حلقات مسلسل شباب سيس ..ولكن !! - تم إضافة الحلقة السابعة

بسم الله الرحمن الرحيم

[ندعوك للتسجيل في المنتدى أو التعريف بنفسك لمعاينة هذه الصورة]

كل سنه وكل أخواتى ع المنتدي الكرام بألف خير
يا رب يجعل من شهر رمضان مغفره لذنوبنا ومقربه منه اللهم امين

اول يوم رمضان قلت يا واد أفتح ال(t.v) تليفزيون يعنى عشان بس بتوع التعليم المجانى يفهمو

المهم جبت الريموت وقلت بسم الله

وتك تك ولقيت مسلسل قلت عادى رمضان كريم

قلت غير يا واد غيّر القناه وبغيّر لقيت مسلسل قلت عادى عادى رمضان كريم برضو المهم غيرت تانى وتخيلو لقيت ايه
صح صح

مسلسل برضو.

قلت رمضان كريم بس مش كريم اوى كده انا أتخنقت.. التليفزيون كله بقى مسلسلات

المهم مسلسلات فيها الحلو اوى وفيها اللى مش حلو اوى

قفلت الجهاز الخنيق ده وقلت لازم أفكر
طلعت في دماغي

فكره مطرقعه كده يا رب تعجبكم

اه هي دي اللى في دماغك

ايوه هي ما تتردش
بالظبط كده

قلت ليه لا ما اعملش فكرة مسلسل ع المنتدى ؟؟

بس ان شاء الله المسلسل مش هيكون ممل

المسلسل طبعا من تأليفي

ومن وحي خيالى

واي تشابه بينه وبين الواقع هو بالتأكيد مقصود....مقصود....مقصود

المسلسل هيكون 30 حلقه ع اد الشهر الكريم

ان شاء الله اول حلقه النهارده بعد صلاة العشــاء والتراويح

انتظرونا.......

ايه ده انا نسيت حاجه اه صح
المسلسل اسمه

شــباب سيس.. ...ولكن !!
بطولة:

مجموعه من أمهر الممثلين ع المنتدى

فكره بسيطه عن المسلسل:

المسلسل
بيوضحلنا ان فعلا العبره بالشباب وان الشباب ده عمود الامه وازاى وصلو ف
الزمن ده لدرجه من الضياع والاستهوان بكل حاجه بس وقت الشده ووقت
الفوقان رجاله

......
كفايه بقي علشان ما احرقش المسلسل
نفسى أسمع تشجيع بقى

يلا بقي انتظرونا

وان شاء الله يعجبكم المسلسل

بسم الله الرحمن الرحيم

وجه معادنا دلوقتى يا حبايبنا الحلوين المقطقطين مع المسلسل المفضل على منتدى شباب العمار

المقدمه بقى بتاعت كل مسلسل
تا تا تا تا تاتااااااااااااا
اتحاد الاذاعه والتلفيزيون
وبالتعاون مع منتديات البطه الضايعه
يقدمان

(شباب سيس ..ولكن..!!)

أبــــــــطال الحلقه الاولى

كريم:ده انا طبعا(حد فاشل اوى بس دماغه شغاله ف اى حاجه غير دراسته ومذاكرته

مروه:ودى أختى(الاخت الكبيره لكريم شخصيه طيبه وحنينه لابعد الحدود لدرجه تحس مش هى الكبيره مدرسة فرنساوى ف مدرسه خاصه )
مصطفى :الشاب الطموح هو فاشل برضو بس بيحاول يبقى نبغه هو عنده مواهب كتير بس مش
مركز ف حاجه شويه يبقى فاشل وطهقان من الدنيا وشويه يبقى طموح وفايق

أسماء :أخت مصطفى الصغيرة زنانه جدا وبتحب تلعب ف حاجة مصطفى ودايما مع بعض ف

مشاكل وخناقات بتموت ف الكمبيوتر والانترنت
اسلام:وده شاب ضايع جدا مش فايق خالص ومش بيهمه اى حاجه

محمد:ابن خالة اسلام وانتيمه ورفيقه وبيعملو كل الخبايا مع بعض

هيغني التتر المطرب الشعبي عبده فتله

نسيبكم مع التتر بقى

(الحلقه الاولى)
فى بيت كريم
الساعه واحده الظهر وموبايله شغال
تررررررررررررررررررررررررررررررررررررررررررم تررررررررررررررررررررررم

كريم :يوووووووووووووووووووووووووووووووووووه مين الشخصيه الغبيه اللى بيتصل الصبح كده

كريم:الووووووووو....مين ع الصبح كده
ع الطرف التاني:ايوه يا بني انا اسلام ايه انت لسه نايم ولا ايه

كريم:مين... مين ....ما اعرفش حد بالاسم ده..سلام

اسلام:ايه يا عم انت زودتها امبارح في الشرب ولا ايه

كريم:لا والله ولا زودتها ولا حاجه...هو الطبيعي زي ما انت عارف

اسلام:امال في ايه بس

كريم :الحاج يا مان كان مبيتلي ع علقه من امبارح

ومكانش راضي يدخلني البيت....بيقولي راجعلي وش الفجر....طب وايه يعني راجعله وش الفجر...
ده حتي البت سوسن بتروح كل يوم بعد الفجر....بس الحمد لله اقنعته اننا كنا بنذاكر عند الواد مصطفى الدحيح
اسلام:طب الحمد لله
بس بقولك ايه.احنا ع معادنا انهارده الساعه 11(ف السيبر)
اما انا معايا حتة صنف
انما ايه
كريم:بجد والله .طب كويس ...وبقيت تعرف تمصلح من ورايا اهوا يا سولوم...ماشي يا مان
بس في مشكله صغيره
الحاج يا عم هقوله ايه بس.....

اسلام:زي كل مره هروح ابعتلك الواد محمد المدروخ يجيلك يقنع الحاج انكم هتذاكروا شويه

كريم:لاأ الواد محمد صبرى لاأ ده عيل غبى وأنا عارفه ياعم لاأ الله الغنى
اسلام:ياعم مالكش دعوه أنا هفهمه وهظبط معاه جامد ماتقلقش
كريم:اذا كان كدا ماشى
اسلام:أوكش...يلا سلام بقي الله يخرب بيتك زي ما خربت رصيدي....هكلم البت فيفي ازاي انا كده بقي

كريم:مافيش حد مضيعك يا اسلام غير البنات دى يابنى والله يالااااا
سلام...بس اوعي تنسي تبعت محمد المدروخ
اسلام:عيب ياكبير سلام بقى
.
.
.

