صرخات ساخرة (4) جربت تغنى لمصر ..؟

جربت تغنى لمصر ؟

مين فينا ميعرفش مطلع أغنية مشربتش من نيلها ؟؟

طيب .. جربت تغنيلها .. ؟؟

انا حقيقى مجربتش .. تعالى انا وانت سوا نجرب مش هنخسر حاجة .. بدل ما انت قاعد تسب وتلعن فى الحكومة .. وتشكى حالك لكل اللى رايح واللى جاى عمال على بطال ..

طيب بالله عليك مش مكسوف من نفسك ؟؟

يا أخى أعذر الناس اللى شغالة فى خدمتك ليل نهار وانت نايم فى (الشارع) .. ناس سهرانة طول الليل فى مهرجانات واجتماعات ومؤتمرات .. ده كله ليه ؟؟ علشانك طبعا .. وياعينى بيناموا 3 ساعات بس فى اليوم .. يمكن حتى ما بيناموش ..

وبعدين انت قاعد تقولى البطالة البطالة .. هتعمل ايه يعنى بالشغل ؟؟

ما انت نايم على سريرك احسن .. تصدق انت خسارة فيك النوم !!

عاوز تقوم تروح كل يوم الشغل وتتنيل فى المواصلات وتجرى ورا (حرحر بيه) وتنزل المظلات وتركب اتوبيس النقل العام وتتشعبط .. علشان توصل شغلك فى المعادى ؟؟

وطبعا لحد ما توصل الشغل هتكون جوعت .. قولى بقى عاوز آكل .. والله انت فقر ..

كمان عاوز تاكل ؟؟

لسه هتقف ساعتين فى طابور العيش علشان تجيب رغيف .. وتروح طابور تانى على الطعمية اللى بقى القرص منها بنص جنيه وميشبعش بقى والزيت المغلى بقاله خمسمية سنة .. وبعدين انت زعلان علشان رغيف العيش صغر ؟؟ طيب ما انت نفسك كل ما تكبر هتصغر لحد ما تبقى كركوبة .. ولا هو حلال ليك وحرام على الخير اللى فى البلد !!

وكمان تعالى هنا .. ناقص تقولى اشتغل علشان (أكوم) نفسي (واتجنز) .. جنازة تقلعك يا بعيد .. يا شيخ اتقى الله .. انت عارف مصاريف (الجواز) دلوقتى بقى عامل ازاى ؟؟ يابنى دا الدهب بقى بـ 200 جنيه .. هتدخل على خطيبتك بعشرين جرام ؟؟ ده كلام برضه ؟؟

لالالالالالالالالالالا .. ناقص بقى تقولى هصب السقف .. يقع عليك يا بعيد .. اللى سماك (عز) ظلمك .. أشوف فيك يوم يا (عز) .. هو انت مش دارى بالدنيا ولا ايه ؟؟ شوف طن الحديد بكام دلوقتى .. يابنى فكر الأول .. هتودى روح فى داهية ..

يا نهارك أبيض ؟؟ كمان بتتكلم فى السياسة ؟؟ يابنى الناس دى عايشة تعبانة على راحتك .. يخربيت مخك الزرنيخ .. وكمان هتتكلم على فواتير التليفون ؟؟ مالها .. ما هى زى الفل وأربعتاشر .. وبعدين هو حد بيعبرك أساسا .. ولا هو انت عندك تليفون اصلا ؟؟.. هاتلك موبايل واتكلم مع موبينيل على نظام (المصرى) وخلى عندك انتماء للوطن ..

وبعدين كل يوم جاى تشتكيلى الزحمة والعربيات وكوبرى قليوب .. ما هو انت مبتعرفش تشغل مخك .. ايه اللى بيخليك تخرج بالنهار ؟؟ اخرج بالليل بعد الساعة 12 وهتلاقى الدنيا فااااااااااااااااااااضية .. هى حجج وخلاص ..

