ميكروباص

تذكير بمساهمة فاتح الموضوع :

- جيزة جيزة جيزة
يلا نفرين ميدان الجيزة علشان نطلع

وأخيرا الحمولة كملت و السواق دور العربية و طار من الموقف
و قبل ما يدوس برجله عالبنزين شغل التسجيل اللي سماعاته تخلي الودان تصفر و الصداع يدق في النافوخ
اتكوم الركاب على بعض و هو طاير بالعربية وعمال يروح يمين و شمال و يعمل غرز وكأنهم راكبين العربة الطائشة

صوت حريمي من الكنبة الأخيرة صرخ مرة واحدة

- وطي صوت البتاع ده شوية حرام عليك دماغنا هتنفجر

طنش و كأنه ماسمعش حاجة و كمل السباق

اتكررت الصرخة مرة تانية
- عايز تندمج قوي كده ابقى حط السماعات عندك بدل ما انت لازقهالنا ورا راسنا كده

بص في المراية بسخرية و مد إيده قلب الشريط و اشتغلت أغنية الدنيا خربانة و عاش معاها و بقت العربية تتطوح مع الأغنية وكأنها ممونة سولار غير خالي من الكحول

وصل الميكروباص عند الجامعة و نزل معظم الركاب و مافضلش غير خمس ستات المفروض إنهم هينزلوا آخر الخط
بصلهم السواق و قالهم
- يلا يا جماعة أنا هلف من الدوران اللي جاي

ردت اللي في الكنبة الأخيرة و قالتله
- آخر الخط الميدان
ازاي بقى عايز تلف ان شاء الله ؟!!!
وصلنا الأول و بعد كده ابقى ارجع براحتك

بص في المراية تاني و قال:
- أنا آخري هنا خلاص واللي مش عاجبه يخليه راكب و يرجع معايا تاني

- طيب اطلع بينا عالقسم

- الظابط نمرته على موبايلي اهو تاخدي تكلميه علشان ما أسمعش صوتك تاني؟

- ماشي هات أكلمه وأكلم اللي يتشددله كمان

- يوووه ده انتي شكلك بتاعت مشاكل و عاملة قلق من الصبح ووجع دماغ
و شكلك هتضيعي الاصطباحة اللي الواحد عاملها
عالعموم أنا اللي عندي قولته و اللي مش هتنزل هنا دلوقتي ترجع تاني و تبقى تشوفلها عربية تانية

اتنين من الخمسة خدوها من قاصرها و نزلوا
بص السواق و راه لقى التلاتة قاعدين و كأنهم بيتحدوه فداس عالبنزين مرة واحدة و طارت العربية أمريكاني
و وصل للدوران و لف فعلا
بصت اللي في الكنبة الأخيرة للي جنبها و اللي قدامها وحست منهم بنظرات لوم

خرجت براسها من الشباك فجأة و بدأت ترأع بالصوت
- يا لهوي إلحقونا يا ناس..إلحقوناااااا

و لأن أم السواق كانت داعية عليه كان واقف ظابط عند الجامعة و لما سمع الإستغاثة ركب الموتسيكل و طار ورا العربية لحد ما وقفها و نط من عالموتسيكل و جري بسرعة فتح الباب اللي جنب السواق و جابه من لياقة التيشيرت و نزل فيه تلطيش يمين و شمال مع كام شلوت خلفي و هو بيصرخ و يقوله انت خاطفهم و لا عملتلهم ايه يابن الـ.....

- و الله ما عملت حاجة يا باشا

- ما عملتش حاجة
ازاي؟! ده انت ليلة أهلك سودة النهاردة و هوديك في ستين داهية

جرجره خطوتين ناحية الشباك الأخير و بص للتلاتة اللي في العربية و قالهم
- عمل ايه الحيوان ده؟

ردت و قالتله
- مش عايز ينزلنا في الميدان و لف بينا و قال هرجع أرميكو مكان ما جبتكو

- بس كده؟؟؟

- آه

- طيب يا ختي
بقى عاملة الأزعرينه دي كلها علشان ما وصلكوش للميدان؟
يلا غور وصلهم

- ماشي يا باشا تحت أمرك

ركب الظابط الموتسيكل و السواق دخل عربيته و مسك الدريكسيون بشيء من الغل و لف مرة تانية و رجع في اتجاه الميدان من غير أي حركة أو لفظ بشكل آلي أو ميكانيكي منعه من البص في المراية
و قبل الميدان بكام متر و قفت العربية الملاكي اللي قدامه فجأة
داس عالفرامل بكل قوته بس التصادم كان أسرع من رجليه و خبط في العربية اللي قدامه و نزل صاحبها بسرعة مسك في خناقه و بدأ مسلسل التلطيش من تاني

نزلت اللي في الكنبة الأخيرة بسرعة و مشيت في الشارع و هي كاتمة الضحك و بتقول في سرها
- صحيح اللي بيجي عالولايه ما بيكسبش

اقتباس :