الساعه تسعه جرز الباب
ترنننننننننننننننننننننننننن تنرننننننننننننننننن
(صوت الجرس العصفوره اللى ف كل بيت مصرى)

"الحاج: ياد يا كريم شوف مين
كريم:(ف الحمام)(اوبا الواد محمد جه )حـــــاضر يا مان

الحاج
: .. قبل ما تفتح بس خد.تعال هنا..خد تعالي بس...ايه يا واد (مان) دي انت
بتشتم ابوك يا كلب...هي دي اخرة تربيتي ليك...حاضر...حاضر

كريم: يووه بقى معلش يا حاج فلتة لسان والله....عديها بقي ما تبقاش قفيـــــــــــل كدا

كريم:بيفتح الباب لقي محمد المدروخ في وشه
كريم:ولااا
محمد .اسلام رساك ع الدور ولا لا......عارف ان غلطت غلطه واحده بس هروح
لابوك اقوله ع البت اللى كنت واقف معاها في الكليه امبارح

محمد:بس بس وطى صوتك يا برنس انا كنت بجيب منها محاضره والله

كريم:دانت ما تعرفش ان اي كلام مع البنات حرام...يا فاسق....فاسق...فاسق...يا سفيق

محمد:خلاص....خلاص والله مش هغلط خالص
بس والنبي اوعي تقول لابويا

وبالفغل دخلوا للحاج واقنعوه
ال ايه انهم راييحين يذاكروا
مع انا الحاج عارف
ان كريم في كليه ومحمد في كليه تانيه
بس هيعمل ايه
هو اصلا رامي طوبة كريم من زمااااااااااااااان
من ساعة ما عرف انه فاشل وصايع

بكده اول حلقه فنيتو
هنسيبكو بقي مع تتر النهايه والمغني العاطفي
تامر فجله

يلا استنوا حلقة بكره....سلام

الحلقه 2
أبطال الحلقه:
اسلام (جوجو):
وده يعتبر مصدر الفساد للشله الوحيد هو اللى بيبيع الفساد للشله مخدرات
برشام حقن كل حاجه ماشى بدولاب للمخدرات يمتلك سيبر صغير ومش بياكل منه
عيش

بعد ما كريم ضحك على باباه بالواد محمد المدروخ وخرجو وفى أثناء نزولهم ع السلم

كريم:تمام يااااد يا محمد دروخه دروخه يعنى

محمد:امال ايه ياريس ده انا دماغى دى توزن بلاد كتيرة اوى

كريم:المهم نكلم الواد مصطفى عشان يسبقنا عند السيبر الواد اسلام جوجو عاملنا جو شبورة هناك

محمد:تمام يا كبير عاوزين نخربها النهارده مش عاوز أشوف حاجه خالص واناا مروح

كريم:ولااااا يا محمد انا عاوز أسألك سؤال؟

محمد:أسأل يا ريسنا

كريم: أنا عارفك بقالى كام سنه كدا ؟؟

محمد :اممممم بقالنا كتير مع بعض ياريس يجى كدا من خمستاشر سنه

كريم:يااااااه
ده انا أستحملت كتير اوى عارف بقى ف الخمستاشر سنه دوووول عمرك مانصحتنى
نصيحه بجد ولا عمرك قولتلى اهتم بصحتك او نفسى نبطل شرب
مش عارف بحس ان انتا لو طلعلك قرنين وديل هتبقى شيطان
محمد:قال يعنى حوش جناحاتك ياعم الملاك .ما انتا اللى بدماغك ياعم هو انا هضربك على ايدك عقلك ف راسك تعرف خلاصك اه
كريم:عندك حق بس هى الصحوبية الغم بتاعتكو بصراحه هى السبب
محمد:ونبى بطل شغل المسلسلات ده بقى ماتقفلش اليوم بدرى بدرى فوق معايا كدا عشان انا مدروخ اصلن وانتا اللى هتفوقنى
كريم:ماشى ياسيدى يالا بينا بس وهكلم مصطفى وانا ف الطريق
تررررررررررررررررررن ترررررررررن
مصطفى:ايوه يا سيدى ؟؟
كريم:ايوه يا معلم انتا فين ؟
مصطفى :ياعم عندى تسليم حاجات ف الكليه بكره وقاعد اخلصها ؟؟
كريم:طب سيب اللى ف ايدك وانزل على سيبر جوجو حالااااا
مصطفى:لاا يا عم ونبى انتو بتسهرو وبتأخر وانا ورايا حاجات كتير
كريم :يابنى مش هنأخرك وهترجع بدرى كمان دى هى نص ساعه بس ..نص ساعه
مصطفى:اممممممم انتا اللى قولت اهه نص ساعه عشان لما اجى امشى ماتعملوش فرح تمام
كريم:ياعم اخلص بقى وانزل انتا هتزلنا ..
مصطفى:حاضر يالا سى يو لاتر
كريم:سى يو يا عنيا
كريم
:عارف ياد يا محمد الواد مصطفى ده لو يبعد عننا هيبقى حاجه والله تحس ان
دماغه حلوه بس تقول ايه بقى مش هنخلى حد يبقى فالح دى سياستنا هنا
محمد:ايون تمام دى هى سوستتنا هنا
كريم :سوستتنا ايه وبتاع ايه نفسى تفوووووووق يابنى انتا 24 ساعه نايم اوووووف
محمد:أعملك انا ايه بس .أنا طبيعتى كدا ..هنعترض ياجدع انتا هتكفر؟؟
كريم:ياعم
ولا هكفر ولا حاجه بس من كتر ما انا بمشى معاك بقيت بحس ان انتى بتعدينى
انا بقيت انام كتير جدا يمكن اكتر من 10 ساعات وساعات كدا بتجيلى حاله انى
بنام وانا قاعد مع اى حد او بتكلم مع اى حد
محمد:ياساتر يارب انا مش
كدا يا عم خالص المرض ده مش من عندى ..انا اه بنام اكتر من 12 ساعه بس مش
بنام وانا صاحى انا ببقى مدروخ شويه بس انما صاحى ومعاك
كريم:انا عاوز اعرف انتا ف الامتحانات تعمل ايه ..بتذاكر ازاى؟؟
محمد:ههههههههههه بقولك بنام 12 ساعه هذاكر امتى ؟؟ ده غير الاكل والشرب قول كمان 3 ساعات يبقى 15 ساعه فاضل كام من اليوم ؟؟
كريم :فاضل كدا 9 ساعات
محمد:حلوين اوى كدا ياعم بخش أئيل فيهم شويه كدا بعد الغدا
كريم:ده انتا اسطورة ف النوم والدروخه بجد انتا فوق الفظيع تحت المريع انتا عندك شيزوفرنيا
محمد:ايه ايه......شيفو..شيوفز...شزوفو....الكلمه اللى انتا قولتها دى ؟؟
كريم:ياعم كمل جمله صح بقى ونبى انتا احسن حاجه ليك تسكت خالص اسكت ساكت
محمد: [ندعوك للتسجيل في المنتدى أو التعريف بنفسك لمعاينة هذه الصورة]
كريم ومحمد وصلو سايبر اسلام جوجو
كريم:مساؤوو عنب يا جوجو
جوجو:مساؤ فل يا ريس
كريم :ها يا جوجو ايه العشا النهارده
جوجو:والله ياكيمو حصل ظرف كدا ومعرفتش أجيب اى حاجه النهارده
كريم:ايه يا عنيا معرفتش ايه؟؟..ده انا نازل مخصوص عشانك النهارده ماتقول حاجه يا عم محمد؟؟
محمد:صح هو زى ما قالك كدا يا جوجو اه ياعم
كريم:يا جوجو طب اتصرف انا خرمان
جوجو:أطبخى يا جارية كلف يا كيمو
كريم:انا مش عامل حسابى ف اى فلوووس خالص وانتا عارف الجماعه اللى جايين مش معاهم اللضا وانتا عارف كل ما بييجى قرشين بنلم ونديهملك
جوجو:والله يا كيمو انا عمرى ما هتأخر عليك بس منين؟؟
كريم:اممممم طيب ياجوجو...انا جاتلى حتة فكرة هجيب بيها فلوووس

