طيب إحنا نفرح ولا نزعل يا جماعة ؟؟

السلام عليكم ورحمه الله وبركاته

أخوتى وأخواتى الأفاضل يارب تكونوا بصحة جيدة وعال العال

المهم أمبارح سمعت خبر كده فى العاشرة مساءاً عن دكتور احمد زويل

واللى لفت نظرى ان (منى الشاذلى ) لما جت تقدم الخبر كانت بتقول كده بالنص :

(إحنا عندنا خبر مهم ومفرح عن الدكتور العالم الأمريكى المصرى أحمد زويل)

المهم نسيبنا خالص من التقديمة اللى هى قالتها دى واللى قالت فيها جنسيته الامريكية قبل المصرية

وندخل فى موضوع الخبر والخبر هو كالتالى :

(تم إختيار دكتور زويل فى لجنة الاستشارة العلمية من قبل الرئيس أوباما والجدير بالذكر إن اللجنة

دى كلها عبارة عن 20 عالم فقط كلهم أو الـ19 أمريكيين ودكتور زويل بس هو اللى المفروض عربى

او مصرى أمريكى

_مع انه لو الناس لسه فاكرة انه مصرى كانت منى الشاذلى قالت :

العالم المصرى الامريكى _

ما علينا المهم ان اللجنة دى يا جماعة هدفها فى امريكا انها تشور على الرئيس بالحاجات العلمية الهامة

الواجب القيام بها لتقدم الولايات المتحدة

وكمان من ضمن شغلها أنها تبحث وتدرس أمريكا هيبقى شكلها إيه مستقبلا يعنى بيرسموا

مستقبل الولايات المتحدة الامريكية )

هو ده الخبر .........

المهم ان منى الشاذلى عقبت وقالت ان ده حاجة تشرف وخبر مفرح جدا جدا

وهو إن عالم مصرى يبقى فى اللجنة دى

وقالت كمان ياريت يبقى عندنا احنا كمان لجنة بتدرس شكل مصر فى المستقبل هيبقى ايه

ــــــــــــــــــــــــــــــــــــــــــــــــــــــــ

نرجع مرجوعنا للى خلانى اكتب الخبر ده وهو انى

بينى وبينكم يا جماعة انا مش عارفه افرح ولا ازعل؟؟؟

-أفرح ان واحد من مصر مولود فى مصر ومصرى اصلا وصل للمكانة العلمية المرموقة دى

وبقى فى لجنة من إختيار أوباما نفسه رئيس الولايات المتحدة؟؟

-ولا ازعل اننا كمصريين مشوفناش منه حاجة وكل لما نييجى نقوله كده يقول محدش طلب منى حاجة وانا

منفذتهاش ؟؟؟

-أفرح إن فيه عقول مصرية ما شاء الله بالنبوغ والقوة دى

-ولا ازعل ان العقول دى كل ثمارها راحة لدولة مبتكهرش فى حياتها قدنا ؟؟

بصراحة انا محتارة من الخبر ده ومش عارفه هو المفروض نفرح اوى زى منى ولا نزعل على حالنا

طيب إنتوا رأيكم إيه نفرح بقى ولا نزعل ؟؟

نزعل طبعا

بس انتي قولتيها
ماحدش طلب منه حاجة وهو قال لأ

أما بالنسبة لحكاية الجنسية والوطنية
فأنا شايف انه مش ذنبه ان منى الشاذلي قالت العالم الأمريكي المصري
أكيد هو نفسه يبقى العالم المصري الأمريكي
ومش ذنبه برضه ان بلده مش سائلة فيه ومش عايزة تستفيد منه

أما حكاية انه قبل عضوية اللجنة دي
دي الحاجة الوحيدة اللي ممكن أبقى مضايق منه انه عملها
بس مين عارف
مش يمكن نستفيد منها
يمكن......