إن صمتــى ..
لا يعنــى جهلــى ..
بمــا يــدور حولــى ولكـــــــن
... مــايــدور حولــى ..
لا يستحــق الكـــلام
... صمتـــى لغـــتى
.. فأعذرونى فى قلة كلامــى

كراكيب دربكة ..وعيون مضحكة ..بتبكبك بكا ..وقلوب مفرطة ..وقلوب ممسكة..هتعيش متعيش .
.هتموت ما تموت .. والدنيا هتمشي بلاك أو بكا

كراكيب دربكة ..وعيون مضحكة ..بتبكبك بكا ..وقلوب مفرطة ..وقلوب
ممسكة..هتعيش متعيش .
.هتموت ما تموت .. والدنيا هتمشي بلاك أو بكا

ههههههه
جميل اوى الكلام دا يا الكسندر دا بتاعك

لا يا أستاذ فكك مني دول لشاعر معاصر أنا للأسف لست مبدعا ولكني الحمد لله أتذوق كل ألوان الفنون وعلي فكرة فكك مني

يا أستاذ علي أنا فاهم أنت من الأخر عايز تفسح مجال للجميع وسيادتك عارف بالطبع أن مش كل الناس بتقبل النقد خصوصا من شخص لا تعرفه ولكن الأساس من النقد صدقني هو الإفادة وتحسين الأبداع والرقي به واللي سبق طالبت بيه أن يتعمل جزء أسمة أدب غير مصنف تندرج تحته كل ما هو ليس أدبيا تتكتب فية الحكايات والخواطر وما إلي ذلك وأشكرك

معذرة على الحوارية بهذه الطريقة وان كنت اتمنى لو كانت بداياتى كبداية اسلام ..كان الامر سيختلف معى كثيرا ، وهو لم يصنف نفسه وهناك اعمال نشرت بهذا الباب كانت احق بهذا الكلام وتعليقى المفصل على القصة فى وقت لاحق عندما تسير الامور فى نصابها القويموشكرا

أهلا بالقاص الكبير الأستاذ سيد لو كان المنتدي سامح لي بالرسائل الشخصية كنت بعت لحضرتك أفهمك الموضوع ولكن ليس هناك أي مشكله حصل خير ولكن ياريت يا أستاذ سيد تتناول الموضوعات بالنقد وخصوصا القصة وحضرتك أعتقد أفضل من ينقد والأستاذ مختار بالطبع وذلك كي يستفيد الجميع وشكرا

مش عارف لية أنا حاسس أن النخلة المزروعة ف بقك شايخة
مش عارف ليه أنا حاسس أن الصوره المحطوطة ف عينك بايخة

بيتهيألي كده خلاص الكل اتكلم و الكل قال اللي عنده
بس مع احترامي للدكتور علي مالكش أي حق في حذف الردود من غير حتى ما تعرف رأيي
ليه؟
دلوقتي الأستاذ و الناقد الكبير الأسكندر دخل اتهم كل اللي رد هنا و على رأسهم الأستاذ سيد بالمحاباة و التطبيل لأن الموضوع عبارة عن شوية كلام عبيط و كل اللي رد باستحسان غرضه مصلحة و بيجامل لمجرد إن اللي كاتب الموضوع محطوط جنب اسمه مدير المنتدى
إنما لو حد تاني كان كاتب الموضوع و نفس الردود دي كان هيبقى أمر عادي جدا و ما يستحقش الرد منه لأنه طبعا شايف انه موضوع تافه جدا لا يرتقي لمجرد الرد فيه
ده غير الغلط اللي بين السطور في عمر المختار
كنت أفضل ان الناس هي اللي تكون الحكم على ردوده و تحاول توصله عكس كلامه و ان النقد عمره ما بيكون بالطريقة دي أبدا
النقد بيكون عالنص نفسه مش عالردود و يكون مجمل النقد زي ما قال انه كلام عبيط
أكيد فيه أسلوب تاني ينفع يتقال عليه نقد غير الأسلوب ده خالص بصفة ان حضرتك دارس نقد زي ما بتقول
أنا كان ردي بيتلخص في لإني ما قولتش انها قصة قصيرة أو عمل قصصي إبداعي و نعتبرها حكاية وأظن مالهاش مكان أنسب من قسم اسمه الحكي و السرد
و كمان أنا ماقولتش إني كاتب قصة محترف أو دارس أو على دراية بأسس و قواعد كتابة القصة و لكن مجرد فكرة أو حكاية بنعيشها الغرض توصيلها بسلاسة مش أكتر و الهدف بالنسبالي إنها تكون محسوسة و مفهومة و يعيش معايا القاريء بين سطورها
و لو ده حصل يبقى أنا حققت اللي أنا كنت عايزه من كتابتها
أنا قلت اني متأكد وواثق من إني مش كاتب قصة علشان كده بتقبل النقد بصدر رحب جدا بس المشكلة اني ما شوفتش كلام ينفع يتقال عليه نقد في ردود الاسكندر مجرد اتهامات لأصحاب الردود و بس
استشهدت برأي الأستاذ سيد اللي طبعا ماعجبكش للمرة التانية لأنه مقالش انه نص تافه و عبيط زي ما حضرتك كنت عايز تسمع
ألف شكر يا أستاذ سيد و أنا واثق ان غرض حضرتك التشجيع على استمرار الكتابة و عدم الوقوف عند نقطة معينة وان النص اكيد مليان نقاط ضعف أدبية لكن أنا كنت بعرض صورة بحاول أوصلها للقاريء
و مرة تانية يا دكتور علي انت غير موفق بالمرة في حذف ردود الأسكندر