وكدا خلصت الحلقه التانيه وعاوزين نعرف ف الحلقه اللى جايا هيجيب الفلوس منين
ربنا يعينك يا بنى

الحلقه 3
وبعد ما راحو عند جوجو واتفأجئو انى مافيش اى فلوس معاهم

ولازم يحصلو على النقود عشان يشترو الهباب اللى بيشربوووووووه
امام سيبر جوجو
كريم:يوووووووووه مش عارف مصطفى بيكنسل عليا ليه ؟؟

محمد:يمكن جاى ف الطريق؟؟

كريم:ما هو انا عاوز أخليه يتصرف ف فلوس وهو جاى

محمد :ياعم طب ابعتله رساله

كريم:تصدق فكره انا هبعتله رساله

تك تك تك تكت ككت كت

كريم:تمام بعتها خلاص

تررررررررررن ترررررررررن

كريم:الو أيوا يا مصطفى ؟

مصطفى:ايوا يابنى انا مش هعرف أتصرف ف الفلوس خالص بجد

كريم:عشان خاطرى انا ياصاصا بجد محتاجين 30 جنيه ضرورى جدا جدا

مصطفى:وعايزهم ف ايه ؟

كريم:هيكون ايه يعنى حاله انسانيه اكيد يالا بقى ونبى يا صاصا خليك حلو

مصطفى:امممم..مع انك بتكدب ..بس هحاول واتصرف بقى ...يالا سلام

كريم :سلام

فى بيت مصطفى

مصطفى:أعمل ايه ياربى ..اخد من بابا ..بس هيقولى عاوزهم ليه ؟ولو قلتله ع الحقيقه اللى انا مش عارفها اصلن مش عارف هيقولى ايه ...اممممم

ايون مافيش غير أسماء بس يارب ما تخنقنى زى كل مره وتقعد تعملى س و ج يالا ان لله وان اليه راجعون

مصطفى:أسماء ...يا سومااا ..يا سما

أسماء قاعده ع الكمبيوتر وقدامها كوباية عصير وف ايديها ساندوتش ومبهدله الدنيا خالص

أسماء:ايووووووون أنا هنا اهه يامصطفى

مصطفى:اسماء الشحرورة الجميله اللطيفه اللذيذه

أسماء:أنجز يا عنيا انا مش فاضيالك ومش معايا أى فلووووس فاهم؟

مصطفى:ياعبيطه فلوس ايه بس هو فى بين الاخوات فلوس؟؟

أسماء:اها يا خويا اضحك عليا ونبى اضحك

مصطفى:يابنتى اضحك عليكى ايه بمنظرك ده انتى مش شايفه المزبله اللى انتى عاملاها والدنيا المبهدله دى ؟؟

أسماء:فين
يخويا البهدله دى ..أنتا قصدك ع الكام كوبايه وطبق دول اللى ع السرير
..وعلىالاكل المنتنتور فى كل حته ده ؟يا عمنا ده عادى وبعون الله ف خمس
دقايق اخلى الاوضه دى بتزغرط

مصطفى:يادى الاسطوانه اللى زهقت منها انتى كل ما اكلمك تقولى نفس الكلام وعمرى مالقيت الاوضه دى متوضبه ابدا

أسماء:انتا بتزعقلى ليه دلوقتى انا محدش يزعقلى أبدا ..يابابا يا بابا ......أبعد أبنك عنى

مصطفى:بس بس بس ..خلاص وربنا ما هكلمك تانى بصى بهدلى زى ما انتى عاوزه بس بلاش بابا انا مش ناقص عاوز أخرج على خير

وبعدين هو مين يعنى اللى كنتى لما بتعوزى حاجه كان بيتوسطلك عند بابا وماما كمان مش انا هه ما تردى؟

أسماء:يووووه
على الزل بتاعك ده ياعم دى كانت مره وحيده يوم ما كنت عاوزه أطلع الرحله
وخلاص خلصت ياعم انسى بقى الدنيا هات وخد يا ابو دنيا

مصطفى:أنا مش عارف انا ساعات بشك ان انتى مش اختى بحس ان احنا لقيينك ف ورشه بجد

أسماء:كلك زوق يا هندزه

مصطفى:نتكلم بجد بقى يا احلى اخت ف الدنيا

أسماء:صدعنى يا باشا ..أمرك ياجميل؟؟

مصطفى: ال ال ال ال....

أسماء:ياعم انتا هتلقلق من أولها اخلص يا حبيبى ورايا منتديات وشغل للصبح يالا يا بابا مش فاضيلنك

مصطفى:هقول اهه ..بس هو كان فى حاجه كدا عاوز أقولهالك كدا ..كنت محتاج منك 30 جنيه وهرجعهملك اول الشهر والله أصل فى بس حاجه كدا ..
أسماء:بس بس من غير ماتكمل انا مش معايا الا 10 جنيه خدهم وفكك منى

مصطفى:10 ايه؟؟.لاأ طبعا انا محتاج 30 عشان خاطر اخوكى ..اخوكى مزنوق وعنده خروجه النهارده جامده جدا

أسماء:وااااااااااااااو يا نمس وعندك خروجه مع مين بقى؟؟

مصطفى:ماتبقيش رخمه يا أسماء بقى ماتحرجنيش

أسماء:ماشى يا عم روميو خد 10 اهه وهجبلك من بابا 10 تانيه هقله عندى مذكرات اجبها ولا تزعلى نفسك يا بطه

مصطفى:يا أسماء بقلك عاوز 30 ..

