صرخات ساخرة (6) معيد بكلية الهندسة ..!

.

معيد بكلية الهندسة

اعرفكم بنفسي / خالد معيد بكلية الهندسة ميهمنيش جامعة إيه .. يهمنى الإنسان .. ولو ملوش عنوان .. ايه الهبل اللى انا بقوله ده ؟! اااه معلش يا اخوانا اعذرونى أصلى انا بعيش الدور وبلخبط الكلام على الأغانى .. هبل بعيد عنكم .. هههه

المهم .. كــ يوم روتينى وصلت الكلية بعد رحلة شيقة فى زحمة المواصلات .. وطوال الطريق أحلم ببطل الفيلم الأجنبى الذى شاهدته سهرة أمس وهو يرتدى البالطوو الأسود (كان شيك قوى عليه.. هشترى واحد زيه) بس امتى ؟؟ مش عارف ..
وكام حلم كده جاء فى بالى .. مطولش عليكم عارف انى رغاى قوى .. دخلت مكتب سكرتارية القسم .. وهكذا الإجراء الروتينى ..

سلام عليكم يا عم ابراهيم .. صباح الخير يا مدام سوسن .. ومش عارف ليه بحس انها بترد عليا السلام من تحت الضرس وكانها بتقول فى سرها (انت شرفت يا بيه ؟؟!!) وطبعا مبقولهاش سلام عليكم لانها مبتعرفش ترد السلام غير بـــ صباح الخير .. والله انا أحمد ربنا فى ناس تانية تقولك الله يعافيك يا اخويا .. وناس تانية تقولك العافية تلبس بدنك يا حبيبى .. مش عارف هتلبس بدنه ازاى ؟؟ ما علينا .. انا برغى كتير ليه ..؟

المهم فتحت الشنطة (السامسونايت) دى ماركة عالمية مضروبة –صنع فى الصين- وأخرجت أدواتى لاستعدادى لشرح المحاضرة .. يوووووووووه .. كل مرة أنسي أسلم على د/ عبد الحميد .. رحت بسرعة أسلم عليه .. قابلنى عم سلمونى وهو ينظر لى بدقة بعيناه التى تحدق بي خلف نظارته الـ "القعر كباية" ويبتسم لى على غير العادة ..

إزيك يا عم سلومة .. أهلا ازيك يا باشمهندس أخبارك ايه ؟؟ متنساش تنزل الخزنة بسرعة للـ "حاج صابر" علشان يديك فلوسك .. وباستغراب شديد منى قلت : فلوس ايه يا عم سلمونى ؟؟ قال لى : مش عارف .. ممكن تكون مكافأة المراقبة بتاعت الترم الأول .. وهنا بدأت الأحلام تهرول إلى ذهنى .. يااااااااااااااااااه .. يا فرج الله .. ده ايه الصباح الحلو ده .. هجيب البالطوو اللى نفسي فيه .. شكله بـ 600 جنيه .. مش مهم ولو حتى بألف جنيه هجيبه .. اممممممم .. طيب والشقة اللى بجهزها علشان الجواز .. لالالالا الجزمة خلاص كفرت وعاوزة تتغير ورجلى اشتكت منها .. طيب هم يطلعوا كام ؟؟
ما دام مكافأة يبقى اكيد كتييييييييييير .. أحمدك يارب

طبعا كل هذه الأحلام بينى وبين نفسي .. وتظاهرت أمام عم سلمونى بعدم الاهتمام للمكافأة .. وقلت له : بعد ما اخلص المحاضرة ابقى أنزل ..
قاطعنى / لازم تنزل دلوقتى علشان صابر يقفل الحساب .. وما إن قال لى ذلك .. رأيتنى اطير على درج السلم طيرا .. نزلت الخزنة .. صباح الفل يا عم صابر .. صباح الورد يا باشمهندس ..

عم سلمونى قابلنى وقالى أنزلك علشــ..........
أيوه أيوه .. هكذا رد على عم صابر بمعنى (فهمت خلاص مترغيش كتير)
اخرج بسرعة كشف النقدية .. وظل يبحث عن اسمى حتى وجده .. وأشار بالقلم تجاه اسمى .. م/ خالد امضى هنا .. أمسكت الورقة .. وبطرف عينى دون أن يلمحنى عم صابر .. نظرت إلى خانة النقود وإذا بى بالصدمة والطامة الصغرى .. (75.5 جنية) ..