أحمد عبدالعزيز كتب:

يادكتور إسكندر

هون عليك

واكفف عن توجيه الإهانه لكل نص , ولكل مساهمة , فأنت لم تترك أحد حتى تعرضت له بهذة الأفعال من الشاعرة الكبيرة ؟؟؟ إلى من نبارك مواهبهم ونأمل لهم الخير فى الطريق الأدبي , ووالله الذي لا إله إلا هو , نحن لسنا عاجزين عن النقد الذي تقوم به وربما تظن نفسك انك تعلم مالا يعلمه سواك ,,, ولا أقصد النص الذي نحن بصدده تحديداً ,ولكن نرى الأمور من زوايا أخرى ويكفينا أننا لا نختفي وراء أسماء مستعارة , ولا نعمم أبداً فرض حكر وحراسة على المنتدى الأدبي خاصة , فأين أنت من المهندس مختار محمود الذي تستشهد به وأين أنت من الشاعر سميح عزت الذي يعلم من القوافي ماضيها وحاضرها , وكان في سماحة لا يتعرض لأحد كما تتعرض انت , وكم كان الأستاذ مختار يعاني أشد المعاناه من تحميل نفسه فوق ما تطيق ويقوم بالرد على كل حالم بالموهبه وأنا منهم , ويبارك إنتاج قلمه , وهو الغني عن ذلك , فرجاء ان ترد عندما يعجبك العمل , وتمتنع عندما لا يعجبك ....

تقبل مروري

بالراحة شوية كدا يا جماعة .. أنتو مالكم كدا إذا كنتم مستغنين عن النقد خلاص أنتم أحرار والمنتديات اللي بتفهم وجهة نظري كتير أنتو يا جماعة منغلقين علي نفسكم الأساس يا جماعة من النقد أني لما أقول حاجة يترد عليا بكلام نقدي مش شتايم من كل واحد اللي يقولي عرضحلجي ولاللي يلقح بالكلام زي ..... تحية بس يا جماعة للأستاذ أسلام لأنه كان أكثركم أحتراما بس يا جماعة أتحداكم من غير نقد محدش هيتقدم خطوة ولازم تسمع الأخر مهما كان رأية لأن الأبداع كدا ..عملك مش ملكك دا ملك الكل وأي حد يمكن يكون له رأي فية وشكرا يا أستاذ أحمد علي كلامك اللي عجب الناس كلها عداي بالطبع أشكركم جميعا وأوعدكم مش هتشوفوني تاني ف المنتدي و

اكلمكم بصدق يا جماعة ودون أي غرور أنا أسمي أكبر من المنتدي زي ما فيه أسماء كتير زي أ.مختار وأ.سيد وأ.عادل أسماءهم أكبر من المندي ..والسلام عليكم

https://shabab-el3amar.yoo7.com/montada-f44/topic-t20272.htm?sid=939201afa32484e091a0d792550d13dc
ده رابط قصة لى اسعدنى النقد فيها ولو كان قاسى عن ذلك .. فخير لى ان ينقدنى المقربين بدلا من تصويب اخطائى ويمتدحونى حتى اذا عرضت عملى بغرور من امتدحونى اتلقى الصفعات فاما ان ادعى بالنفس الامارة بالسوء انهم لايفهمون او انكص على نفسى منغلقا متهما وسط المثقفين بالفساد ولا يريدون عملاق ينافسهم ونحن لانقبل الحاليين .. واكيد كل عمل فيه ايجابيات وسلبيات خاصة ان كانت محاولة اولية ولم يصنفها على انها قصة فلنبدا بعرض الايجابيات مع مراعاة التالى فى المحاولات القادمة وفى ندى العمار 2 سنعرض نموذجيين لمواهب عى الطريق وجهانهم بالنقد مباشرة وعرضنا الصالح للتشر كتشجيع ..اما قصة ميكروباص ساعرضها فى مشروع مجلة قائمة لجمعية الادب والفنون المسرحية ومعها نقد ا/مختار وعرضت عليه الامر ووافق
ورجاء اخير : الغاء كل الاسماء المستعارة وارفاق صورة الشخص مرفق باسمه .. فانا اواجه براى اعتز به ولا داعى للقلق من النقد فلا انا يوسف ادريس
واداعب الاخ الاسكندر الاكبر الكثير يرى ان الناقد كاتب فاشل رغم عدم ايمانى بهذه المقولةواسف للاطالة