أسماء:بقلك ايه ده اللى هقدر اتصرف فيه دلوقتى مش عاجبك وربنا ما انا متحركه من مكانى

مصطفى:خلاص قومى قومى (قام عليكى خد خبرك)

أسماء:بتقول حاجه يا كابتشن؟؟

مصطفى :بقول قومى يا اسماء يختى يكش تبقى مديرة منتدى

أسماء:يسمع من بقك ربنا يا صاصا دى اكتر حلم بحبمه وربنا من زمان من ساعة ما دخلت ع الشبكه العنكبوتيه وانا من ساعتها نفسى .......

مصطفى:ما خلاص يا اسماء بطلى رغى وروحى بقى اووووووووف

أسماء:دايما كابتنى كدهوت وكابسنى حرام عليك يبنى انتا مالكش اخوات طيبين؟؟

مصطفى:لاأأ كلى أخواتى رخمه يالا بقى انجزى العيال هيظبطونى

أسماء:حاضر بس عدّ الجمايل :مصطفى:عنينا ياستى

مصطفى بعد ما اخد الفلوس من أسماء نزل الشارع وهو ف الطريق

مصطفى:ألوووووو ايوه يا كريم انا معرفتش أتصرف غير ف 20 جنيه بس والله هما اللى معايا

كريم:انتا متعملش حاجه كامله للاخر يا أخى اوووووووف..طيب خلاص كويس احسن من مافيش برضو تعالا يالاااا بسرعه ..سلام

كريم:ولاا يا محمد مصطفى متصرفش غير ف 20 بس والعمل؟؟

محمد:العمل عمل ربنا

كريم:اممممم..تصدق انا ممكن اروح البيت يمكن يمكن احاول اطلع بأى فلوس

هحاول أنصـــــــــــــــــــــب بقى مشرط لص الاثار هيرجع من تانى

وبكره خلصت الحلقه النهارده وهنشوف الحلقه الجايا كريم هينصب ازاى ف البيت على أخواته
يالا

سلام

الحلقه 4
كريم ف المنزل
وبعد ما الدنيا ضاقت بالجماعه المزنوقين ف 10 جنيه

كريم جاتله فكره ان هو يروح البيت ويحاول يتصرف بقى ف اى حاجه

وهو ف طريقه للبيت عمال يفكر هينصب ازاى عليهم ف البيت ينصب على اخته مروه

ولا ينصب على باباه ولا يعمل ايه؟؟

المهم وهو طالع ع السلم فجأه هووووووب النور قطع

كريم قال أحسن برضو السرقه ف الضلمه خير

وبعد ما دخل من باب الشقه
مروه:الخير على قدوم المسطولين

كريم:ماتلمى لسانك بقى مش كفايه النور قطع حاجه تقرف

مروه:طيب يا اخى قول بون سواار الاول ؟

كريم:هو
انتى عشان مدرسة فرنساوى هتصدعينا بقى..وبعدين انا كنت فاشل ف الفرنساوى
وجبت فيه 12 من 50 واختى مدرسة فرنساوى احضرونا يا خلق احضرونا ياعالم
مروه:سوفااااااج.. أسمى بروفيسييو وبعدين وطى صوتك ده يااض بدل ما انده لمامتك اخليها تسنجفك

كريم:قال صحيح هو بابا فين ..مش سامع زعيق ولا تخبيط؟؟ولا حتى سامع صوت التليفزيون؟؟

مروه :يابنى ابوك ف الشغل لسه مرجعش هو ورديه بليل ...والنور قاطع يبقى التليفزيون هيطلعلو صوت ازاى..انتا حمار يا
حمار؟؟ هه
كريم:اها صحيح الواحد تحسى ان هو مش عايش معاكو ولا عارف بابا بيجى امتى ولا بيرجع امتى

مروه:ما انتا كل يوم يا اما ف الجامعه وبترجع متأخر يا أما نايم لحد بليل تصحى تاكل وتخرج وتيجى ع النوم

كريم:هنعمل ايه بقى أكل العيش مر

بس تعرفى أبوكى ده بيتعب بس عشان منشفها علينا عمر ما ربنا هيفتحها ف وشه كدا

مروه:أخرس يا بنى انتا بتتكلم عن ابوك

كريم:اها ما انتى مش حاسه ب اللى انا فيه يختى انتا شغاله مدرسه اد الدنيا اى نعم مدرسه فاشله بس برضو بتقبضى والمايه بتجرى

ف اديكى واللى حتى عمرك ما جيتى رشيتى عليا كدا رشه جامده ..خد يا واد هاتلك تشرتين ..بانطلون..كوز دره حتى

مروه:انا برضو يا كريم...أخس عليك هو مين بيدفعلك مصاريف الكليه ولا مين اللى كل يوم هاتى هاتى هاتى ده حتى مش عارفه

اجمع
ولا اى حاجه من جهازى ولا انتو ناسيين ان انا المفروض بنت زى بقيت البنات
وهيجيلى يوم واتجوز ..اينعم أتأخرت بس برضو ربنا هيكرمنى

كريم:يوووه يا مروه ما انتى اللى بتضايقينى والله ما قصدى ازعلك كدا وبعدين يا عبيطه هتسبينا وتروحى فين ...ده ابوكى ممكن
يروح فيها لو عرف ان انتى هتغيبى عن البيت يوم بس بقى خلاص

مروه:أوعى ايدك انا مش بكلمك هه

كريم:خلاص بقى وربنا خلاص اضحكك فاكره اخر راجل جه اتقدملك من كام شهر كدا الراجل الاهبل ده

فاكره كان قاعد ازاى وبيقول لابوكى لازم كل حاجه نجيبها سوا وبالنص انا عليا الشقه وانتا عليكو الشبكه

مروه:هههههههههههههه اه والله فكرتنى ده كان ناقص يقول انتو اللى هتعملو الفرح

كريم:ماهو برضو ابوكى طردو طردت الكلاب

مروه:ياسيدى انا والله ما زعلانه بس الواحد برضو بيكبر وعاوز يخفف الحمل من على بابا وماما شويه

كريم:ولا يهمك ده نصيب يا بنتى المهم أعمليلى كوباية شاى وهاتيهالى ع البلكونه ..اشطا

مروه:داكووووووووور

وكريم واقف ف البلكونه فجأه طلعت بنت الجيران اللى قصادهم بنت اموره اوى وجميله بس اتمه وبتتكسف اوى وأسمها أسيرة
كريم::بسسسسسس بسسسسسس بسسسس

أسيره:اووووووف كل يوم يقعد يبسبس ويتفتف

كريم:ايه ده هو انا مش عمال ابسبس وانونو

أسيرة :ال .......ال امممم ياعم حضرتك وانا مالى انتا بتبسبس يمكن عندك قطه ولاا حاجه بتلعب معاها

كريم:أيووووووووون هى فعلا قطه بس قطه ايه زى القمر وربنا

أسيرة:امممممم يعنى اعتبر دى معاكسه واروح جرى على بابا أقوله عشان ييجى ويقول لابوك ويعملك مشكله زى كل مره هه أروح؟؟