خمسة وسبعين ؟؟؟؟؟؟؟؟؟ بس !!!!!!!!!!!! ..

لالالالالالالا ونص لو سمحت .. ااااه كده كويس النص جنيه قبل الخمسة وسبعين ..

أحسست بصداع فى الرأس وفقدان لحظى للذاكرة .. تبخرت خلالها كل أحلامى .. حتى البالطوو اتحرق .. واحمر وجهى واصفر وجاب ألوان الطيف .. وقعت بمكان الاستلام .. مد ا/ صابر يده فى الدرج وعد بعض النقود .. ووضعهم على البار الذى امامى .. أمسكت النقود أعدها .. واحد .. اتنين .. تلاتة ................ سبعة !!

ا/ صابر .. دول سبعة جنية .. ؟؟

رد ا/ صابر : لا .. دول سبعة جنيه و(خمسة وخمسين قرش)

ياااااااااللصدمات .. فى لحظة تنتقل العلامة العشرية (75.5) إلى ما بين الخمسة والسبعة (7.55) .. فضلت التفت يمين وشمال .. مصيبة ليكون حد شايفنى ..

بتوع ايه دول يا عم صابر (ع اللى بيجرالى) .. دول فروق مراقبة .. أخذت النقود فى صمت ووضعتها فى جيبى .. ورجعت إلى البيت وكلى إحباط ويأس وأثناء الطريق كلما تذكرت أضحك وحدى (فشر البلية ما يضحك) .. والناس تبصلى .. ايه الاهبل ده ؟؟

أحسن لك تنسى اللى انا قلته .. أحسن تتعب .. وعن قريب سأبيع الــ (7.55) جنيه فى مزاد علنى مع التحف .. حد يشترى ؟؟

تابعوا كل الحلقات على :

[ندعوك للتسجيل في المنتدى أو التعريف بنفسك لمعاينة هذا الرابط]

.

زائر

هههههههههههههههههههههههههههههه
والله خالد ده صعب عليا اوى
لكن برضو هو غلطان ايه اللى يخليه يتعب نفسه ويذاكر ويجيب تقدير ويبقى معيد
بس هو اصلا مش فاهم المفروض انه يتنطط من الفرح
لان الدوله بتقدره ب 7.55
[ندعوك للتسجيل في المنتدى أو التعريف بنفسك لمعاينة هذه الصورة]
الواحد مش عارف يقول ايه بصراحه
اللى عندنا بنديله 7.55 بره بيقدروه جدااااا
اصلا احنا مش بنصرف على البحث العلمى حاجه ولا بنهتم بالعلم
مع اننا بلد العلم والعلماء
والله لوفاكره الارقام بتاعت ميزانية البحث العلمى فى مصر واللى بيتصرف منها كنت قلتلك
حاجه تكسف بصراحه لما نتقارن باسرائيل واليابان وامريكا فى البحث العلمى
لكن للاسف الواقع ان احنا عايشين فى مصر ودى بلدنا

ياه على حرقة الدم الواحد بيقعد يبنى قصور على الرمل وفى لحظه تهدمها الامواج......
على رأى المثل الى تبنيه النمله فى سنين ياخده الجمل فى خفه .....شر البليه ما يضحك
مش عارف بجد الواحد يضحك ولا يبكى (فذو جهل ينام عل حرير .. وذو علم ينام على التراب)

زائر

هههههههههههه
يحمد ربنا يا اخى كويس انه طال منهم حاحه
ههههههههههههههه
بجد فعلا أى معيد فى اى كليه الله يكون فى عونه سواء من المرتب
او المعاناه اللى بيشوفها
مرتبهم فعلا ضعيف جدا وحاسس انهم مظلومين

أضحك وحدي
.. والناس تبصلى ..
ايه الاهبل ده ؟؟

عادي خالص

أعراض طبيعية جدا ....