لا افرحى

افرحى ان فى عالم بيبحث وبيحاول ينفع المجتمع كله سيان امريكا او غيرها لان دايما التطوير بيجى من الغرب اذا كان زويل حاول انه ينفع امريكا هيجى عالم ان شاء الله يطبق علم زويل فى مصر واذا كان زويل بيحاول يخدم امريكا فى حاجة تنفع فده كله خير للعالم

حاجاااااااااااااااااااااااات كتير نفسى اقولها بس زعلان

اقولك ازعلى

لازم تزعلى

بس مين السبب احنا ولا هو ؟

عالم عام فى خدمة العالم لكن اللى يزعل معروف

بصراحة يا حنين انا بختلف معاكي في رأيك في دكتور احمد زويل

احمد زويل من الشخصيات المحترمة جدا جدا وانا شخصيا بحترمه وبقدره جدا ومش شايفه انه مقصر نهائي وانتي لو متابعه اخبار احمد زويل هتعرفي انه عمل وبيحاول يعمل كتير أوي لكن للأسف الوضع في مصر مبيساعدش علي تنفيذ اي حاجه

وأحمد المسلماني المستشار الاعلامي لدكتور زويل كتب اكتر من مرة في المصري اليوم عن أفكاره ومشاريعه في مصر اللي طبعا مبتلاقيش لها غير ردود الأفعال السلبية وبتتركن علي الرف زي غيرها
احمد زويل لو سمعتي لقاؤه الأخير مع مني الشاذلي هتعرفي انه انسان جدير بالاحترام لتواضعه,اخلاقه,ثقافته يكفي انه بيفتخر بمصريته وإسلامه في كل مكان في العالم

ودايما بشوفه بينتهز الفرصة انه يغير فكرة الغرب عن الاسلام سواء بكلامه او فعله

يكفي انهم لما طلبوا منه يعرف نفسه في شريط بيجمع اهم العلماء في أمريكا وهيتفرج عليه ناس من كل مكان اول حاجه قالها انا مسلم مصري عربي وكذا صفه وفي النهاية خالص أمريكي
وكرر الجملة دي مرتين
لكن كون مني الشاذلي تقول عالم امريكي مصري فده خطأها هي مش خطؤه

انا متفقه مع البتول ف كل اللي قالته تمام كدا يافندم

اقتباس :: -أفرح إن فيه عقول مصرية ما شاء الله بالنبوغ والقوة دى

تفرحي وتفرحي جداااا كمان

اقتباس :: -ولا ازعل ان العقول دى كل ثمارها راحة لدولة مبتكهرش فى حياتها قدنا ؟؟

ان زعلتي متزعليش ان العقول دي راحه لدوله مبتكرهاش في حياتها قدنا ... لا ازعلي ان اصلا دولتك مش محافظه علي العقول دي

دكتور زويل لو كان لقي حاجه ف مصر تشجعه ولقي حد مقدره فيها مكنش سابها وخرج بره
...

سوري ياحنين بقي حاجه كدا علي جنب (شات يعني مبسوط

)

ازايك يابتول وشحتيني مبسوط

اوووووي بجد ...عاوزين نشوفك دايمااا ف المنتدي وافتحي رسايلك الخاصة عشان نعرف نوصلك يافندم Wink

ههههههههه بعيدا عن شات وعد اللى ستحاسب عليه

وبخصوص كلام البتول عاوزة اقولك انى بحترم دكتور زويل جدا جدا جدا

وعمرى ما اختلفت عليه ولا هختلف وعارفه انه بيعتز بمصريته وباسلامه

وتابعت الحلقة بتاعته فى العاشرة مساءا لما جابوا مقطع من فيلم تسجيلى هو مشارك فيه

مع عظماء العالم وقال عن نفسه (أنا مصرى مسلم امريكى عربى افريقى وهكذا )

لكن انا بتكلم من حيث المبدأ أى مبدأ بقى ؟؟

مبدأ انه إحنا كمصر سايبين العلماء اللى رئيس االولايات المتحدة بنفسه يختارهم علشان يكونوا

ضمن اهم لجنة استشارية علمية فى الولايات المتحدة

واحنا فى مصر نايمين على الاخر

بتكلم على مبدأ اننا لغاية دلوقتى مش قادرين نمكن دكتور زويل وكل العلماء اللى بره مصر