كريم:يا ريت تقولى لبابا عشان يخلى باله من القطه دى أحسن دى مش مبطله خربشا فيا ومش بصعب عليها خالص

أسيرة:يابنى نفسى مره تحس على دمك انتا كل مرة بتتهزق وبرضو مافيش فايده

كريم:عادى
جدا ده عنتر قعد يضرب صبح وليل من ابو عبله ولا كان بيهمه هو ماكانش يقدر
يسكع ابوها ده قلمين ينيمه مكانه بس ضرب الحبيب زى ملى الانابيب

أسيرة:يابنى انا زهقت منك انا عارف قرف ايه ده

كريم:وربنا ما انا سايبك وكلمه كمان وهنطلك ف البكونه واعملك فضيحه بس يالاااا....
(وكريم مكملش الجمله ولقى اللى ماسكه من قفااااااااه)
مروه:الشــــــــــــــــــــاى يا سفيق بتعمل ايه يا واد وفضيحة ايه اللى انتا بتتكلم عنها

كريم:تف تف تف تف تف

فى ايه يا مروه انتى عاوزه تجبيلى شلل رباعى حرام عليكى
مروه:ابسلوتلى وىىى.

كريم:كلمينى عربى ونبى

مروه:ايون انا نفسى تتشل ونرتاح منك وتبطل معاكسه ف البنت الغلبانه ..طب بزمتك ترضى حد يعمل ف اختك كدا

كريم:سووو وات..طالما ان بابلك ومافيهوش فيلنجس ..سو واااااات

مروه:اووووووف ع الافلام اللى كلت دماغك انا هسيبك وهدخل شكل أبووووك جه يوم زى الفل يا ريس

وبكده انتهت حلقتن النهارده استنونا بكره بقى

يالا

سلالام

الحلقه 5

وبعد الحوار اللى دار بين كريم ومروه ف البلكونه وانتهى على وصول الحاج من شغله

الحاج داخل من الباب ووشه اصفر زى اللمونه

الحاج:اه يانا ....اه اه

مروه:مالك يابابا مالك الف بعد الشر عنك

الام:مالك يا ابو كريم مالك فيك ايه؟؟

الحاج:مافيش حاجه يا جماعه انا بخير بس مش عارف وانا ف الشغل بتوضأ وانا بتمضمض نزل من بقى شوية دم
ودرجة حرارتى عاليه شويه وجسمى ومفاصلى كلهم واجعنى اوى

كريم:لا يا بابا لازم يشوفك دكتور انا هنزل أجيب دكتور وأرجع حالا

الحاج:مالوش لازمه يابنى وبعدين ايه لزمة المصاريف دى انا هاخد اسبرين وهبقى كويس

مروه:يابابا
أسبرين ايه بس؟؟ انتا بتهمل ف نفسك كدا ليه حرام عليك صحتك انزل ياكريم
هات دكتور وتعالا حالا هو احنا عندنا كام بابا يعنى ولا هو ياسى بابا عاوز
تدلع علينا شويه

كريم:انا هنزل اجيب الدكتور بدوى من البيت واجى بس يارب يكون صاحى عقبال ماتدخلوه السرير وتغيروله هدومه

ونزل كريم على ملاا وشه وجاب الدكتور وجه دخل الدكتور وكشف ع الحاج وخرج

مروه:خير يا دكتور بابا مالو

الدكتور:خير ان شاء الله هو بس فى أشتباه ف فيروس الكبدى الوبائى بس انا مش ادر احدد 100%

كريم:فيرس سى؟

الدكتور:احنا لسه ف مرحلة اشتباه ومش هنقدر نتأكد غير بالتحاليل والاشعه وياريت تعدو عليا بكرا ف المستشفى

مروه:يانهار اسود فيرس سى ..بابا عنده فيرس سى؟

الدكتور:اهدى يا انسه مروه مش كدا احنا لسه مش متأكدين اهم حاجه الراحه التامه له وياريت محدش يعرف اى حاجه بس الراحه الراحه الراحه
وياريت تعدو عليا بكرا
كريم:ان شاء الله يا دكتور

مروه:وصل الدكتور يا كريم لحد الباب

كريم:حاضر ..اتفضل يا دكتور

مروه دخلت على باباها

مروه:ايه يا سى بابا هتعملنا فيها تعبان ماتقوم بقى ياعم عشان نتعشى

الحاج:ماليش نفس والله يا مروه يابنتى ولا عاوز أحط الاكل ف بقى..بس هو الدكتور قال ايه؟؟

مروه:اي..
اي.. اال .. هو الدكاتره بيقولو حاجه هما بياخدو فلوس وخلاص ماقالش حاجه
مهمه يعنى بيقول شوية ارهاق وتعب م الشغل ولازم ترتاح وخلاص

الحاج:ارهاق
وتعب؟؟ومن امتى ده أنا شغال بقالى 25 سنه شغال عمرى ما جالى ارهاق او تعب
من الشغل وانا اتعودت على كدا..ماتكدبيش عليا يامروه فى ايه؟؟

مروه:
ماسكه دموعها بالعافيه:يابابا مافيش والله مافيش.. اهم حاجه بس ترتاح
وبكرا هتبقى كويس وان شاء الله كريم ياخدك الصبح وتروحو المستشفى وهتبقى
كويس والله

الحاج:مش عارف حاسس انى خلاص ايامى ف الدنيا معدوده وخلاص اللى فاضل اقل كتير اوى م اللى راح

مروه:(بتمسح
دموعها من على خدها)لاأ يابابا ماتقولش كدا وهتسبنا لمين ..وهو انا هتجوز
وانتا مش معايا برضو ..ولا مين اللى هيمسك ايدى يوم فرحى ولا مين اللى
بيطبطب عليا لما اكون زعلانه ولا لما الواد ابنك ده بيزعلنى ..هه مين
يابابا؟

الحاج:خلاص يامروه يابنتى دى سنة الحياه ناس رايحه وناس جايا ولا احنا هناخد زمنا وزمان غيرنا

مروه:الاعمار بيد الله يا بابا بس ماتقولش كدا ادامى تانى انا بجد مش مستحمله أسمع الكلام ده بجد

الحاج:بطلى عياط يامروه وتعالى جمبى هنا ..ايون هنا ....ماتقربى يابنتى شويه هو انا هعضك ههههههه..ايوووون بطلى عياط بقى
انا ان شاء الله هبقى كويس وزى الفل طول ما انتو بخير وبعدين بس بقى عشان مامتكو ما تتعبش أكتر ماهى تعبانه

مروه:خلاص
يا احلى اب ف الدنيا دى كلها ربنا يخليك لينا ..يالا بقى قوم كدا خدلك دش
واتوضا وصلى أكون انا حضرتلك اكله ف التمام هترجع بيها عشر سنين لوراااا

الحاج:حاضر يامروه يابنتى ..بس هو فين كريم؟

مروه:كريم نزل مع الدكتور يوصلو ومش عارفه مارجعش ليه؟

الحاج :طيب ..يارب مايرجعش بس وش الصبح

وف الوقت ده كريم رجع للشله عند سيبر جوجو

محمد:ايه يا بيضه يا مزه شكلك جايا أيد ورا وايد اداااام فين الفلوس يا بطه؟؟

كريم:ونبى مش ناقصه رزالة اهلك ومش عاوز كلمة من حد

محمد:مالك ياعم متعصب عليا ليه كدا هو احنا مش اد مقام سعتك ولا ايه؟

كريم:ايوه يا سيدى مش من مقام سعتى ولا تكلمنى تانى ياعم وغووور بقى

اسلام جوجو:ماتوحدو الله يا رجاله فى ايه يا كريم من ساعة ماروحت البيت وانتا جاى متعصب ليه فى حاجه!!