بص م الاخر بطل تجيب الكلام لنفسك وخليك محترم وف حالك .. وبلاش تجيب فى سيرة الناس .. يا اخى اتفرج ع التليفزيون .. واهو كل يوم مهرجان سينيمائى واتفرج على عروض الأزياء .. اهى حاجة تفتح النفس بدل ما انت كاره دنيتك ومطين عيشتك بنفسك وبطل تشتكى دا الشكوى لغير الله مذلة يا أخى .. خلى عندك دم ..

وجرب تغنى كده .. بس ياريت ما تلمش علينا الدبان ..

(الفكرة مستوحاة من مناقشتى مع أحد زملائي فى العمل)

تابع كل الحلقات هنا

[ندعوك للتسجيل في المنتدى أو التعريف بنفسك لمعاينة هذا الرابط]

.

يعني الناس فضلت تسخن فيك ياعم عمرو عشان يودوك فى خبر كان انت الظاهر شويه المساهمات اللي بقيالك ممكن توديك ورا الشمس

أنا ياعم هكتفى واشرب من نيلها بس وعمري ما هغنيلها زيك كده أنا ورايا عيال عايز اربيها

عودتك عودة الروح للجسد وعودة الموضوعات الجميلة ...لك تحياتي

منورنى يا عمنا المهندس الاديب الشاعر / احمد عبد العزيز

امانة عليك لو اتجوزت وجبت عيال .. يبقوا فى رقبتك هههههههه

وذنبى بقى فى رقبة اللى سخنونى [ندعوك للتسجيل في المنتدى أو التعريف بنفسك لمعاينة هذه الصورة]

دانا مستعد أغنيلها وأرقص ليها كمان

لا وأيه ممكن أخلع القبعه للناس اللى سهرانه علشان خاطرنا دى وتقريبا مش بتنام ناس بتتعب علشان ناس تانيه .لكن الناس التانيه دى مش بتقدر اللى بتعمله الناس الأولانيه ..؟

أصل فى فرق بقى بين الناس دى والناس دى

الناس الأولانيه ناس بتوع سد الحنك والناس التانيه ناس فاضيه مورهاش غير الكلام

وإلا حكايه الشغل دى ..

اصحى روح الشغل وبسرعه تعالى واتبهدل فى المواصلات علشان تنام وتلحق تصحى تروح الشغل
وبلاش تاكل علشان المرتب يقضى لأخر الشهر ..وبعدين تعالى هنا قولى..أنت عاوز تحوش كمان
..أشتغل علشان بس تـ....ولا انت مش عاوز

وبعدين أنت مالك ومال عز دا الراجل مشكور كان بيوزع حديد ببلاش ..هو انت ملحقتش ليك طن ولا ايه ....؟

ياعم سيبك انت مفيش احسن من إنك تكبر دماغك .!!

اه كنت هانسى

الكوبليه الأخير من الأغنيه :

وعشان كدا مصر يا ولاد حلوت الحلوات

M7meD A ElSaLaM كتب:: وبعدين أنت مالك ومال عز دا الراجل مشكور كان بيوزع حديد ببلاش ..هو انت ملحقتش ليك طن ولا ايه ....؟

ياعم سيبك انت مفيش احسن من إنك تكبر دماغك .!!

شوف بقى انت اللى بتوقعنى فى الغلط يا محمد

هو انا جبت سيرة (أحمد عز) ؟

انا أقصد الواد الرخم اللى بكلمه اللى اسمه (عز) اللى ملهوش شغلة غير الكلام ع الحكومة ولعنة الظروف ..