واللى بيخدموا بعلمهم بلاد تانية مش قادرين نمكنهم من فتح مجال كويس يقدروا يساعدونا فيه

بعلمهم

بتكلم على مبدأ إننا مش فارقه معانا هما بره ولا جوه بيساعدوا ولا مبيساعدوش حد بيسمع كلامهم

ولا محدش وهكذا

يعنى اللى يخلى أوباما يختار زويل ضمن لجنته الاستشاريه العلمية الخاصة جدا دى

ميخلناش ولو للحظة نفكر ونجيب الناس دى ونساعدهم علشان ينهضوا بالبلد شويه

_ملحوظة_ دكتور زويل قال انا مش هقدر ارجع مصر واللى يسافر امريكا

ويتعلم هناك ويشوف التقدم التكنولوجى العلمى عمره ما هيفكر يرجع مصر

وقال هنا مش هيقدروا يعملوا اى حاجة وهناك كل حاجة متوفرة

احنا مش لازم نحزن ولا لازم نفرح
لازم ننفرج عالناس واحنا في حالة ذهول
نتفرج عليهم وهم بيسخروا كل حاجة لمصلحة وطنهم وانهم يبقوا اسياد العالم

طيب يعني ايه اللجنة اللي عملها دي
طيب مين داليا مجاهد مستشارته للشئون الاسلامية ووظيفتها ايه يعني؟

انا اتفرجت علي حوار محمود سعد معاها امبارح في البيت بيتك
حاجة بجد فوق الوصف لباقة ذكاء شجاعة بجد صورة مشرفة للمرأة المسلمة مع الالتزام التاااااااااااااااااااااام بالزي الاسلامي
مش زي اي واحد مشهورة عندنا ولا سيدة مجتمع تلاقيها بتحرف وتحور في الحجاب علشان الموضة والمظهر العام

الناس دي سبقونا ب10000000000000 سنة ومستحيل نلحقهم
لما يحاسبوا اوباما علي 100 وعوده في 100 يوم قضاها في البيت الابيض
نفذ 27 و6 ماتنفوش مع حتمالية التنفيذ
وكانت الوعود الانتخابية 500
ولسه امامه 1360 باقية من فترة الرئاسة يعني اكيد هايحقق مالا يقل عن 99.9% منها

بيحاسبوا رئيسهم عن 100 يوم
من يملك محاسبة رئيسنا علي 10220 يوم
احسبوها من سنة 81

وعجبي

د/ البتول بتدخل تقول كلمتين فى الصميم وتخرج بسرعة

ربنا يكرمها

كلامها فى الجون بجد

بلاش نتكلم عن احمد زويل اللى بذل حياتها كلها نفقة فى العلم لإفادة الناس

فين مصر والبحث العلمى من العلماء اللى داخل البلد

هل تظنوا ان فى مصر مفيش غير احمد زويل

د/ احمد زويل بجد مثل جيد

لكن فيه غيره كتييييييييييييير جدا ويمكن احسن لكن مش لاقيين فرصة

وطبعا هيلاقوا الفرصة فين ؟؟

ا/ أحمد المسلمانى ده راجل عبقرى .

اتكلم فى مرة عن مشروع مقدمه العالم الكبير فاروق الباز

واللى كان هيخلي مصر حاجة تانية خالص (كانت هتتنقل مصر نقلة تانية) او ممكن نقول مصر أوروبا ..

لكن مفيش فايدة طول ما في سلبيات حكومية بغيضة ..

أحمد زويل اكيد قدم لمصر مشروعات وانا سمعت الكلام ده على لسان ا/ احمد المسلمانى

لكن هل من مجيب ؟؟

يبقى حقه انه يثبت نفيه بين الناس اللى بتقدره ..

» عندما نفرح بلا فرحه
» إحنا فين
» هو إحنا ليه بننضرب ...؟؟!!
» هل إحنا؟؟؟؟ حد يجاوب
» إحنا بتوع الأجر ,,,