كريم:مافيش ياعم جوجو بس شوية مشاكل ف البيت ابويا بعافيه شويه

محمد:ياعم الف سلامه ع الحاج بس براحه وان شاء الله كله هيبقى تمام

جوجو:وجبتله دكتور ياعم ولا ايه؟؟

كريم:ايوه يا عم

جوجو:والدكتور قال ايه؟؟

كريم:بكرا
..بكرا كل شىء هيبان هاخده ع المستشفى نعمل شوية تحاليل كدا ..المهم انا
لازم أروح بدرى النهارده وماتنسوش تتصلو بمصطفى تقولو خليك ف البيت

جوجو:تمام يا معلم روح انتا وانا بكره هكلمك اشوفك عملت ايه؟

محمد:أنا هاجى معاك المستشفى بكرا

كريم:ياجماعه مش مستاهله كل ده... ان شاء الله خير وكله هيبقى تمام

وبكدا انتهت حلقتنا النهارده وبكرا نشوف ايه اللى هيحصل

انتـــــــــــــــــرونا ,,

الحلقه 6
وبعد ما اليوم العصيب ده خلص من مرض وتعب وضيق

طلع النهار

والكل نايم ماعدا كريم قعد طول الليل صاحى من تليفزيون لبلكونه لكمبيوتر مش قادر ينام عمال يفكر دماغه بتودى وتجيب
لحد ما الصبح طلع

والجماعه كلهم فطروو ونزل كريم والحاج

وعملو التحاليل والمفروض كريم هيبقى يعدى ياخد نتايج التحاليل

المهم على باب المستشفى

كريم:يالا يا بابا انا هوقفلك تاكس وأنا ورايا كام محاضره ف الجامعه كدا اخلصهم وع البيت فوريره

الحاج:محاضرات ايه يابنى ما انا عارف اللى فيها

كريم:طب والله يا حاج محاضرات وبعدين انا هروح فين بدرى كدا يعنى

الحاج:طيب خلاص امشى وانا هروح لوحدى

كريم:والله ابدا لازم اتطمن عليك لحد ما تروح وتنام ف فرشتك كمان

الحاج:ايه يا ولااا الخفه دى ابوك لسه بجبروته يابنى

كريم:ياعم اقعد بقى ده انتا ماشى معايا بالعافيه

الحاج:ماشى يا عم الخارق

كريم:يالا بقى يا حاج هتأخر

وركب الحاج التاكس وروح وكريم راح الجامعه الى الكافيتريا دغوووووورى

كريم:ايه يا بيسو عامل ايه؟؟

بيسو:تمام ياعم الشباب والله ما بنشوفك خالص ع الكافتريا وبتوحشنا

كريم:حبيبى يابيسو ..هاتلى واحد قهوه اكسبريسو ونبى وهاتهالى بره عند الجماعه

بيسو:عينى يا ريس

كريم:تسلم يا معلم

كريم:ازيكووو ياشباب

محمود البكرى:ياااااااااه حبيب قلبى اللى بنشوفه بالصدفه

كريم:ماتقولش كدا ياجدع ازعل والله

شريف:ياااااااااه حبيب قلبى اللى بنشوفه بالصدفه

كريم:يووووووه هو انتو لسه فيكو الخصله دى ..ياجدعان هو انتو عشان توأم هتقرفونى؟؟

محمود:معلش يا كريم ما انتا عارف ان احنا توأم ولازم كل الكلام نقوله زى بعض

شريف:معلش يا كريم ما انتا عارف ان احنا توأم ولازم كل الكلام نقوله زى بعض

كريم:يادى النيله انا هنتحر واجبلكو مصيبه دلوقتى
يابنى يا حبيبى ركز وشوف اخوك بيقول ايه وماتقولش زيه

شريف :بقولك ايه ياعم كريم بطل تريقا علينا

محمود:بقولك ايه ياعم كريم بطل تريقا علينا

كريم:وربنا ما انا متكلم ياعم ده انتو هتجبولى شلل وحياة ربنا بس بس بس بقى

انا هتكلم مع الراجل الطيب دهوت مع انه دحيح وقفيل كدا بس عادى احسن من الراديوهات دووووووول

كريم:صباح الخير على الدحيح بتاعنا

محمد عبد الرحمن:وعليكم السلام ورحمة الله وبركاته كيفك يا كريم

كريم:والله تمام ياعم وبتفائل بوشك دهوت والدقن دى بجد يعنى مش كلام

محمد:يا اخى الله يكرمك ويهديك

كريم:بقولك ايه ياشيخ بقى مافيش اى جديد ف المحاضرات امتحانات اى حاجه كدا ف المخروبا دى ؟؟

محمد:والله يا أخى من ساعة أخر ميد ترم ده واحنا ما خدناش امتحانات تانى

كريم:ايه ايه ايه.. أرجعلى بس بالكلام كدا ....ميد ترم ايه ده ان شاء الله ؟؟

محمد:ميد ترم ادارة اعمال..ده كان بعد تسليم شيتات المادة ديه

كريم:تسليم ايه ؟؟شيتات ايه؟انتا بتقول ايه ياعم ونبى؟

محمد:يا
اخى .افهم تسليم الشيتات كان يوم ..والامتحان اليوم اللى بعده دوول بقى
كانو بعد ما الدكتور اجتمع بينا وادانا اللى هييجى ف امتحان المحاسبه

كريم: [ندعوك للتسجيل في المنتدى أو التعريف بنفسك لمعاينة هذه الصورة] كفـــــــــــــــــــــــــــــــــايه...يارتنى ما سألتك ولا جيت النهارده من أساسه انتا حرام عليك يابنى انتا عاوز

تجبلى شلل وربنا.... امتحانات ايه وشيتات ايه حرام عليك حرام عليك انا هروح أنتحر احسن ياعم اوووووف بس بس بس كفايه