الله يجازيك ياعم عمرو والله انت حكاية انت ليه متجمعش موضوعاتك اللي هي سلسلات واي عمل فيه افكار متلاحمة في موضوع واحد تصدق بالله ان المفروض ان ادارة المنتدي تعمل كده وده انا شايفه اقل تكريم... الموضوع ده يتحط ويبقي مثبت خصوصا ان معظم مساهمتك مواضيع جيدة جدا وذات سمت ادبي وهادفة ..نداء ياادارة الاهتمام بالموضوع ده وكمان عشان نرد علي اللي بيقولوا مفيش جديد يبقي الجديد هوه ده وافضل واحد للموضوع ده والعمل ده الدكتور ايهاب انا بتهيألي هيفضل يجمع في المواضيع والسلسلات لحد ماهو يهنج

اقتباس :: وبلاش تاكل علشان المرتب يقضى لأخر الشهر

تصوير ممتااااااااااز والله

ويعد اللى قاله أستاذ عمرو وبعد ما أقلب علينا المواجع

إنت برضه ممكن تغنى لمصر زى مثلا...........دايما دموع [ندعوك للتسجيل في المنتدى أو التعريف بنفسك لمعاينة هذه الصورة]

احمد فتحي تهامي الهيو كتب:: الله يجازيك ياعم عمرو والله انت حكاية انت ليه متجمعش موضوعاتك اللي هي سلسلات واي عمل فيه افكار متلاحمة في موضوع واحد تصدق بالله ان المفروض ان ادارة المنتدي تعمل كده وده انا شايفه اقل تكريم... الموضوع ده يتحط ويبقي مثبت خصوصا ان معظم مساهمتك مواضيع جيدة جدا وذات سمت ادبي وهادفة ..نداء ياادارة الاهتمام بالموضوع ده وكمان عشان نرد علي اللي بيقولوا مفيش جديد يبقي الجديد هوه ده وافضل واحد للموضوع ده والعمل ده الدكتور ايهاب انا بتهيألي هيفضل يجمع في المواضيع والسلسلات لحد ماهو يهنج

يا اخى ربنا يعزك .. والله أنا بتعلم منك انت واخى العزيز م/ احمد عبد العزيز

وفعلا المرء على دين خليله .. ونعم الخلة ..

حقيقى انا ممتن وسعيد جدا لتواصلك فى هذا الموضوع .. ومجرد مرورك إضافة للموضوع ..

لكن الكلام ده حقيقى بيطلع من الواحد غصب عنه بسبب ما يراه او يسمعه فى بلدنا بلد العجايب ..

بدل ما الواحد ينفجر .. يقول احسن .. حتى ولو بأسلوب ساخر .. وسامحونى على الالفاظ والدعوات الشديدة

لكن انا احب أن أنقل الصورة كما هى فى مخيلتى .. وشكرا لك أخى م/ احمد لوصفك موضوعاتى بالسمت الأدبى رغم ضعفها من وجهة نظرى .. لكن علشان انت قولت كده يبقى هى كده [ندعوك للتسجيل في المنتدى أو التعريف بنفسك لمعاينة هذه الصورة] ..

وعموما أنا وفرت جهد على الإدارة وجمعت السلسلات بنفسي .. اتفضل

[ندعوك للتسجيل في المنتدى أو التعريف بنفسك لمعاينة هذه الصورة][ندعوك للتسجيل في المنتدى أو التعريف بنفسك لمعاينة هذا الرابط]

وخلى إيهاب يجمع ورايا لحد ما يهنج ههههههه ..

حنين كتب:

اقتباس :: وبلاش تاكل علشان المرتب يقضى لأخر الشهر

تصوير ممتااااااااااز والله

ويعد اللى قاله أستاذ عمرو وبعد ما أقلب علينا المواجع

إنت برضه ممكن تغنى لمصر زى مثلا...........دايما دموع [ندعوك للتسجيل في المنتدى أو التعريف بنفسك لمعاينة هذه الصورة]

ده كله ولسه بتحبى مصر يا ا/ حنين ؟!

كلنا بنحبها .. بس نفسنا نغنيلها من قلوبنا .. مش بدموعنا

لأن الكيل طفح ..

