـتى بـيـكى
ولا راح اقول لك فيا شئ بيئن
عودت روحى ع الخرس شوفى
كام نقطة للتفتيش .. على لسانى
كام نقطة للتشويش على صوتى
على حنجرة يومى الكسير الضهر
****
أنا مش هاقول بالمره .. شئ خالص
جسمى من الكرابيج ياغزة .. مش خالص
لا الكحلة هاتدارى الجتت والدم ..
ولا تثبت انى فى الميدان فارس
ولا حد من كل اللى باعوا الحلم
بقوالتى ممكن يبكى .. يتوانس
الكل سايب تحت إسم السلم
أعدى عدو ف جتتى وارث
وانا البعيد ..!!! مأجور ..
على الباقى منى ..
لصالح عدوى ديدبان حارس !!!
****
أنا مش هاقول واوصف حصار روحك
واكتب رسايل تشبه حاجه من نوحك
واكدب بـ قُول باكى على جروحك
دى رساله من غزة الدموع ..
وازور خطِّك الدامى وتوقيعك
****
لاكنت حاضر فى عزا الأطفال
ولا كنت ساند كتفِك ساعة الدفنة
ولا خدت إيد والد شهيد ..
عجز وماشى يجر ف الدمعة
ولا شلت عنه شنطة الأحزان
لما انطرد من عمره بالقوة
ولا عينى صدفه جت ف عين
أم ( محمد الدره )
فلاقيتها بتفرق .. أسى وحنين
على قبور كل الولاد .. وتقول
( رحمه ونور ) .. على العِزَّة
............................
لا إيدى سدت جرح الصبى المفتوح
ولا لفت بالقميص ( القطن ) ده رجله
اللى ارتعاشها كان ( حلاوة روح )
لما اندبح ..
شـريان الأمل فيها انـكـب نيل دمـه
وفارق عضمها المبتور ...
عضميات فخده .................
ماكنتش حاضر هناك لما انفجر ..
لغم الآهات فى عيونه وف جسمه !!!
****
لاكنت ويَّا الولاد فى الضلمه بتخبَّط
ما بين حيطان الرعب وجنون الحصار
ولاكنت قاعد معاهم ع " الطبليه " مستنظر
يحن قلب الصمت ويجيب لى الفطار
ولا كنت واقف هناك .. بين الحطام
( زي الرجال ) بإيديا دى بحفر ..
واخرج بواقى الجتت حتت .. حزنان
وأعد أعضاء العجايز .. ... والصغار
وأرصها مترتبه جوا الكفن ..
وأرش فوقها الورد والأزهار
......................
.............................
****
ومن باب اكتمال الصورة قدامك
هاقول لك .. كنت حاضر فين
أنا كنت مشغول ف تجهيز المرايه
اللى هاتعكس صورتى للحاضرين
وبجهز سماعات ( صُنعت بأمريكا )
وبرصها أدوار ..
جوا الودان .. وفى الميادين
...............................
.......................
أنا كنت قاعد بزيد اشتباك الدنيا ويا النفس
تقول الدنيا فوازيرها .. ونفسى تحل ف الفوازير
وبشرب قهوتى السخنه ام وش مااتشوهش
على الريق اللى مااتشقش .. بملح العين
وارسم التكشيرة ع السِحنة اللى عاشقه الغش
وأتأكد .. إنها غامقه كفايه ( زي لون الطين )
واسلِّك زورى بالترديد .. فى الكلام القش
الملوي زى لسانى واللى مش مفهموم
أحبُك بيان شكلاً ............ ماهواش هش
مستوفى كل الشروط ..... من بديع لبيان
ساعة الرجال مايشيلوا ع الكتاف النعش
ويكبَّروا باكيين ....
أرشه جوا الوادن .. ووسط الزحمه ف الميادين
وارجع لبيتى والغبار ع الوش ......
قال يعنى شايل هم غزة وفلسطين !!!
فى فرشتى الدافيه الحرير .. أو ريش نعام
أدفن ملامحى جوا طين نفسى وطين
دنيا بتضحك علىَّ بحفنة م الفوزاير
****
أنا مش هاقول الشعر فى جراحك
ماعادش عندى وش تانى للنشيد
كل الكلام على ضفة نواحك
مش راح يفيدك .. أو يفيد
طيور عنيكى المدبوحين
بالرعب ف حصار م الحديد
ماعادش عندى وش أخضر للنشيد
كل الممرات اللى بتوَصَّل لبابك
كل المعابر اللى بين قلبى وبينك
مملوكة للأعداء ..
وعليها ألف ساتر .. م الجنود !!!
................ !!!!!

للشاعر / سميح عزت

ياسلام يا دكتور ايهاب

ما أجمل ما نقلته

وما أقساه أن نراه بين منتدى النقول ...

لك مودتي

بعد قراءة القصيدة
مش عارف انطق وفقدت القدرة ع الحركة
يمكن خزيان
أوحتى جبان
يمكن
مهو فى الزمان ده
كل شىء جايز

اقتباس :: أنا مش هاقول الشعر فى جراحك
ماعادش عندى وش تانى للنشيد
كل الكلام على ضفة نواحك
مش راح يفيدك .. أو يفيد
طيور عنيكى المدبوحين
بالرعب ف حصار م الحديد
ماعادش عندى وش أخضر للنشيد
كل الممرات اللى بتوَصَّل لبابك
كل المعابر اللى بين قلبى وبينك
مملوكة للأعداء ..
وعليها ألف ساتر .. م الجنود !!!
................ !!!!!

ياااااااااااااه يا أستاذ سميح

كم الشجن فى قصايدك كبيييييييييير جدا

وبيوصل لقلوبنا من أقسى الطرق

الله الله الله

عارف يا أستاذنا أنت فكرتنى باللى نفسه يحج ومش طايل وحد بيشوفه فى المنام وهو بيطوف
أنا شايفك معاهم.....
من أصدق الحاجات اللى قريتها

» ا/ سميح عزت الهيو .. رجع للمنتدى .. مش معقول !!!!!!!
» وببلع موتي للآخر ..أ / سميح عزت الهيو
» إلى شاعر....نداء لأبي الروحي سميح عزت الهيو
» فضفضات سميح الهيو مع صديقي علاء هلالي
» م/أحمد محمد فتحى حمدى تهامى الهيو :)