كريم:اعمل ايه ياربى بس انا هتصل بمصطفى

تك تك تك تك تك

مصطفى :ايه يابنى

كريم:ياعم انتا فين انا ف الجامعه

مصطفى:انتا هتشتغلنى هو انتا تعرف تروح لوحدك

كريم:ياعم زفت والله ف الجامعه اهه بس شكلى هحول من هنا الناس اللى هنا غريبه اوى وبيقولو حاجات غريبه

مصطفى :ياعم طيب انتا عاوز ايه دلوقتى

كريم:تعالا عشان بيقولك فى امتحان حالا اهه الدكتور اللى لسه قايل

مصطفى:يانهار ازرع بجد

كريم:يعنى انا هضحك عليك ف حاجه زى كدا انزل يابنى خلص

مصطفى :يانهار طب أقفل دلوقتى يالااااااا بسرعه

كريم:سلاممممووز

كريم:الواحد بقى يطلب قهوه تانى ويقعد عند الجناين كدا يشوف الوزز اللى بتعدى لحد مامصطفى ييجى اه كدا تمام [ندعوك للتسجيل في المنتدى أو التعريف بنفسك لمعاينة هذه الصورة]

تررررررررررررن تررررررررن

مصطفى:الو يا كريم ياكريم انتا فين ؟؟

كريم:ايه ياعم فى ايه انتا مالك براحه خد نفسك

مصطفى :ياعم مش وقته فين الامتحان بسرعه ؟؟

كريم:عند الجناين [ندعوك للتسجيل في المنتدى أو التعريف بنفسك لمعاينة هذه الصورة]

مصطفى:ايه ..بتقول ايه؟

كريم:قصدى تعالا بس عند الجناين وهنروح سوا

مصطفى :حاضر

كريم:بس بسسس تعالا انا هنا اهه تعالا

مصطفى :يالا يابنى عغشان نلحق الامتحان

كريم:امتحان ايه ياااااااج جه ومالك عرقان كدا ليه وشعرك منكوش؟؟

مصطفى:هو مافيش امتحان؟؟ [ندعوك للتسجيل في المنتدى أو التعريف بنفسك لمعاينة هذه الصورة]

كريم:ياعم فكك بقى بلا امتحان بلا وجع قلب

مصطفى :يعنى انتا جبتنى من البيت لحد هنا جرى؟؟

كريم:ألبس يا معلم تعيش وتفتكر

مصطفى:تصدق بالله انتا شخص تييييييييييييييييت

كريم:شفت الشتيه بتتقطع ...وبتلف تلف وترجع لصاحبها اهدى كدا وتعالا نشرب اتنين شويبس جولد وعاوزك ف حوار

مصطفى:ماشى يا رخم يالااا بس انتا اللى هتحاسب

كريم:دنى من يومك.. ماشى

كريم:اشرب
ياعم كدا وخد نفسك ..اللى انا عرفته م الكليه هنا ان انا تقريبا فاتنى
امتحانات وتسليم شيتات وحوارات كتير وعاوز اطلع من المطب ده؟؟

مصطفى:وهنعمل ايه يعنى؟

كريم:مش عارف بس انا مش عاوز أدبلر تانى كفايه كده اوى وانا بصراحه بقيت بحس اليومين دول

مصطفى:لو لولولولى....يا الف بركه يا الف نهار ابيض

كريم:ايه اسلوب خالتى اللتاته ده يابنى بطل بقى شغل الحوارى ده وكلمنى واقولى هنعمل ايه؟؟

مصطفى:انا عندى فكره بس ايه لوز اللوز

كريم:ارزينى يا ابو الافكار

مصطفى:امين الاتحاد هو اللى هيخلصلك الحوار ده

كريم:باهر؟؟

مصطفى:ايوه يا عم مالو باهر؟

كريم:يابنى احنا مش بنشوفه الا واقف مع بنات يا اما دكاتره ولا حد يعرفه م الكليه

مصطفى:ماهو ده المدخل احنا هنزق واحده عليه ودووووووس يابوب يخلصلك حوارك ويادار مادخلك شر

كريم:اممممممم طب مين بقى اللى هترضى تعملنا الخدمه دى

مصطفى :مالكش دعوه بيا هظبطلك الحوار ده وابقى الااغيك

كريم:بس بص يا ريس انا بره حواراتك ياعم انا مش بطيقه خالص بصراحه

مصطفى :ياعم وانتا مالك انتا ده حوارى انا ..اشطا

كريم:اشطا باللبن

وبكدا انتهت حلقتنا النهارده وعاوزين نشوف بكرا بقى هينيمو باهرر ازاى ويوقعووه

سلاااااااام

الحلقه 7
وبعد ماكريم ومصطفى أتفقوا ان هما لازم يعملو حوار على باهر ويحاول يخرج كريم من المطب ده فكر مصطفى ف فكره والفكره هى ان هم

يزقو واحده من الكليه وخصوصا ان باهر بيميل للصنف النسائى اكتر من الرجاله

فى بيت مصطفى

تررررررررررررن ترررررررررن

مصطفى:ألو ..ايوه مين؟؟

كريم:الو ..ولا ..أيوا ..ولا ومين؟؟ حدد ؟

مصطفى:انجز يا خفيف ف ايه

كريم:ها عملت ايه ف السيكو سيكو ؟

مصطفى:تمام كله تمام كلمتلك البت ايمى بتاعت أداب.. ووافقت ..بس ؟؟

كريم:بس ايه ياعم عاوزه ايه مش كفايه هتطلع الرحله الجايا على أفانا؟؟

مصطفى:اممممم لاأ مش كفايه هى طالبه حاجه كمان؟

كريم:وايه هى الحاجه دى ان شاء الله

مصطفى:عاوزه
الواد احمد ماهر الدحيح بتاع اداب يقعد بس معاها نصايه كل يوم بعد الكليه
أحسن هى ضايعه والامتحانات ع الشبابيك..وأنتا عارف احمد ماهر مالوش ف الهلس
ولا عمره كلم بنات خالص

كريم:أممممممم..طب وايه العمل مع احمد ماهر؟؟

مصطفى:نحاول نقنع احمد ماهر ان ايمى بتحبه وانتا عارف ان هو لما يسمع حاجه زى دى قلبه هيحن ومش بعيد يخش بدالها الامتحانات

كريم:امممم..يخربيت دماغك اللى عامله زى الكومدينو دى

مصطفى:تلميذ

تيت تيت تيت تيت

عفوا لقد نفذ رصيدكم

مصطفى:اه يافقرى مافيش مكالمه بتكمل أبدا معاك

مصطفى:ألحق أكلم الواد احمد ماهر بقى أظبط معاه الحكايه

وقبل ما يكلم احمد ماهر يلاقى أسماء طالعاله من تحت الارض

أسماء:تا تا تا تا ااااااا ..بتعمل ايه يا طاطا؟؟

مصطفى:يادى النيله......ولا حاجه يا أسماء ..نايم ..نايم ولا حرام النوم ؟؟

أسماء:يعنى انتا قاعد على سريرك وماسك موبايلك وتقولى نايم؟؟.طب ازاى دى هه ازاى ماتقول ازاى؟؟