برافو المعيد دا أثبت كدة انه مصري من الدرجة الأولى

وبنهنيه انه حصل على هذا الوسام:

((يبقى أنت أكيد في مصر ))

جميل جدا السرد ده
لكن الكلام ده من وجهة نظري مش موجود حاليا خصوصا لمعيد هندسة لاني انا اعرف ناس كتير معيدين وزمايلي كمان
المعيد ده عارف كويس انه مش هياخد فلوس في الكلية والجميل كمان انه بيشتغل بالساعة في بعض الاماكن ههههه
طب ليه بيشتغل في الكلية ؟ وبيصرف منين؟
هقولكم
هو لو غاوي يكمل اكيد هيشتغل معيد لكن في ناس كتير مش بتحب تكمل وبيحبوا يشتغلوا خارج الكليه احسن
المهم هو عشان يحقق حلمه ويبقى دكتور في يوم من الايام يبقى لازم يشتغل معيد
وفي نفس الوقت بيكون شغال في اماكن تانية _مكاتب او شركات_ نظام بارت تيم
وناس كتير كده
وغير طبعا الكورسات وخصوصا في هندسة
اي ماده فيها كورسات ومبالغ كتير طبعا
متابع

ههههههههههههههههههههههههههههههههههههه

الله يكون فعونه بشمهندس خالد

ان شاء الله 7.55 على 7.55 يقدر يشتري الجزمه في سنتين تلاته كده

بس بلاش الجاكيت بقى

تسلم ايدك يأستاذ عمرو بس ليه الاحباط ده ..احنا على الاخر [ندعوك للتسجيل في المنتدى أو التعريف بنفسك لمعاينة هذه الصورة]

ويبقى انت أكيد فمصر

السلام عليكم ورحمه الله وبركاته

بجد موضوع جميل جدا يا عمرو

وتسلم الايادى بس انا عاوز اوضح نقطه

انا كنت فى هندسه وكان ليا اصحاب اكبر منى

وبقوا معيدين والحمد لله

ويمكن كان منهم البشمهندس يوسف اللى كان معانا هنا

على المنتدى لفترات طويله

المهم انا بمعرفتى بتفكير الناس دى

بيتقسموا قسمين قسم بيعشق العلم والتعليم وميقدرش يبعد عنهم

او تقدر تقول اكاديمى بحت

وده العلم وانه سبب فى تعليم الناس

والشغل المعملى وكده بيخليه ميفكرش فى اى حاجه تانيه

وقسم تانى واخد الموضوع مرحله معينه يعنى هاخد ماجستير

والف شركه ومكان ممتاز هيتمنونى

وكمان وانا شغال هدى قورصات وهظبط الدنيا

اه المرتبات ضعيفه

بس بجد الطموح اللى عند كل واحد منهم

بيغنيه عن المرتب ده

وربك الغنى طبعا

ده من واقع معرفتى بيهم عن قرب جدا

هههههههههههههههههههههههههههههه
القرش الابيض بينغع فى اليوم الاسود [ندعوك للتسجيل في المنتدى أو التعريف بنفسك لمعاينة هذه الصورة]
هوحد طايل 7.55

شر البلية ما يضحك

لو مكنتش موجودة الجمله دى كنت قولتها

مش جديد ماهما اللى ضايع حقهم هما المتعلمين

ويقلولك اتعلم والله كان العون فى الشباب

ومش عايزين الشباب تهج وتتغرب ان كان

كرامتهم ضايعه فى بلدهم هيفكروا فيها ليه

كلامك ا/عمرو فكرنى بالراجل

سواق السزوكى كنت راكبه انا وزميلى معاة

واحنه راحين الامتحان وقعد يكلمنا وحكلنا على

اولادة اللى قال جبت قرض من البنك علشان

يتعلموا فى الجامعه عشان بعد التخرج يشتغلوا

واكيد هيدفعوا الدين دة وزيادة مش بقوا

شهادات عاليه قال اتخرجوا والاربعه قاعدين

ولما زهقوا خرجوا يشتغلوا عارفين اشتغلوا ايه

خريج كليه التربيه اشتغل فى مدرسه باربعين جنيه يافرحتى !!!! وخريج الهندسه اشتغل فى

فندق فى النظافه والباقى بنات واحدة خدمه اجتماعيه وواحدة اثار وقاعدين فى

البيت والله الراجل بكلامه كرهنا فى الدنيا

حتى كنا راحين امتحان وقاعدين نزاكر بقى

فى العربيه عشان نلحق رحت انا وزميلى

قفلين الورق اللى معانا وقولنا يعنى لو حتى

نجحنا واتخرجنا ماهو بردة هنكون زيهم

وقعدنا نضحك على الحال اللى احنه فيه وقولنه

اللى اتزاكر اتزاكر ولا عنه حتى متزاكر

يعنى هتفرق يعنى

شكل السلسله دى هتوجع قلوبنا يا ا/ عمرو
وهتقلب على الناس همومهم

ههههه

كان لازم معيد فى الهندسة ياعمنا ؟!

