رنين مغناطيسى ..اخر ابداعات الجميل على سلامه

الشاعر الجميل على سلامــــــــه

رنين مغناطيسى

قلت أعمل أشعة رنين..

جايز أعرف الألم ده من إيه

ومن مين..

عملتها على كل الجسم

من أول الاسم

ولحد شعر الراس..

لكن لما بص الدكتور

قاللى يا ابنى مفيش جواك

غير أنبوبة وحتة بنكرياس..

فين بقية الحاجات

إنت عملت وانت صغير عمليات

قلت له أنا شايل اللوز

فى المستشفى اللى عند كوبرى عباس..

قاللى اللوز موجودة..!

وزمارة رقبتك موجودة

وده غالباً لأسباب أمنية

والقفص يادكتور

قفص إيه يا ابنى..؟

القفص الصدرى..

قاللى القفص فاضى

قلت له أرجوك بص تانى

بس كويس زى الناس

دى تبقى مصيبة لو سرقوا قلبى

بكل اللى فيه من حبايب

وسرقوا الروح

والإحساس..

نقلا عن المصرى اليوم

» كرسى بلاستيك ع النيل ...جديد الجميل على سلامه
» الف سلامه يا خيـــــــــــــــــــرى
» على سلامه...
» من حقنا نحلم ( على سلامه)
» ألف سلامه يا عمرو