مصطفى:أسماء انا مش فاضى خالص لشغل العيال بتاعك ده وبعدين انتى فايقه ماتفوقيش عليا ونبى

أسماء:بقلك
ايه يامصطفى..بص بقى يابنى ..ماهو انا سمعت كل حاجه ف التليفون دلوقتى
..يا اما تقول ف ايه من طقطق لسلامو عليكو ..وعليكم السلام..يا أما هفضحكو
واخربلكو الدنيا واقول على كل حاجه؟؟

مصطفى:امممم..بقى كدا يا اسماء ..هه بقى كدا ..مين اللى خبى عليكى ف موضوع الرحله هه مش انا برضو؟؟

أسماء:يابنى انتا كل شويه تزلنى بالرحله دى دى كانت مره واحده وكل شويه تزلنى بيها كل شويه كل شويه

مصطفى:ما انتى اللى بتعملينى غلط خالص هو فى كدا بين الاخ واخته؟؟

أسماء:على
فكره انتا عمرك ما حسستنى انى اختك عمرك ماجيت وحكتلى حاجه ...وكمان بتقول
عليا صغيرة وتافهه وزنانه ..عمرك ما جيت سمعت منى اى حاجه ولا سألتنى عن
اى حاجه ده انا بغير من اصحابى ياشيخ

مصطفى:اممممم..للدرجادى انا وحش ؟؟

أسماء:ولا وحش ولا حلو بس م الاخر انا مش حاسه ان انتا اخ بجد ..اخ ع الورق بس

مصطفى:امممممم..طب انتى عاوزه ايه دلوقتى؟؟

أسماء:تحكيلى يابنى زى ما الناس بتحكى هو انا مش اختك ؟؟

مصطفى:طيب ياستى ..عاوزه تعرفى ايه وانا والله هقلك على كل حاجه بالتفصيل

أسماء:يابنى انتا كدا عداك العيب يالا قوووول

دو دو دو دودودودودودود

وأشتغلت أسماء على مصطفى ووقعتو ف الكلام لحد ماعرفت كل حاجه عن اى حاجه

أسماء:ياولاااااد الايه ده انتو شياطين

مصطفى:شياطين ليه بس دى مجرد مصالح وبس

أسماء:ع العموم كله هيبان بس اهم حاجه تخلصوا الواد الغلبان ده من الحوار ده

تررررررررن ترررررررررررررن

أسماء:ايه ده ده التليفون الارضى بيرن انا هشوف مين ؟

كريم:اوك خدى الباب ف ايدك
..........

أسماء:الو مين ؟؟

كريم:انا كريم ..مين معايا أسماء؟

أسماء:ايوه ياسيدى أسماء يا عم الروش

كريم:عم الروش...انتى بتجيبى الكلام ده منين؟؟

أسماء:مالكش دعوه يا زعيم العصابه

كريم:زعيم العصابه؟؟هو ده ررقم مصطفى لو سمحتى ولا الرقم غلط؟؟

أسماء:ياعم هو بالظبط ..اها ما انتا تايه هو انتا فايقلى اصلن ؟؟

كريم:ايه يا اسماء ف ايه هو حد حكالك حاجه؟

أسماء:ياعم ولا حد حكالى ولا حاجه

كريم:امال ايه طريقتك غريبه معايا ف الكلام وعماله تلونى ..ماتجيبى م الاخر وتقصرى؟؟

أسماء:بس يابنى م الاخر البت اللى انتا هتجبوها والحوار اللى انتو هتعملوه ده فاكس جدا ومش هيجيب نتيجه

كريم:حوار ايه وبتاع ايه انامش فاهم حاجه؟

اسماء:أعملهم يا واد أعملهم بص انا عرفت كل حاجه؟

كريم:اه يامصطفى يابن التيت

أسماء:سمعتك على فكره أشتم أشتم هقله على فكره

كريم:ياأستاذه أسماء فى ايه بس دى مجرد لعبه بسيطه جدا عشان بس أعدى السنه ادى وافيهاش حاجه يعنى

أسماء :اها مافيهاش حاجه ما انا عارفه بس مش هتجيب نتيجه

كريم:وايه بقى اللى هيجيب نتيجه يا فيلسوفه

أسماء:كدا انتا تمام وهفيدك طالما طلبت الاستفاده اسمع يابوبو

كريم:مفنجل اهه

أسماء:بص ياسيدى ايه رأيك لو تخرشم نفسك؟

كريم:أخرشم نفسى .حاضر يختى ومالو مش عاوزانى أغزلك نفسى بمطواه احسن؟؟...ونبى يا أسماء ادينى مصطفى وبطلى هبلك ده

أسماء:يابنى افهم بقى وماتبقاش معركش كدا ..انتا هتخرشم نفسك يا معلم وتربط
أيدك
وشويه تعاوير خفيفه كدا وتقوم طالع على دكتور الماده ..تعمل نفسك بتعيط
وواااااااااااء وعاااااااااء ويادكتور عملت حادثه واتخرشمت وفاتنى الامتحان
وتسليم الشيتات

كريم:اممممم يابنت الايه

أسماء:يابنى ده أنا الاسطورة

بس اهم حاجه تخلى بالك منها التمثيل لازم تمثل عليه صح

كريم:اممم..طب والخراشيم دى هعملها ازاى؟؟

أسماء:ياعم بسيطه شوية شاش ومكركروم وحاجات بسيطه كدا وياحبذا لو كان فى بونيا تحت عنيك وياريت انا اللى ادهولك

كريم:مع انى مش طايقك بس أفكارك بيييييييييييس اوى

ادينى بقى الواد الخرع اللى عندك اللى كان هيخربها

أسماء:تمام يا بوبو بس انا عاوزه منك طلب ضرورى ضرورى جدا ومش عاوزه حد يعرفه ولا حتى مصطفى؟؟

كريم:امم..وطلب ايه ده ان شاء الله؟

وبكدا الحلقه انتهت النهارده وبكرا هنشوف طلب ايه اللى أسماء عاوزاه وازاى هينفذو خطة الحادثه دى

انـــــــترونـــــــــا

» مسلسل:شباب سيس ..ولكن !!!
» حلقات شباب العمار
» الحلقة الثانية(ما بين عرش الرحمن والسماء السابعة)...........
» حوار صريح جدا (الحلقة السابعة ) (أحمد منصور)
» حلقات مسلسل الكارتون الشهير ( سونيـك ) - الموسم الاول - نسخ DvdRip