أنا هقولك على حاجة

شادى

أه مهندس شادى ..ماتعرفوش أنت

بيقبض 1200 شهريا م الكلية

وبيدى كورسات الواحد ب 450 جنيه فى السنة وبيدى وحوالى دفعة كاملة يعنى إضرب فى أقل عدد وهو مثلا مثلا 500 طالب

500*450 =225000 ألف جنيه فى التيرم

فاتح هو مكتب مقاولات لحسابه بيجيلة مش أقل من 10000 شهريا لأنه رفض شغل المكاتب والشركات وفضل يعتمد على نفسه ويفتح مكتب مقاولات هو مهندسه ومنفذه

ده شادى عنده كم سنة ياعمنا ؟

27 سنة

يعنى جمع بين الأكادمية والعملى وكل المعيدين عندنا كده ماعدا الكسالا اللى أنا بعتبرهم من وجهة نظرى كسلانين وأكتفوا بمرتب الكلية وشغل من بره وبس
ومرتبهم مايعديش 4000 جنيه شهريا فقط!!!

يعنى ماتقربش ياعمور من معيدين هندسة خالص ههههههه

دول عندهم عربيات أحسن من بتاع الدكاترة هههههههه

ربنا يزيدهم ويدينا ويديهم يارب

loka كتب:: اصلا احنا مش بنصرف على البحث العلمى حاجه ولا بنهتم بالعلم
مع اننا بلد العلم والعلماء
والله لوفاكره الارقام بتاعت ميزانية البحث العلمى فى مصر واللى بيتصرف منها كنت قلتلك
حاجه تكسف بصراحه لما نتقارن باسرائيل واليابان وامريكا فى البحث العلمى
لكن للاسف الواقع ان احنا عايشين فى مصر ودى بلدنا

بحث علمى ايه يا ا/ لوكا ..

هو احنا وصلنا لبداية الطريق أصلا .. احنا مغيبين ودى مش نظرة تشاؤمية منى .. لكنها نظرة واقعية

ENG_MESME7 كتب:: ياه على حرقة الدم الواحد بيقعد يبنى قصور على الرمل وفى لحظه تهدمها الامواج......
على رأى المثل الى تبنيه النمله فى سنين ياخده الجمل فى خفه .....شر البليه ما يضحك
مش عارف بجد الواحد يضحك ولا يبكى (فذو جهل ينام عل حرير .. وذو علم ينام على التراب)

نعم القول يا هندسة

وامثالك بتاعت النملة دى تحفة تخلى الواحد يموت م الضحك [ندعوك للتسجيل في المنتدى أو التعريف بنفسك لمعاينة هذه الصورة]

أحمد صلاح هلالي كتب:: هههههههههههه
يحمد ربنا يا اخى كويس انه طال منهم حاحه
ههههههههههههههه
بجد فعلا أى معيد فى اى كليه الله يكون فى عونه سواء من المرتب
او المعاناه اللى بيشوفها
مرتبهم فعلا ضعيف جدا وحاسس انهم مظلومين

مظلومين !!

دول مدفونين .. كان الله فى عونهم

sendirella كتب:: أضحك وحدي
.. والناس تبصلى ..
ايه الاهبل ده ؟؟

عادي خالص

أعراض طبيعية جدا ....