وياريت تيجى على قد كلام محمد عبد السلام

المفروض نقول : وبلاش حد من اطفالنا يمرض علشان مياخدش المرتب كله فى يوم

وانا آسف لتقليب المواجع .. لكنه واقع

وف مصر .. دايما دموع [ندعوك للتسجيل في المنتدى أو التعريف بنفسك لمعاينة هذه الصورة]

انا لو جيت اغنى يا استاذ عمرو

مش عارف الاغنيه هتبقى لوم وعتاب على مصر

ولا دعاء على اللى ماسكينها

مش عارف هتبقى لوم وعتاب على اللى حرروها ما كنتوا سبوها

ما هى هى مبقتشي تفرق كتير

ولا دعاء على اللى خذوها على الجاهز

مش عارف هيبقى لوم وعتاب على نفسي انى بقول كدا

ولا دعاء على اللى خلانى اقول كدا

بجد تسلم مواضيعك وسوال هو مفيش غير حرحر راح فين عصفور

وعايزة اقول الكيل لسه مطفحش
مصر بخير

جربت اغنيلها صوتى راح

جربت اشرب من نيلها جالى تسسم

مشيت فى حواريها فتهت من الزحمه [ندعوك للتسجيل في المنتدى أو التعريف بنفسك لمعاينة هذه الصورة]

هى دى مصر وبحبها مهما كان ومهما اساء لها الأخرين

مصر ام الدنيا

تحفه يا عمرو والله

والله الموضوع ده ممتاز وأكتر من الممتاز كمان

أنا نفسى أغنى لمصر بس مش لاقيه ولاحاجه أغنيلها علشانها
كل يوم بتبقى وحشه عن اللى قبله
ربنا يصلح الاحوال أحسن كده خلاص الناس هتمشى تقول ( أنا عندى شعره) هههههه

بعناها .......ومازلنا ملاَّ كها ..!!!!

الضرائب العقارية مصلحتك أولاً ...

ربنا يبارك فيكم كلكم . موضوع أكثر من رائع
وأنا فاكر اللى أنا بحب مصر لوحدى أتارى الناس كلها بتحبها أكتر منى ، أنا مقصر قوى فى حق مصر .
بس أنا لو عاوز أعبر عن حبى لمص بأغنية هغنى أيه ، مثلا ًنقول ( أنا اللى جبت ده كله لنفسى ).

أنا قلت اعملوا معروف

ده شئ مقدر

وقبل الميلاد موصوف

وان كان ف يوم

زاد الكلام محدوف

من شاعر ف ارض الضفة

ملاه الحصار بالخوف

بكره الزمان يوريك

ست البلاد وتشوف

اه جربت أغنى وغنيت وبوحت وشكيت وإشتكيت وجريت ع الفرحة أتشعبط فيها ولحقت ورسيت فى حضن النيل , وف أخر الغنوة .........بكيت

شاعر الضفة بيتكلم من ورا قلبه !

تسلم ايدك مشككككككوووورررررررررر

لأ كلام حلو اوى تصدق يااستاذ عمرو ان الكلام بتاعك ده يضيع الكبت.هههههههههههههههههههههههههههههههههههههههههههههههههههههههههههههه

زائر

صديقى الدائم عمرو

توقفت أمام صرختك ، وجربت مراراً بعدها أن أعنى لمصر فلم أستطع

وهذا نتيجة السخرية السوداء من ليالى المسؤلين المظلمة والتى لم تذيلها ولو بشعاعٍ

واحدٍ من نور الشمس ..

لكنى فى الوقت نفسه لم أستطع الجزم بماهية هذه السخرية ..

هل سخرية إيجاية .. كسخرية الانسان من العمل المطلوب منه كى يراه بسيطاً يسهل السيطرة

عليه وفى متناوله ..

أم هى سخرية سلبية .. سخرية العاجز الضعيف الذى لم يستطع أن يفعل الشىء

فأخرج كبته أو لنقل غضبته فى صورة هذه

السخرية ( سخرية السلاح الوحيد .. أو سخرية الانتقام من الواقع ) !!

لكن لابد وأن أعترف أن ماكتبته هو اصطدام عنيف بالواقع المرير ..

لكن ياصديقى ..