برافو المعيد دا أثبت كدة انه مصري من الدرجة الأولى

وبنهنيه انه حصل على هذا الوسام:

((يبقى أنت أكيد في مصر ))

ده احلى وسام ا/ سندريلا

وكل المصريين ماشيين به .. هو احنا حلتنا غيره ؟؟

شكرا لمرورك

Baher Hokkam كتب:: جميل جدا السرد ده
لكن الكلام ده من وجهة نظري مش موجود حاليا خصوصا لمعيد هندسة لاني انا اعرف ناس كتير معيدين وزمايلي كمان
المعيد ده عارف كويس انه مش هياخد فلوس في الكلية والجميل كمان انه بيشتغل بالساعة في بعض الاماكن ههههه
طب ليه بيشتغل في الكلية ؟ وبيصرف منين؟
هقولكم
هو لو غاوي يكمل اكيد هيشتغل معيد لكن في ناس كتير مش بتحب تكمل وبيحبوا يشتغلوا خارج الكليه احسن
المهم هو عشان يحقق حلمه ويبقى دكتور في يوم من الايام يبقى لازم يشتغل معيد
وفي نفس الوقت بيكون شغال في اماكن تانية _مكاتب او شركات_ نظام بارت تيم
وناس كتير كده
وغير طبعا الكورسات وخصوصا في هندسة
اي ماده فيها كورسات ومبالغ كتير طبعا
متابع

كلام موزون جدا من شخص عقلانى جدا وده اللى بحبه فيك يا باشمهندس

لكن نسيت أقول ان م/ خالد ده اضطر لترك العمل بالكلية وراح اشتغل فى شركة بتقدره كويس قوى ماديا ومعنويا .. وهو دلوقتى مرتاح ..

نورت الموضوع يا هندسة [ندعوك للتسجيل في المنتدى أو التعريف بنفسك لمعاينة هذه الصورة]

anosha كتب:: ههههههههههههههههههههههههههههههههههههه

الله يكون فعونه بشمهندس خالد

ان شاء الله 7.55 على 7.55 يقدر يشتري الجزمه في سنتين تلاته كده

بس بلاش الجاكيت بقى

تسلم ايدك يأستاذ عمرو بس ليه الاحباط ده ..احنا على الاخر

ويبقى انت أكيد فمصر

بلاش جاكت وبلاش الجزمة وبلاش الطاقة بتجيب حساسية [ندعوك للتسجيل في المنتدى أو التعريف بنفسك لمعاينة هذه الصورة]

هى دى مصر .. امتى يا مصر تفوقى بقى وتزحى الكلاب اللى بينهشوكى ويحلوا عن سمانا ؟؟

امتى ؟؟

AhMeD ELSaYeD كتب:: السلام عليكم ورحمه الله وبركاته

بجد موضوع جميل جدا يا عمرو

وتسلم الايادى بس انا عاوز اوضح نقطه

انا كنت فى هندسه وكان ليا اصحاب اكبر منى

وبقوا معيدين والحمد لله

ويمكن كان منهم البشمهندس يوسف اللى كان معانا هنا

على المنتدى لفترات طويله

المهم انا بمعرفتى بتفكير الناس دى

بيتقسموا قسمين قسم بيعشق العلم والتعليم وميقدرش يبعد عنهم

او تقدر تقول اكاديمى بحت

وده العلم وانه سبب فى تعليم الناس

والشغل المعملى وكده بيخليه ميفكرش فى اى حاجه تانيه

وقسم تانى واخد الموضوع مرحله معينه يعنى هاخد ماجستير

والف شركه ومكان ممتاز هيتمنونى

وكمان وانا شغال هدى قورصات وهظبط الدنيا

اه المرتبات ضعيفه

بس بجد الطموح اللى عند كل واحد منهم

بيغنيه عن المرتب ده

وربك الغنى طبعا

ده من واقع معرفتى بيهم عن قرب جدا

والله تفكير كويس جدا .. لكن فى ظل الأزمات المادية ..

الطموح المعنوى بيكون فرعى .. والأساسى هو الماديات ..

عموما ربنا يوفقهم

لأن حقيقى بدون الناس دى لو كل واحد فكر التفكير بتاعنا من زاوية المال وفقط .. مش هنلاقى حد يدرسلنا مادة علمية ..

سؤال هنا خارج المنهج يا هندسة :

اقتباس :: بيتقسموا قسمين قسم بيعشق العلم والتعليم وميقدرش يبعد عنهم

او تقدر تقول اكاديمى بحت

هل العلم الهندسى الأكاديمى بعيد عن أرض الواقع ؟؟

بمعنى : ان اللى بيدرسوه المعيدين اكاديمى بحت بحيث يخرجه عن طريق العمل الوضعى ؟؟

زائر

اقتباس :

هى دى مصر .. امتى يا مصر
تفوقى بقى وتزحى الكلاب اللى بينهشوكى ويحلوا عن سمانا ؟؟

..