ماالهدف ؟

__

ملحوظات

* بالنسبة لكلام أ/عمرو عن فاتورة التليفونات الأرضى ..

أحب أقول لحضراتكم إن بيت أ/عمرو مخلى تليفونه فقط استقبال ..

وهو ده التفاعل

( واتكلم أرضى يابن بلدى ) [ندعوك للتسجيل في المنتدى أو التعريف بنفسك لمعاينة هذه الصورة]

* م/أحمد فتحى ابن عمك لسّه ناقصله 4000 مساهمة

يعنى بعيد تماماً عن التهنيج .. انا كده فى الأربيعينات ..

لكن أ/عمرو للأسف بقى فى التسعينات [ندعوك للتسجيل في المنتدى أو التعريف بنفسك لمعاينة هذه الصورة]

( خريف العمر )

فأكيد هايبقى محتاج لرعاية خاصة من هنا ورايح وبالذات فى فترة الخريف

ولازم نرد فى مواضيعه أول بأول لإن زى ماحضرتك عارف ..

كبار السن بيزهقوا بسرعة

وبيحبوا كمان اللى يرغى معاهم

[ندعوك للتسجيل في المنتدى أو التعريف بنفسك لمعاينة هذه الصورة]

بما انى ما بعرفشى اغنى انا ها ارفع شعار وعد فاوفى مصر بخير

محمد مختار : متدعيش على حد .. حاول تتغلب كل هذه المشكلات والله لا ينسى الظلم

ريتاج : مصر لسه بخير .. معتقدش

محمود رضا : واكيد كمان جربت كل ما تحزن تمشي فى شوارعها وتشكيلها .. قاموا حبسوك فى السجن

أمير عبد العليم : أنت أروع والله يا حبى

دهب : الموضوع ممتاز .. وحضرتك يا دهب فوق الممتاز وسعر الجرام بقى بـ 200 جنيه .. واهو مش فاضل غير (شعرة ساعة تروح وساعة تيجى) .. بس يارب ميطمعوش فيها هى كمان ..

محمود سمير : بعناها .. وما زلنا (ملاكها) .. إزاى بقى يا عمنا ؟؟ بس كويس انها (ملاكى) مش أجرة ..

أيمن أبو زيد : أنا اللى جبت ده كله لنفسي .. وسلملى على منعم مدبولى

احمد عبد المجيد : وف اخر الغنوة بكيت .. وكلنا بنبكى معااااااااااااااااه

هيما : يسلم مرورك

فهد : الكلام ده يضيع الكبت .. طيب كويس ان الموضوع جاء بفايدة [ندعوك للتسجيل في المنتدى أو التعريف بنفسك لمعاينة هذه الصورة]

إيهاب رفعت : لكن يا صديقى ما الهدف ؟؟ .. لا تسال عن الهدف لأنه سلب منا بإرادتنا او بغيرها .. دور على نصيبك المنهوب الاول .. وبعدين أقولك الهدف ..

عبده : وعد فأوفى .. ونعم الوفاء

.
.

Amr Emam كتب:: دهب : الموضوع ممتاز .. وحضرتك يا دهب فوق الممتاز وسعر الجرام بقى بـ 200 جنيه .. واهو مش فاضل غير (شعرة ساعة تروح وساعة تيجى) .. بس يارب ميطمعوش فيها هى كمان

والله يا أستاذ عمرو حتى لو طمعوا فيها ..........ضربوا الاعور على عينه قال خربانه خربانه هههههههههه

مش مشكلة يا دهب

ولو حتى نغنيلها أغنية ع الممر

ممكن نغنى لمصر

على باب سفارة كندا مع على سلامة

» صرخات ساخرة (6) معيد بكلية الهندسة ..!
» صرخات ساخرة (9) لقطات من أم الدنيا مصر ..!!
» صرخات ساخرة (12) إدارة المنتدى ..!!
» صرخات ساخرة (5) 26 سنة خدمة ف ابتدائي ..!
» صرخات ساخرة (14) الفتنة الطائفية فى مصر ..!!