استغفر أحسن ماياخدوا حسناتك كمان

اميره الاحلام كتب:: هههههههههههههههههههههههههههههه
القرش الابيض بينغع فى اليوم الاسود [ندعوك للتسجيل في المنتدى أو التعريف بنفسك لمعاينة هذه الصورة]
هوحد طايل 7.55

اهو احسن من مفيش [ندعوك للتسجيل في المنتدى أو التعريف بنفسك لمعاينة هذه الصورة]

منورة اخت / اميرة الاحلام

Ehab كتب:

اقتباس :

هى دى مصر .. امتى يا مصر
تفوقى بقى وتزحى الكلاب اللى بينهشوكى ويحلوا عن سمانا ؟؟

..

استغفر أحسن ماياخدوا حسناتك كمان

دول هياخدوا حسنات

وياخدوا روحى كمان [ندعوك للتسجيل في المنتدى أو التعريف بنفسك لمعاينة هذه الصورة]

ربنا يستر

استغفرك ربى واتوب إليك ..

الطير الباكي كتب:: شر البلية ما يضحك

لو مكنتش موجودة الجمله دى كنت قولتها

شكل السلسله دى هتوجع قلوبنا يا ا/ عمرو
وهتقلب على الناس همومهم

انا اقتبست الكلمتين دول لان الحشو اللى فى النص وجع بطنى وزعلت على بلدى

وهنوقف السلسلة علشان خاطرك يا ا/ طير [ندعوك للتسجيل في المنتدى أو التعريف بنفسك لمعاينة هذه الصورة]

احمد عبدالمجيد كتب:: ههههه

كان لازم معيد فى الهندسة ياعمنا ؟!

أنا هقولك على حاجة

شادى

أه مهندس شادى ..ماتعرفوش أنت

بيقبض 1200 شهريا م الكلية

وبيدى كورسات الواحد ب 450 جنيه فى السنة وبيدى وحوالى دفعة كاملة يعنى إضرب فى أقل عدد وهو مثلا مثلا 500 طالب

500*450 =225000 ألف جنيه فى التيرم

فاتح هو مكتب مقاولات لحسابه بيجيلة مش أقل من 10000 شهريا لأنه رفض شغل المكاتب والشركات وفضل يعتمد على نفسه ويفتح مكتب مقاولات هو مهندسه ومنفذه

ده شادى عنده كم سنة ياعمنا ؟

27 سنة

يعنى جمع بين الأكادمية والعملى وكل المعيدين عندنا كده ماعدا الكسالا اللى أنا بعتبرهم من وجهة نظرى كسلانين وأكتفوا بمرتب الكلية وشغل من بره وبس
ومرتبهم مايعديش 4000 جنيه شهريا فقط!!!

يعنى ماتقربش ياعمور من معيدين هندسة خالص ههههههه

دول عندهم عربيات أحسن من بتاع الدكاترة هههههههه

ربنا يزيدهم ويدينا ويديهم يارب

والله انت هتخلينى أغير فكرتى يا ابو حميد

يعنى انت متأكد ان الكسلان اللى بيعتمد على مرتبه بس بياخد 4000 جنيه ؟؟

اقتباس :: ومرتبهم مايعديش 4000 جنيه شهريا فقط!!!

بقا دا كلام هههههههههههههه

وانا اللى قلبي اتقطع علشان الواد

اتكسر بخاطره وطلعوه فى الاخر 7 جنيه

يطلع لو كسلان بياخذ 4000 امال لو مش كسلان ؟؟؟؟؟؟!!!!

ايه يا عم عمرو التشاؤم ده
دايما بتيجى على الجرح ههههههههههههه
يعنى الحكومة هتكفى مين ولا مين.....يوووووووووه يا عمرو خلينا ساكتين وادى احنا عايشين
حقيقى تنفع رواية.......تفاءل فالمستقبل امامك.......

» صرخات ساخرة (4) جربت تغنى لمصر ..؟
» صرخات ساخرة (14) الفتنة الطائفية فى مصر ..!!
» صرخات ساخرة (5) 26 سنة خدمة ف ابتدائي ..!
» صرخات ساخرة (9) لقطات من أم الدنيا مصر ..!!
» صرخات ساخرة (12) إدارة المنتدى ..!!